MATAYO 23

Yeso ogosoera aborokia b’amariko na Abafarisai

(Mar 12:38–40; Luk 11:37–54; 20:45–47)

1Naende Yeso agatebia emeganda na aborokigwa baye, 2“Aborokia b’amariko na Abafarisai baikaransire ase ekerogo kia Musa. 3Gaki, amang’ana onsi bakobatebia, moyanare na koyabwata; korende buna barabwo bagokora, timokora. 4Naki igo bakoboa chigurube chindito, bachitweka abanto ase amareko abo, korende barabwo abanyene tibari gwancha gochitigeria nekiara kiabo. 5Na ogokora kwabo gwonsi nigo bagokora ng’a barorwe nabanto; nigo bakogareyia ebitinti biabo birikire amariko, naende batambeyia emebarero y’ogochabera chianga chiabo. 6Naende nigo banchete aase e ritang’ani ase emeyega, na goikaransa aase e ritang’ani ase chisinagogi, 7na gokwanigwa ase chichiiro, na korokwa omworokia nabanto. 8Korende inwe timobaisa korokwa omworokia, ekiagera Omworokia oino noyomo, na inwe mwensi nabamo. 9Naende timobaisa koroka monto ase ense tata, ekiagera Iso oino noyomo, oyore igoro. 10Gose timobaisa korokwa abanene, ekiagera Omonene oino noyomo, nere Kristo. 11Nere oyore omonene mono kobua asemore, nigo arabe omokoreri oino, 12na oyo okweimokereria igoro nairanigwe inse, na ere oyokweirania inse naimokererigwe igoro.

13“Korende obobe nobwaino, aborokia b’amariko na Abafarisai, abang’ainereria! Ekiagera mwasiekeire abanto oboruoti bwa igoro; naki inwe abanyene timwasoa, nonya nabaare gosoa, timware kobaa ribaga basoe. [ 14Obobe nobwaino, aborokia b’amariko na Abafarisai, abang’ainereria! Ekiagera mokourereria chinyomba chi’ababoraka, na ase obong’ainereria mwasaba ogosaba ogotambe. Ase ayio, inamonyore ekina ekere ekenene kobua.] 15Obobe nobwaino, aborokia b’amariko na Abafarisai, abang’ainereria! Ekiagera nigo mogosiongorokana enyancha na ense enyomo konyora omotunyani oyomo, na ekero abeire omotunyani, mwagera oba omwana bw’omorero o kare na kare ara kabere kobua inwe abanyene.

16“Obobe nobwaino, abaraai emeuko, inwe abamogoteba: Onde bwensi kararie emuma ase Hekalu, tari gento, korende onde bwensi kararie emuma ase etahabu ye Hekalu, bwesibire nemuma yaye. 17Inwe abariri emeuko! Nkere ki kere ekenene kobua: netahabu, gose ne Hekalu egokora etahabu ebe enchenu? 18Inwe nigo mogoteba: Onde bwensi kararie emuma ase egesasimero tari gento; korende onde bwensi kararie emuma ase ekeng’wanso kere igoro ase egesasimero bwesibire nemuma yaye. 19Inwe emeuko! Nkere ki kere ekenene kobua: nesadaka, gose negesasimero kegokora esadaka ebe enchenu? 20Gaki, oyorarie emuma ase egesasimero nigo ararie ase ekio, na ase ebinto bionsi ebire igoro yaye. 21Na oyo orarie emuma ase Hekalu, nigo ararie ase eyio na ase oyo omenyete imeo. 22Na oyo orarie emuma ase igoro, nigo ararie ase ekerogo ki’obonene kia Nyasae na ase oyo ogeikaranserete.

23“Obobe nobwaino, aborokia b’amariko na Abafarisai, abang’ainereria! Ekiagera nigo mokorua ensemo ya ikomi ye chiarare, na ebinsari, ne chinyeni chinde, na mwatiga amang’ana ayare amanene ay’ogochika na oboronge, na amabera, na okwegena. Naro ayio nabagwenerete moyakore, amo na gotatiga ayande. 24Inwe abaraai emeuko, mwakenonora egechuni, mwamera engamia!

25“Obobe nobwaino, aborokia b’amariko na Abafarisai, abang’ainereria! Ekiagera nigo mogosibia egekombe na esani korwa isiko, korende ime biaichoire nobouri na okogania gotari nekerengo. 26Aye Omofarisai omouko! Sibia ritang’ani egekombe na esani ime, erio nonya nisiko binyare koba ebirabu.

27“Obobe nobwaino, aborokia b’amariko na Abafarisai, abang’ainereria! Ekiagera nigo mogwekaine nechimbeera chiakire echooka; na chirochio isiko chirorekana ng’a nechingiya, korende ime nigo chiichire namauga ’ebitondo, na euramba yonsi. 28Nainwe nabo more, isiko mwarorekana ase abanto ng’a nabaronge more, korende ime yaino mwaichoirwe nobong’ainereria na ebibe ebinge.

29“Obobe nobwaino, aborokia b’amariko na Abafarisai, abang’ainereria! Ekiagera nigo mokoagacha chimbeera chi’ababani, na koroisia chimbeera chi’abaronge, 30mogoteba: Onye ntwarengeo kare ase amatuko e chisokoro chiaito, anga titwabwatanete nabarabwo ase ogoitera amanyinga ’ababani. 31Igo mwetebire inwe abanyene, ng’a inwe nabana babo more, baria baitete ababani. 32Gaki bono, ichoria ekerengo gie chisokoro chiaino. 33Inwe ching’iti, oroiboro rw’amarubi, naki morakore motame ekina ki’omorero o kare na kare. 34Ase ayio natomire ababani asemore, na abanto abang’aini, na aborokia b’amariko; abande babo inamobaite na kobabamba, na abande babo inamobang’wanie emecharichi ase chisinagogi chiaino, na kobachanda omochie ase omochie. 35Erio nario arabachere amanyinga onsi ayaboronge ayaitegete ase ense, korwa amanyinga ’Abeli, oria omonyene oboronge, goika amanyinga a Zakaria, omwana o Barakia, oria mwaiterete gati ye Hekalu na egesasimero. 36Ekeene nabatebirie ng’a amang’ana aya onsi nache igoro ase ekegori eke.

Yeso ogwechandera omochie o Yerusalemu ase aya agochia koyochera

(Luk 13:34–35)

37“Aye Yerusalemu, Yerusalemu, aye ogoita ababani na kobaaka amagena abatomirwe asore! Ng’ara karenga narigirie gosangereria abana bao, buna engoko egosangereria ebionuchu biaye ase chimbaba chiaye ime, korende timwancha! 38Rora, enyomba yaino mwatigeirwe ritombe. 39Na inche nabatebirie, timokondora naende nonya ng’ake goika ekero keria morache goteba: Nasesenirie oyogocha ase erieta ri’Omonene.”

Currently Selected:

MATAYO 23: EKEGUSIIBBLE

Highlight

Copy