MATAYO 20

Omoreng’anio bw’abaremi ase omogondo bw’emesabibu

1“Naki oboruoti bwa igoro nigo bogwekaine nomonto omonyene enyomba oyosogete mambia chuni kogenda korika abaremi ase omogondo oye bw’emesabibu. 2Gachia gwancherana nabaremi rituko erimo edinari eyemo, akabaira ase omogondo oye bw’emesabibu. 3Agasoka chinsa isato, akarora abande bateneine echiiro, batari nemeremo, 4akabatebia nabarabwo: Genda nainwe ase omogondo one bw’emesabibu na inche nimbae ekere kia boronge. Bakagenda. 5Agasoka naende chinsa isano nemo, ne chinsa kianda, agakora boigo. 6Goika chinsa ikomi nemo agasoka, akarora abande bateneine, akabatebia nabarabwo: Ninki mwatenenera aa bwaira, motari nemeremo? 7Bakamotebia: Ekiagera titorikiri na monto. Akabatebia: Genda nainwe boigo ase omogondo one bw’emesabibu. 8Ekero riagorobire, omonyene omogondo agatebia omorendi oye: Rangeria abaremi, obae eng’eria yabo, ochakere korwa abanyuma goika abe ritang’ani. 9Ekero baria barigetwe chinsa ikomi nemo bachete, bakanyora kera oyomo edinari eyemo. 10Bono ekero abe ritang’ani bacha, bagakaga ng’a barabwo nabaegwe kobua abande, bakanyora nabarabwo kera oyomo edinari eyemo. 11Erio kabaeirwe, bakaba nkwemurungania bare ase omonyene enyomba, 12bakabora: Abwo ba nyuma nigo bakora emeremo y’ensa eyemo yoka, na aye kwabatoreng’aneria naintwe abatwaremereretie emechando ne riberera ri’omobaso bwonsi. 13Ere akairaneria oyomo obo: Omosani, tingokorereti bobe. Titwancheranete naye ase edinari eyemo? 14Bwata ekere ekiao, ogende; nindigetie koa oyo o nyuma koreng’ana naye. 15Inee! Tindi neribaga gokora buna ndigetie omonyene nebinto biane? Gose naki okorigereria neriso riibe, ekiagera inche inde omuya? 16Naboigo abanyuma inababe abe ritang’ani, na abe ritang’ani inababe abanyuma.”

Obobani bwa gatato bwa Yeso igoro y’ogokwa kwaye

(Mar 10:32–34; Luk 18:31–34)

17Na Yeso, ekero arenge gotiira gochia Yerusalemu, akabaira ensemo aborokigwa baye ikomi na babere. 18Kobare inchera, akabatebia, “Rora, ngotiira tore gochia Yerusalemu, na Omwana‐o‐mwanyabanto nabekwe ase amaboko ’abakuani abanene na aborokia b’amariko, na barabwo nabamogambie akwe, 19naende nabamobeke ase amaboko ’abanto b’Ebisaku; nakorerwe echeche, naende naakwe emecharichi na kobambwa; na ase rituko ria gatato nabokigwe.”

Okoboria koegwa ogosika gw’ense eye

(Mar 10:35–40)

20Erio ng’ina abana ba Zebedi akamochiera amo nabana baye, akamotung’amera na komosaba ring’ana. 21Yeso akamoboria, “Inki origetie?” Akamoiraneria, “Chika ng’a abana baane babere baikaranse, oyomo ensemo y’okoboko kwao gw’okorio, na oyomo ensemo y’okoboko kwao gw’okobee ase oboruoti bwao.” 22Yeso akairaneria, “Inwe timomanyeti eri mogosaba. Inee! Namonyare konywera egekombe ndache konywera inche?” Bakamotebia, “Natonyare.” 23Akabatebia, “Egekombe nkonywera inche, namokenywere, korende ribaga ri’ogoikaransa ensemo y’okoboko kwane gw’okorio na ensemo y’okoboko kwane gw’okobee, tindi nokobua gw’okobaa, otatiga abwo bagacheire na Tata one nabwo barariegwe.”

Obonene bw’ekeene

(Mar 10:41–45)

24Ekero baria ikomi bachia koigwa aya, bakabea ase abamura baria babere ba ise omo. 25Korende Yeso akabarangeria bache asare, akabora, “Mwamanyire ng’a abagambi b’Ebisaku bakogambera abanto, na abanene babo nigo bare nokobua igoro asebare. 26Korende ayio takoba bo asemore inwe, korende oyorarigie koba omonene asemore goika abe omokoreri oino; 27na oyorarigie koba omotang’ani asemore, goika abe omosomba oino, 28buna Omwana‐o‐mwanyabanto atachete gokorerwa, korende gokorera, na korua obogima bwaye, erinde bobe embooria y’abange.”

Abanto babere emeuko bakoramokigwa

(Mar 10:46–52; Luk 18:35–43)

29Ekero baare korua Yeriko, omoganda omonene okamotunyana. 30Rora, abanto babere emeuko baikaransete ase enchera ensemo, na ekero bachia koigwa ng’a Yeso ogoeta, bagaaka eriogi, bakabora, “Tororere amabera, aye omwana o Daudi!” 31Omoganda oria okabatogonyera ng’a banyare gokira, korende bakamenta kwoga eriogi, bakabora, “Omonene, tororere amabera, aye Omwana o Daudi.” 32Yeso agatenena, akabarangeria, akababoria, “Ninki morigetie mbakorere?” 33Bakamoiraneria, “Omonene, otoramokie amaiso aito.” 34Yeso agasogwa namabera, agakuna amaiso abo. Erio kegima bakaba nkorora bare, bakamotunyana.

Currently Selected:

MATAYO 20: EKEGUSIIBBLE

Highlight

Copy