MATAYO 19

Riborio igoro y’ogotigana

(Mar 10:1–12; Luk 16:18)

1Ekero Yeso achia gokoora amang’ana ayio, akarua Galili, agasoa ensemo ya Boyahudi ng’umbu ya Yorodan; 2na emeganda emenene ekamotunyana, akabagwenia aroro.

3Abafarisai bakamochiera, bakamoteema ase okomoboria, “Inee! Mboronge omonto atige mokaye ase ring’ana rinde rionsi?” 4Akabairaneria, “Timwana gosoma buna ere oyobatongete korwa omochakano, nere obatongete omosacha na omokungu, 5agateba: Ase engencho eyio omonto natige ise na ng’ina, abwatane na mokaye, na abwo babere nigo barabe omobere oyomo? 6Ase igo tibakoba babere naende, korende omobere oyomo. Naboigo, ebi Nyasae abwatanirie, mwanyabanto tabiatanana.” 7Bakamoboria, “Nase ki rende Musa achigete komoa omokungu rirube ri’ogotigana, nakomotiga?” 8Akabatebia, “Nase engencho y’obokong’u bwe chinkoro chiaino Musa abaerete ribaga gotiga abakungu baino, korende korwa omochakano ayio tarenge bo. 9Korende inche nabatebirie, oyoratige mokaye, otatiga ase engencho y’obotomani, na konyuoma oyonde, oyio otomanire; naende oyoranyuome omokungu oyotigirwe, otomanire.”

10Aborokigwa bakamotebia, “Amang’ana igoro y’omonto na mokaye karabe engencho eye, tegwenereti konyuoma.” 11Korende akabatebia, “Tari bonsi baranyare gwancha ring’ana eri, otatiga abwo baeirwe. 12Naki mbare abagomba abaiboretwe bo, naende mbare abagomba aba abanto bagombaetie, naende mbare abagomba abekorete abanyene koba abagomba ase engencho y’oboruoti bwa igoro. Oyoranyare gwancha ring’ana eri, tiga arianche.”

Yeso ogosesenia abana abake

(Mar 10:13–16; Luk 18:15–17)

13Erio abana abake bakarentwa asare, erinde ababekere amaboko aye na kobasabera. Aborokigwa baye bagatanga abanto, 14korende Yeso agateba, “Batige abana bache asende, timobaisa kobatanga, ekiagera abare buna aba, oboruoti bwa igoro nobwabo.” 15Akababekera amaboko aye, akaimoka korwa aroro, akagenda.

Omomura omonda okorigia obogima bwa kare na kare

(Mar 10:17–22; Luk 18:18–23)

16Na rora, omonto oyomo akamochiera, akamoboria, “Omworokia ngokora ki okuya ndakore nyore obogima bwa kare na kare?” 17Akamotebia, “Nase ki okomboria ninki kere ekiya? Oyomo nareo oyore omuya. Onye korigetie gosoa ase obogima, bwata amachiko.” 18Akamoboria, “Ayare buna arari?” Yeso akamoiraneria, “Toita, Totomana, Toiba, Toteba oborimo, 19sika iso na nyoko; naende: Ancha omogisangio oo buna bweanchete.” 20Omomura oria akamotebia, “Ayio onsi nayabwatire; ing’ana ki rimochete?” 21Yeso akamotebia, “Onye korigetie koba omoikeranu, gachie, oonie ebio ore nabio bionsi, oe abataka, na aye nobe nenibo igoro; erio oche ontunyane.” 22Ekero achia koigwa ring’ana riria, omomura oria akagenda nobororo, ekiagera arenge nenibo enyinge.

Obobe bw’obotenenku

(Mar 10:23–31; Luk 18:24–30)

23Yeso agatebia aborokigwa baye, “Nekeene nabatebirie: Nabe aakong’u ase omonto omonda gosoa ase oboruoti bwa igoro. 24Naende nabatebirie inwe, naororo engamia goeta ase ekebao gi’esindani, kobua omonto omonda gosoa ase oboruoti bwa Nyasae.” 25Ekero aborokigwa bachia koigwa aya, bagakumia mono, bagateba, “Ning’o rende oranyare gotooreka?” 26Korende Yeso akabarigereria, akabatebia, “Ase mwanyabanto takonyarekana, korende ase Nyasae onsi nigo akonyarekana.” 27Erio Petero akamoiraneria, “Rora, intwe twatigire bionsi, twagotunyanire, inki rende toranyore?” 28Yeso akabatebia, “Nekeene nabatebirie: Ase ense enyia, ekero Omwana‐o‐mwanyabanto agochi‐gocha goikaransa ase ekerogo kiaye ki’obonene, inwe abamwantunyanire namoche goikaransera ebirogo bi’obonene ikomi na bibere, mokogambera ebisaku ikomi na bibere bi’Abaisraeli. 29Na onde bwensi otigete chinyomba, gose bamura bamwabo, gose basubati bamwabo, gose ise, gose ng’ina, gose abana, gose emegondo ase engencho y’erieta riane, namenteranigwe ara rigana, na obogima bwa kare na kare nabonyore. 30Korende abange abare abe ritang’ani inababe abanyuma, na abanyuma inababe abe ritang’ani.

Currently Selected:

MATAYO 19: EKEGUSIIBBLE

Highlight

Copy