MATAYO 28

Okobokigwa kwa Yeso

(Mar 16:1–18; Luk 24:1–12; Yoh 20:1–10)

1Esabato egachia koera, kobogokiamoka rituko rie ritang’ani ri’echuma, Mariamu Magidalena na oria Mariamu onde bakagenda korora oboina. 2Na rora, norengeo omotengecho omonene, ekiagera omomalaika bw’Omonene aigete korwa igoro, agachia agatigeria rigena riria, akariikaransera. 3Ekieni kiaye nigo kiarenge buna okomesa kw’embura, na eanga yaye nendabu buna amagena ’embura. 4Ase okomoiroka ere abarendi bakaiguswa, bakaba buna abanto bakure. 5Korende omomalaika agatebia abakungu baria, “Timoiroka inwe, ekiagera namanyire ng’a Yeso mokorigia, oria obambetwe. 6Tari aiga, ekiagera obokire, buna atebete. Inchuo, morigererie aase Omonene araire. 7Na genda bwango, motebie aborokigwa baye ng’a obokire korwa ase abakure; na rora, obatang’aneire kogenda Galili; agwo nao moramorore. Rora, inche nabatebirie ayio.” 8Bakaimoka korwa ase oboina bwango, bare nokoiroka na omogoko omonene, bakaminyoka, bakairera aborokigwa baye amang’ana. 9Na rora, Yeso akaumerana nabarabwo, akabakwania, “Masoge!” Na barabwo bagacha, bakamobwata amagoro, bakamosasima. 10Erio Yeso akabatebia, “Timoiroka! Genda motebie abaminto bagende Galili, nao barandore.”

11Kobakogenda, rora, abande b’abarendi baria bagasoa ase omochie, bagatebia abakuani abanene amang’ana onsi ayakoregete. 12Na ekero basangererekanire amo nabagaaka, na kobaroisirie amang’ana, bakaa abarendi baria chibesa chinyinge, 13bakabora, “Motebie abanto: Aborokigwa baye bachete botuko, bakamoiba ekero twararire. 14Ring’ana eri koriraigweke ase gavuna, intwe natoche tokwane nere, tomoebererie, na korusia inwe ase emechando.” 15Bakabogoria chibesa chiria, bagakora buna batebetigwe, na omogano oyo okumire ase Abayahudi goika rero iga.

Yeso okoorokera aborokigwa ikomi nomo agwo Galili

16Aborokigwa baria ikomi nomo bakagenda Galili, bagaika egetunwa keria Yeso abachigete. 17Ekero bachia komorora, bakamosasima; korende abande mbabete nogosiereria. 18Yeso agacha, akabatebia, “Naeirwe okobua gwonsi igoro na ense. 19Gaki genda mokore ebisaku bionsi koba aborokigwa, mokobabatisa ase erieta ria Tata, neri’Omwana, neri’Omoika Omochenu, 20mokoborokereria kobwata aya onsi nabachigete; na rora, inche nigo inde amo nainwe amatuko onsi goika omoerio bw’ense.”

Currently Selected:

MATAYO 28: EKEGUSIIBBLE

Highlight

Copy