MATAYO 21

Yeso ogochengerwa kagosoa Yerusalemu

(Mar 11:1–11; Luk 19:28–40; Yoh 12:12–19)

1Ekero bachia goika ang’e na Yerusalemu, bagaika Betifage, ase egetunwa ki’Emezeituni. Erio Yeso agatoma aborokigwa baye babere, 2akabatebia, “Genda ase agachie karia mokoorokera, erio kegima namorore etigere esibire, na emori yaye amo nero; mochisibore mochindetere. 3Na omonto karabatebie ring’ana, momotebie: Omonene nachiganetie; erio kegima nachitome.” 4Aya onsi agakoreka, erinde anyare goikeranigwa ayatebetwe nomobani, ogoteba,

5“Tebia abanto ba Sayoni,

Rigereria, Omoruoti oino okobachera are,

nomokanyeku, oriinire etigere,

nase emori y’etigere, akamori g’etigere.”

6Aborokigwa bakagenda, bagakora buna Yeso abachigete. 7Bakamorentera etigere amo nemori yaye, bakaara chianga chiabo igoro ya chirochio, na Yeso akayeriina. 8Na abange b’emeganda bakaara chianga chiabo inchera; abande bakanacha chinsagia chi’emete bagachiaara nchera. 9Emeganda eria yatang’aine, na eyare komotunyana, bagaaka eriogi, bagateba, “Hosana ase Omwana o Daudi! Nasesenirie oyio ogocha ase erieta ri’Omonene! Hosana, aye ore igoro!” 10Ekero achia gosoa Yerusalemu, omochie omogima ogaseega‐seega, abanto bakaboria, “Ning’o oyio?” 11Emeganda ekairaneria, “Oyio nere Yeso, omobani o Nazareti o Galili.”

Yeso ogochena Hekalu

(Mar 11:15–19; Luk 19:45–48; Yoh 2:13–22)

12Erio Yeso agasoa ase Hekalu ya Nyasae, akabasokia isiko bonsi abarenge koonia na kogora ime ase Hekalu, akaonchorana chimesa chi’abaare koonchoreria chibesa, na ebirogo bi’abaare koonia amaruma. 13Akabatebia, “Nerikire: Enyomba yane nerokwe enyomba y’ogosaba, na inwe mwayekorire koba ribwago ri’abauri.”

14Emeuko na amagata bakamochiera aria ase Hekalu, na ere akabagwenia. 15Korende abakuani abanene na aborokia b’amariko bakabea, ekero bachia korora ebirage bi’ogokumia akorete, na abana bagoaka eriogi ase Hekalu ime, bakobora, “Hosana ase Omwana o Daudi!” 16Bakamoboria, “Kwaigure abana buna bakobora?” Yeso akabatebia, “Ee; timwana gosoma:

“Nase emenwa y’abana na ey’abakogonka

kwarentire ogotogia ogoikeranu?”

17Akabatiga, agasoka korwa ase omochie, akagenda Bethania, akarara aroro.

Omoko omogomba

(Mar 11:12–14,20–26)

18Mambia gakoirana omochie, akaigwa enchara. 19Akarora omoko oyomo ase enchera ensemo, akayochiera, tarora gento asoro otatiga amato oka. Akayotebia, “Korwa bono tokwama amatunda nonya ndinde.” Erio kegima omoko oyio okoma. 20Ekero aborokigwa bachia korora ogokora oko, bagakumia, bakaboria, “Naki bono omoko oyo bwoma bwango iga?” 21Yeso akabairaneria, “Nekeene nabatebirie; Komorabe nokwegena motabeti na gosiereria konde, tari erio ri’omote rioka morakore, korende nonya namotebie egetunwa eke: Tegoka, otugutwe enyancha ime, narikoreke. 22Kende gionsi moraborie ase ogosaba, komoregene namokenyore.”

Riborio igoro y’okobua kwa Yeso

(Mar 11:27–33; Luk 20:1–8)

23Ekero achia gosoa Hekalu ime na kworokereria, agachierwa nabakuani abanene na abagaaka b’abanto, bakamoboria, “Nase okobua ki ogokora amang’ana aya? Ning’o okoete okobua oko?” 24Yeso akabairaneria, “Nainche boigo nimbaborie ring’ana erimo, komorang’iranerie, nainche boigo nimbatebie nase okobua ki ngokora aya. 25Inee! Ebatiso ya Yohana, ng’ai yarwete? Igoro yarwete, gose nase mwanyabanto?” Bagatebania barabwo ase barabwo, bakabora, “Toise goteba: Nigoro yarwete, igo aratoborie: Naki rende motamwegenete? 26Naende toise goteba: Nase mwanyabanto yarwete, nkoiroka tore omoganda, ekiagera abanto bonsi banchete ng’a Yohana nomobani orenge.” 27Bakamoiraneria, “Titomanyeti.” Ere akabatebia, “Nonya ninche tinkobatebia inwe nase okobua ki ngokorera aya.

Omoreng’anio bw’abana babere abamura

28“Naki moroche? Omonto gete narenge nabana babere abamura. Akamochiera oria bwe ritang’ani, akamotebia: Omwana one, genda rero okore emeremo ase omogondo bw’emesabibu. 29Akamoiraneria: Tindigeti kogenda, korende nyuma yaye akaonchoka, akagenda. 30Akamochiera oyo okabere, akamotebia boigo. Nere akamoiraneria: Nkogenda inde, omonene; go tagenda. 31Inee! Norori ase baria babere okorete ogwancha gwa ise?” Bakabora, “Noria bwe ritang’ani.” Yeso akabatebia, “Nekeene nabatebirie ng’a abarusia ebango na abakungu abatayayi nkobatang’anera bare gosoa ase oboruoti bwa Nyasae. 32Naki Yohana achete asemore ase enchera y’oboronge, timwamwegena; korende abarusia ebango na abakungu abatayayi bakamwegena; na inwe nonya nekero mwaroche ayio, timwaonchoka na komwegena.

Omoreng’anio bw’omogondo bw’emesabibu

(Mar 12:1–12; Luk 20:9–19)

33“Tegerera omoreng’anio onde. Narenge omonto orenge nenyomba; ere akarema omogondo, agasimeka emesabibu imeo, akayoetananeria orobago, agakunya ime aroro egetera akomitera amasabibu, akaagacha orwaki, akaywatananera abaremi, akagenda orogendo. 34Ekero engaki y’amatunda yachia goika ang’e, agatoma abasomba baye ase abaremi, banyore amatunda aye. 35Abaremi bakabwata abasomba baye, oyomo bakamoaka, oyonde bakamoita, na oyonde bakamoaka amagena. 36Naende agatoma abasomba bande, abange kobua baria be ritang’ani; bakabakora boigo. 37Nyuma y’ayio agatoma omwana oye asebare, ogoteba: Inabasike omwana one. 38Korende abaremi baria, ekero bachia korora omwana oria, bagatebania barabwo ase barabwo: Oyo nere omonyamwando; gaki tomoite, omwando oye toyoire. 39Bakamobwata, bakamotuguta isiko korwa ase omogondo bw’emesabibu, bakamoita. 40Inee! Karache omonyene omogondo, naki arakore abaremi baria?” 41Bakamotebia, “Igo araite ababe baria ogoita okobe, na aatananere abaremi bande omogondo oria bw’emesabibu, abarache komoa amatunda ekero amire.”

42Yeso akabatebia, “Timwana gosoma ase amariko:

“Rigena riria abaagachi bangete

riabeire rigena rinene ri’ekoona.

Ring’ana eri nigo riarure ase Omonene,

na rirorio nogokumia ase amaiso aito?

43Ase engencho eye nabatebirie, ng’a oboruoti bwa Nyasae naborusigwe asemore, boegwe egesaku egekwama amatunda aye. [ 44Oyoragwe igoro ase rigena eri nabunanekane, na ere oyo rigena riria riragwere inarimosenyente.]”

45Ekero bachia koigwa emereng’anio yaye, abakuani abanene na Abafarisai bakamanya ng’a nabwo agoteba. 46Korende ekero bachia korigia komobwata, bakairoka emeganda, ekiagera abanto konya banchire ng’a nomobani are.

Currently Selected:

MATAYO 21: EKEGUSIIBBLE

Highlight

Copy