MATAYO 22

Omoreng’anio bw’omoyega bw’enyangi

1Naende Yeso agakwana nabarabwo ase emereng’anio akabora, 2“Oboruoti bwa igoro nigo bogwekaine nomoruoti okorete omoyega bw’enyangi y’omwana oye. 3Agatoma abasomba baye batebie baria konya barangerigwe ase enyangi, korende barabwo bakaanga gocha. 4Naende agatoma abasomba bande, agateba: Motebie abarangerigwe: Rigereria, endagera yane naroisirie, chiombe chiane na ebinoru biane bianyenyirwe, na bionsi biabeire ang’e; inchuo ase omoyega bw’enyangi. 5Korende bagachaya amang’ana aya, bakagenda, oyomo ase omogondo oye, na oyonde ase oboonchoreria bwaye; 6na abatigarete bakabwata abasomba baye, bakabakora bobe bakabaita. 7Omoruoti oria akaba nendamwamu, agatoma emeganda y’abarwani, agasiria abaiti baria, na omochie obo akayosamba nomorero. 8Erio agatebia abasomba baye: Enyangi yabeire ang’e, korende abarangeretigwe tibagwenereti. 9Gaki, genda ase amatabekania e chinchera, bonsi aba moranyore mobarangerie gocha ase omoyega bw’enyangi. 10Abasomba baria bagasoka, bagaika ase chinchera, bagasangereria bonsi aba banyorete, ababe na abaya; igo enyomba y’enyangi egaichorwa nabageni.

11“Korende ekero omoruoti achia gosoa korigereria abageni, akarora omonto oyomo aroro otabegete eanga y’enyangi. 12Akamotebia: Mosani, naki gwakorete ogasoa aiga, na aye otari neanga y’enyangi? Agakira‐kiri. 13Erio omoruoti agatebia abakoreri: Moboe amaboko na amagoro, momotugute ase omosunte isiko; aroro abanto inababe nekerero na okoriania amaino. 14Naki abarangerigwe nabange, korende abachorirwe nabake.”

Riborio igoro y’okoa Kaisari ebango

(Mar 12:13–17; Luk 20:20–26)

15Erio Abafarisai bakagenda, bagakora ekina buna bagochia komotega ase amang’ana aye. 16Bagatoma aborokigwa babo asare, amo n’Abaherodiani, bakabora, “Omworokia, twamanyire ng’a nigo ore omonto bw’ekeene, na enchera ya Nyasae nigo okoyiorokereria ase ekeene, gose tori koyiera monto; ekiagera torengerereti obonene bw’abanto. 17Gaki totebie naki oroche aye? Mboronge komoa Kaisari ebango, gose taibo.” 18Korende Yeso, konya omanyire obong’ainereria bwabo, akabora, “Naki mogonteema, inwe abang’ainereria? 19Inyorokia ebesa y’ebango.” Bakamorentera ebesa. 20Yeso akababoria, “Ekieni eke na amariko aya nebia ng’o?” 21Bakamoiraneria, “Nebia Kaisari.” Erio akabatebia, “Nabo, ebire bia Kaisari moe Kaisari, na ebia Nyasae moe Nyasae.” 22Ekero bachia koigwa ring’ana riria, bagakumia; bakamotiga, bakagenda.

Riborio igoro y’okobokigwa

(Mar 12:18–27; Luk 20:27–40)

23Rituko riria Abasadukai bakamochiera, baria bakobora ng’a okobokigwa tikori, bakamoboria, 24bakobora, “Omworokia, Musa natebete: Omonto karakwe, na ere tari nabana, momura omwabo atware omoboraka oria, atenenerie momura omwabo egesaku. 25Bono mbarenge abamura ba ise omo batano na babere egati yaito. Oyo bwe ritang’ani akanyuoma, erio agakwa, na ekiagera atarenge nabana, agatigera momura omwabo mokaye. 26Naboigo noyo o kabere akamotwara, na oyo o gatato, goika bonsi batano na babere bakaera. 27Omoerio o bonsi omokungu oria nere agakwa. 28Inee! Ase okobokigwa, mokang’o arabe ase baria batano na babere? Naki bonsi mbamenyanete nere.”

29Korende Yeso akabairaneria, “Mwasirire inwe, ekiagera timomanyeti amariko, nonya nokobua kwa Nyasae. 30Naki ase okobokigwa tibakonyuoma gose tibakonyuomwa, korende nigo barabe buna abamalaika ba Nyasae bare igoro. 31Na ase okobokigwa kw’abakure timwana gosoma eri mwatebetigwe na Nyasae: 32Inche ninche Nyasae o Ibrahimu, na Nyasae o Isaka, na Nyasae o Yakobo? Ere tari Nyasae bw’abakure, korende Nyasae bw’abare moyo.” 33Ekero omoganda ochia koigwa aya, ogakumia ase okworokereria kwaye.

Riborio igoro y’ogochika kore okonene kobua ayande

(Mar 12:28–34)

34Korende Abafarisai, ekero bachia koigwa ng’a Yeso obakiririe Abasadukai, bagasangererekana amo. 35Oyomo ase barabwo, omonto bw’amachiko, akamoboria ase okomoteema, 36“Omworokia, ngochika ki kore okonene ase amachiko onsi?” 37Akamotebia, “Mwanche Omonene Nyasae oo nenkoro yao yonsi, na omoyo oo bwonsi, na obong’aini bwao bwonsi. 38Oko nakwo ogochika okonene, naende nakwo kwe ritang’ani. 39Nogwa kabere kogwekaine nokwo: Mwanche omogisangio oo buna bweanchete. 40Ase amachiko aya abere amachiko onsi na ababani naro atenenerete.”

Riborio igoro ya Masihi

(Mar 12:35–37; Luk 20:41–44)

41Abafarisai kobasangererekanire amo, Yeso akababoria, 42“Naki inwe mokorengereria ase Kristo? Nomwana o ng’o are?” Bakamoiraneria, “Nomwana o Daudi.” 43Akababoria, “Inki rende gekogera Daudi, akoraagwa n’Omoika, akamoroka Omonene, okobora:

44“Omonene agatebia Omonene one:

Ikaransa ensemo y’okoboko kwane gw’okorio,

goika mbeke ababisa bao babe inse y’amagoro ao?

45Gaki, onye Daudi okomoroka Omonene, naki rende aba omwana oye?” 46Onde tarenge ore konyara komoiraneria ing’ana; nonya nkorwa rituko riria monto onde tarenge na boremu komoboria maborio ande.

Currently Selected:

MATAYO 22: EKEGUSIIBBLE

Highlight

Copy