MATAYO 27

Yeso okoirwa ase Pilato gavuna o Rumi

(Mar 15:1; Luk 23:1–2; Yoh 18:28–32)

1Bogachia gokia mambia, abakuani abanene bonsi na abagaaka b’abanto bagakora ekina ase Yeso, bamoite. 2Bakamosiba, bakamoira, bakamomoa Pilato, oyorenge gavuna.

Ogokwa kwa Yudas

3Ekero Yudas, oria omoruete achia korora ng’a onacheirwe ekina, ageitia, akairania chibesa chiria chie chifeta emerongo etato ase abakuani abanene na abagaaka, 4okobora, “Namochire ase okorua amanyinga atari na bobe bonde.” Barabwo bakabora, “Ninki aya are asetore? Mbwerorere aye!” 5Agatuguta chibesa chiria chie chifeta ase Hekalu ime, akaimoka, akagenda akeng’enta. 6Korende abakuani abanene bakaimokia chibesa chiria chie chifeta bakabora, “Tari boronge gochibeka ase ekungo y’esadaka ya Nyasae, ekiagera chirochio nechie rigori ri’amanyinga.” 7Bagakora ekina, bakagora oboremo bw’omokori chinyongo, bobe aase bagotindeka abageni. 8Ase ayio oboremo obo nigo bokorokwa Oboremo bw’Amanyinga goika rero. 9Erio rigaikeranigwa eriatebetwe nomobani Yeremia, ogoteba, “Bakaimokia chibesa chiria chie chifeta emerongo etato, rigori riaye oria obegetwe rigori nabanto bande b’Abaisraeli, 10bagachiira ase okogora oboremo bw’omokori chinyongo, buna Omonene anchigete.”

Yeso ase obosio bwa Pilato

(Mar 15:2–15; Luk 23:3–5,13–25; Yoh 18:33—19:16)

11Nere Yeso agatenena ase gavuna; na gavuna akamoboria, “Naye Omoruoti bw’Abayahudi?” Yeso akamotebia, “Naboigo. Aye gwatebire.” 12Korende ochia gosoerwa nabakuaani abanene na abagaaka, tairaneria ing’ana rinde. 13Erio Pilato akamotebia, “Toigweti amang’ana aya amange bakona‐goteba igoro yao?” 14Korende ere tairaneria rinde, nonya nase ring’ana erimo, na gavuna agakumia mono.

15Bono ekero kie rituko rinene nigo yarenge engencho ya gavuna kobasiborera omosibwa oyomo oyo barigetie. 16Mbabwate omosibwa oyomo omanyekanete, okorokwa Baraba. 17Erio kobasangererekanire, Pilato akababoria, “Norori morigetie mbasiborere, Baraba gose Yeso, oyo okorokwa Kristo?” 18Ekiagera konya omanyire ng’a nigo bamorure ase obogechi. 19Ekero Pilato aikaransire ase ekerogo gi’ekina, akarenterwa amang’ana na mokaye, ogoteba, “Oyio nomonto omonyene oboronge, tobaisa kwebwatia asare, ekiagera rero inachandetwe namange ase okorota ase engencho yaye.” 20Bono abakuani abanene na abagaaka bakagenka emeganda ng’a baborie baegwe Baraba, na Yeso bamoite. 21Gavuna akababoria naende, “Ase abanto aba babere, norori morigetie mbasiborere?” Bakamotebia, “Baraba.” 22Pilato akababoria, “Imokore naki Yeso, oyo okorokwa Kristo?” Bakamotebia bonsi, “Tiga abambwe!” 23Akababoria, “Nase ki? Mbobe ki akorete?” Barabwo bakamenta goaka egeturi, bakobora, “Tiga abambwe!”

24Ekero Pilato achia korora ng’a gento tikenyarekaneti asare, ne riroroche rioka rikona‐kobucha, akaimokia amache, agaisaba amaboko aye ase obosio bw’omoganda, ogoteba, “Inche tindi na komocha ase amanyinga ’omonto oyo omonyene oboronge. Nigoro yaino abanyene.” 25Abanto bonsi bakairaneria, “Amanyinga aye, tiga abe igoro asetore, na ase abana baito!” 26Erio akabasiborera Baraba, na nyuma gaakire Yeso emecharichi, akabamotigera anyare kobambwa.

Okobambwa kwa Yeso

(Mar 15:16–32; Luk 23:26–43; Yoh 19:17–27)

27Erio abarwani ba gavuna bakaira Yeso ime ase enyomba y’ekegambero, bakamosangererekera omoganda omogima bw’abarwani. 28Bakamorusia chianga chiaye, bakamobekera eanga embariri. 29Bagatwang’a egutwa y’amagwa, bakamobekera motwe, na egetonto bakamobekera ase okoboko kwaye gw’okorio; bagatung’ama asare, bakamochecheria na kobora, “Masoge, Omoruoti bw’Abayahudi!” 30Erio bakamotwera amate, bakaimokia egetonto keria, bakamoaka ase omotwe. 31Kobamochecheirie, bakamorusia eanga eria embariri, bakamobekera chianga chiaye omonyene, bakamoira isiko abambwe.

32Kobagosoka korwa ase omochie, bakarora omonto oyomo, Omokurene, okorokwa Simion; bakabetereria omonto oyio abogorerie Yeso omosalaba. 33Bagachia goika aase akorokwa Gologotha (engencho yaye: Aase Ekeore), 34bakamoa edivai esang’anirie nendorwe, anywe. Agachia koyeigwa, tancha konywa. 35Kobamobambire bagaatanana chianga chiaye, bagakora obomera. 36Erio bagaikaransa komorigereria aria. 37Igoro ase omotwe oye bakabeka ogosoerwa kwaye, korikire, “OYO NERE YESO, OMORUOTI BW’ABAYAHUDI”. 38Erio abauri babere bakabambwa amo nere, oyomo ensemo y’okoboko kwaye gw’okorio, na oyomo ensemo y’okoboko kwaye gw’okobee. 39Na barabwo abaare goeta, bakamorama, bagosinga‐singisia emetwe yabo, bakobora, 40“Aye oyogotagora Hekalu na koyeagacha ase amatuko atato, etoorie! Onye naye Omwana o Nyasae, ika korwa ase omosalaba.” 41Na baria abakuani abanene bagakora boigo, bakamokorera echeche amo naborokia b’amariko na abagaaka, bakobora, 42“Natooretie abande, ere omonyene takonyara gwetooria. Ere n’Omoruoti bw’Abaisraeli, tiga aike bono korwa ase omosalaba, na intwe rirorio ntomwegene. 43Nigo asemeretie Nyasae, tiga Nyasae amotoorie bono, onye omoganetie, ekiagera natebete: Inche n’Omwana o Nyasae.” 44Na baria abauri, ababambetwe amo nere, bakamorama boigo.

Ogokwa kwa Yeso

(Mar 15:33–41; Luk 23:44–49; Yoh 19:28–30)

45Bono korwa chinsa isano nemo omosunte okaba igoro ase ense yonsi goika chinsa kianda. 46Chiachia koba ang’e chinsa kianda, Yeso, akarera neriogi rinene, okobora, “Eloi, Eloi, lama sabakitani?” Okoonchorwa kwaye, “Nyasae one, Nyasae one, naki gwantigire?” 47Na abande b’abwo bateneine aroro, bakayaigwa, bakabora, “Omonto oyo n’Elija akorangeria.” 48Erio kegima oyomo obo akaimokia esifunchi, akayeichoria chinkama, akayebeka ase egetonto, akamoa anywe. 49Korende baria abande bakabora, “Tiga torore gose Elija ngocha are komotooria.” 50Yeso akarera naende neriogi rinene, erio agatweka mo.

51Na rora, egetambaa gi’okonacha Hekalu kegatandoka korwa igoro goika inse, gekaba bibere, ense egatengecha, ebitare bigatandoka. 52Chimbeera chikamaanoka chigaasama, na emebere emenge y’abanto abachenu konya bakure ekabokigwa. 53Kabarure ase chimbeera, nyuma y’okoboka kwa Yeso bagasoa ase omochie omochenu#27:53 Noro Yerusalemu bakaorokera abange. 54Na ekero omotang’ani bw’abarwani rigana, na abwo barenge amo nere korenda Yeso, bachia korora omotengecho bw’ense na ebiakorekire, bakairoka mono, bakabora, “Ekeene, oyo nigo arenge Omwana o Nyasae!”

55Mbarengeo boigo abakungu abange, barigereretie korwa are, abatunyanete Yeso korwa Galili, bakomokorera. 56Ase abwo nigo barenge Mariamu Magidalena, na Mariamu ng’ina Yakobo na Yusufu, na ng’ina ’abana ba Zebedi.

Ogotindekwa kwa Yeso

(Mar 15:42–47; Luk 23:50–56; Yoh 19:38–42)

57Riachia koba mogoroba, omonto omonda bw’Arimathaya, okorokwa Yusufu, agacha; ere nomworokigwa o Yeso orenge. 58Oyio akagenda ase Pilato, akarigia omobere o Yeso. Erio Pilato agachika ayoegwe. 59Yusufu akaimokia omobere, akayoboyia egetambaa ekiya ki’egatani, 60akayobeka ase oboina bwaye oboyia, obwabachete ase egetare; naende agaturunkania rigena rinene gochia ase egesieri ki’oboina, akagenda. 61Mbarengeo Mariamu Magidalena na Mariamu onde, baikaransete bosio bw’oboina.

62Rituko ria kabere, nario riare rigotunya rituko ri’Okwearigania, abakuani abanene na Abafarisai bagasangererekana ase Pilato, 63bakabora, “Omonene, twainyoire ng’a omonyaborimo oria natebete ekero arenge moyo: Nyuma ase amatuko atato nimboke. 64Gaki, chika oboina borendwe buya goika rituko ria gatato, aborokigwa baye tibabaisa gocha komoiba, batebie abanto ng’a obokire korwa ase abakure; okong’aina kw’omoerio nakobue koria kwe ritang’ani.” 65Pilato akabatebia, “More nabarendi; genda morende mono oboina buna moranyare.” Bakagenda bakaborenda mono, bakabeka rigena riria ekemanyererio, naende bakabeka abarendi.

Currently Selected:

MATAYO 27: EKEGUSIIBBLE

Highlight

Copy