MATAYO 26

Yeso okoboerwa aitwe

(Mar 14:1–2; Luk 22:1–2)

1Ekero Yeso akoorire gokwana amang’ana aya onsi, agatebia aborokigwa baye, 2“Mwamanyire ng’a nyuma y’amatuko abere nebe Epasaka, na Omwana‐o‐mwanyabanto naruegwe kobambwa.”

3Erio abakuani abanene na abagaaka b’abanto bagasangererekana ase egoora y’omokuani omonene oyore korokwa Kayafa; 4bagakora ekina barabwo ase barabwo, banyare komobwata Yeso nobong’ainereria, na komoita. 5Korende bakabora, “Taba ase rituko rinene, tiribaisa gocha koba riroroche ase abanto.”

Yeso ogoakwa amaguta agwo Bethania

(Mar 14:3–9; Yoh 12:1–8)

6Na Yeso, ekero arenge Bethania ase enyomba ya Simion, oyorenge noborwaire bwa ukoma, 7agacherwa nomokungu orenge nechuba ye rigena rirabu ere namaguta e rimisu rigiya aye rigori rinene; gaikaransete ase endagera, akamonyororokeria ase omotwe oye. 8Korende ekero aborokigwa baye bachia korora aya, bakagechigwa, bakabora, “Nobwa ki obosiru obo? 9Naki amaguta aya anga naoonigwa ase chisiringi chinyinge na chiegwe abataka.” 10Yeso, konya omanyire aya, akabatebia, “Nase ki mokorosia omokungu oyo? Ere onkoreire emeremo emiya, 11ekiagera amatuko onsi nigo more nabataka amo nainwe, korende timori nainche amatuko onsi. 12Buna anyororokeria amaguta aya ase omobere one, onkoreire aya ase okombeka ang’e ase ogotindekwa kwane. 13Nekeene nabatebirie: Kera aase enchili eye erarandigwe ase ense yonsi, neri akora oyo nariatorwe ase okomoinyora.”

Okorua kw’obong’ainereria kwa Yudas

(Mar 14:10–11; Luk 22:3–6)

14Na ekero ekio oyomo bwa baria ikomi na babere, nere, oyokorokwa Yudas Iskariota, agachiera abakuani abanene, 15akababoria, “Inki morang’e onye nkomorua asemore?” Bakamoa chibesa chie chifeta emerongo etato. 16Korwa ekero ekio akaba nkorigia are ribaga ri’okomorua.

Endagera y’omoerio

(Mar 14:12–26; Luk 22:7–23; Yoh 13:21–30; 1 Kor 11:23–25)

17Ase rituko rie ritang’ani ri’Emegati etabekiri memera aborokigwa bagachiera Yeso, bakamoboria, “Ng’ai origetie tokoroiserie oriere Epasaka?” 18Akabairaneria, “Genda ase omochie ase omonto gete, momotebie: Omworokia otebire: Engaki yane yaikire ang’e; nyomba mwao nao ndariere Epasaka amo naborokigwa baane.” 19Aborokigwa bagakora buna bachigetwe na Yeso, bakaarigania Epasaka.

20Riachia koba mogoroba, agaikaransa ase endagera, amo naborokigwa baria ikomi na babere. 21Kobaikaransire koragera, akabora, “Nekeene nabatebirie: oyomo oino nandue.” 22Bagaichana mono, bagachaka kera oyomo komoboria, “Inee! Omonene, ninche?” 23Akairaneria, “Oyo ogotobeka okoboko kwaye amo nainche ase esani, oyio nere orandue. 24Omwana‐o‐mwanyabanto nkogenda are buna arikeretwe, korende obobe nobwaye omonto oria, Omwana‐o‐mwanyabanto arurwe nere! Nanga mbuya kobua asare omonto oria, nonya ataiboretwe.” 25Yudas, nere oyokomorua, akamoboria, “Inee! Omonene, ninche? Akamoiraneria: Naboigo. Aye gwatebire.”

26Kobakoragera, Yeso akabogoria omogati, akayosesenia, akayosamunyora, akaa aborokigwa, akabora, “Bogoria, morie; oyo noro omobere one.” 27Akabogoria na egekombe, na ekero airaneirie ng’a mbuya mono, akabaa, akabora, “Kanywe aya inwe mwensi, 28naki aya naro amanyinga aane ay’okobwatana okoyia, aitekire ase engencho y’abange ase okwaberwa kw’ebibe. 29Nabatebirie, tinkonywa naende okwama oko kw’emesabibu goika rituko riria ndache gokonywa okoyia amo nainwe ase oboruoti bwa Tata.” 30Kobakoorire gotera Ogotera, bagasoka kogenda egetunwa ki’Emezeituni.

Yeso okobana ogweatanana kw’aborokigwa

(Mar 14:27–31; Luk 22:31–34; Yoh 13:36–38)

31Erio Yeso akabatebia, “Ase obotuko bwa rero inwe mwensi inamogochwe na gontiga ase engencho yane; naki narikire: Ning’ake omorisia, ne ching’ondi chie riicho inachiserebekane. 32Korende nyuma y’okoboka kwane nimbatang’anere kogenda Galili.” 33Petero akamotebia, “Neba inabagochwe bonsi na bagotige ase engencho yao, inche tinkogochwa na kogotiga nonya ng’ake.” 34Yeso akamotebia, “Ekeene nagotebirie: Ase obotuko obo, ekero etuoni etarabuga, nonkane ara gatato.” 35Petero akamotebia, “Nimba ngokwa amo naye, tinkogokana nonya ng’ake.” Na aborokigwa bonsi bagateba boigo.

Yeso ore Gethisemane

(Mar 14:32–42; Luk 22:39–46)

36Naende Yeso akagenda nabarabwo goika aase akorokwa Gethisemane, agatebia aborokigwa baye, “Ikaransa aa ekero nkogenda aria gosaba.” 37Akaira Petero na abana baria ba Zebedi babere, agachaka goichana na gwechanda mono. 38Erio akabatebia, “Omoyo one nore nobororo obonge, nonya ngoika ogokwa; ikaransa aa, morende amo nainche.” 39Akagenderera ake, akagwa maumama, agasaba, “Tata one, onye ekonyarekana, tiga egekombe eke#26:39 Egekombe eke, engencho yaye: emechando eye kerusigwe asende; korende taba buna nyanchete inche, korende buna bwanchete aye.” 40Agachiera aborokigwa baria, akabanyora bararire, agatebia Petero, “Inee! Iga timokonyara korenda amo nainche nonya nensa eyemo? 41Renda, mosabe, timobaisa gosoa ase ogoteemwa; omoika oro nore nogwancha, korende omobere tori ne chinguru.” 42Naende akagenda eria kabere, agasaba, “Tata one, onye tekonyarekana egekombe eke#26:42 Egekombe eke, engencho yaye: emechando eye keng’etere ntakenywereti, abe buna bwanchete aye.” 43Agacha naende, akabanyora bararire; ekiagera amaiso abo abeire amarito. 44Akabatiga naende, akagenda, agasaba eria gatato agakwana amang’ana aria amatang’ani. 45Erio agachiera aborokigwa baria, akabatebia, “Nonya mbono moraire na gotimoka? Rora ensa yaikire, na Omwana‐o‐mwanyabanto obekirwe ase amaboko ’abanyene ebibe. 46Imoka, togende, rora, ere oyokondua oikire ang’e.”

Okobwatwa kwa Yeso

(Mar 14:43–50; Luk 22:47–53; Yoh 18:2–11)

47Ekero arenge gokwana, Yudas, oyomo bwa baria ikomi na babere, agacha, na omoganda omonene amo nere bare nemioro ne chinungu, bakorwa ase abakuani abanene na abagaaka b’abanto. 48Ere oyokomorua, konya obaeire ekemanyererio, agateba, “Oyo ndanyunyunte, oyio nere, momobwate.” 49Erio kegima agachiera Yeso, agateba, “Masoge, Omonene!” Akamonyunyunta. 50Yeso akamotebia, “Mosani, nase ki gwacha aa?” Erio bagacha, bakamobwata Yeso, bakamoira. 51Na rora, oyomo obo bw’abarenge amo na Yeso akarambora okoboko kwaye, akang’usa omoyio oye o birende, agaaka omosomba bw’omokuani omonene, akamobutora ogoto. 52Erio Yeso akamotebia, “Irania omoyio oo o birende aase aye, ekiagera bonsi abakoimokia omoyio o birende inabasire ase omoyio o birende. 53Gose tomanyeti ng’a ninyare gosaba Tata, na ere nantomere abamalaika kobua emeganda ikomi na ebere? 54Korende naki rende nanga amariko aikeranigwa, ng’a nabo egwenerete koba?” 55Ensa eria Yeso agatebia emeganda y’abanto, “Inee! Igo mwachire buna mokoimokera omouri nemioro ne chinungu gocha kong’ira? Kera rituko nigo narenge amo nainwe ase Hekalu ime kworokereria, ko timwambwata. 56Korende aya onsi abeire, erinde amariko ’ababani aikeranigwe.” Erio aborokigwa bonsi bakamotiga, bagatama.

Yeso okoborigwa ase obosio bwa omokuani omonene

(Mar 14:53–65; Luk 22:54–55,63–71; Yoh 18:12–14,19–24)

57Baria babwatete Yeso bakamoira ase Kayafa omokuani omonene, aase aborokia b’amariko na abagaaka basangererekanete. 58Na Petero akamotunyana korwa nyuma ore egeka, goika ase egoora y’omokuani omonene, agasoa ime, agaikaransa amo nabasomba, erinde arore omoerio. 59Erio abakuani abanene na ab’ekegambero bonsi bakarigia amang’ana ’oborimo ay’ogosoera Yeso, banyare komoita; 60korende nonya abarori abange b’oborimo bachete, tibayanyora. Omoerio abarori babere bagacha, 61bakabora, “Oyo nigo atebete: Ninyare gotagora Hekalu ya Nyasae, na koyeagacha ase amatuko atato.” 62Erio omokuani omonene agatenena akamoboria, “Tokoiraneria ing’ana? Inki aba bakogosoera?” 63Korende Yeso agakira. Na omokuani omonene akamotebia, “Nagotianirie ase Nyasae ore moyo, ototebie gose naye Kristo, Omwana o Nyasae.” 64Yeso akamotebia, “Naboigo. Aye gwatebire, korende nabatebirie inwe, korwa bono inamorore Omwana‐o‐mwanyabanto oikaransete ensemo y’okoboko gw’okorio kw’Oyore nokobua, ogocha ase amare a igoro.” 65Erio omokuani omonene agatandora chianga chiaye, akabora, “Oramire Nyasae; abarori naba ki tokorigia? Mwaigure emerumi yaye akorama. 66Naki moroche?” Bakairaneria, “Omonto oyo nigo agwenerete akwe.” 67Erio agwo bakamotwera amate obosio, bakamoaka chinkundi; abande bakamoaka chindoe, 68bakobora, “Kristo, tobanere! Ning’o ogoaka?”

Petero okomokana Yeso

(Mar 14:66–72; Luk 22:56–62; Yoh 18:15–18,25–27)

69Bono Petero nigo aikaransete egoora isiko. Omoiseke oyomo akamochiera, akabora, “Aye naye kwarenge amo na Yeso Omogalili.” 70Korende ere agakana ase amasio abo bonsi, akabora “Timanyeti ayio ogokwana.” 71Ekero achia gosoka gesieri, omoiseke onde akamorora, agatebia abarengeo, “Omonto oyo nigo arenge amo na Yeso, Omonazareti.” 72Agakana naende, na gotiana, “Inche timomanyeti omonto oyio.” 73Nyuma ase egeka egeke abateneine aroro bagacha, bagatebia Petero, “Ekeene bori, naye noyomo obo ore, ekiagera ogokwana kwao gwakoorokirie.” 74Erio agachaka kweragereria na gotiana, okobora, “Inche timomanyeti omonto oyio.” Erio kegima etuoni ekabuga. 75Erio Petero akainyora ring’ana riria Yeso atebete, “Ritang’ani etuoni etarabuga, nonkane ara gatato.” Agasoka isiko, akarera nobororo.

Currently Selected:

MATAYO 26: EKEGUSIIBBLE

Highlight

Copy