MATAYO 18

Okworokereria igoro y’oboitongo

(Mar 9:33–37; Luk 9:46–48)

1Ase engaki eria aborokigwa bagacha ase Yeso, bakamoboria, “Ning’o ore omonene kobua abande ase oboruoti bwa igoro?” 2Akarangeria omwana, akamobeka gati‐gati yabo, 3akabora, “Ekeene nabatebirie: Motaonchogeti mobe buna abana, timogosoa ase oboruoti bwa igoro nonya ng’ake. 4Gaki, onde bwensi oyo orekeyie omonyene koba buna omwana oyo, oyio nere ore omonene kobua abande ase oboruoti bwa igoro.

5“Onde bwensi oramwanche omwana oyomo buna oyo ase erieta riane, oyio onyanchire inche.

Ogokurera kw’ogotatanga abande

(Mar 9:42–48; Luk 17:1–2)

6“Oyo oragere oyomo bw’aba abake, abanyegenete, akore ebibe, anga mbuya kobua ase omonto oria asungerwe orogena rogosia ase rigoti riaye, arutwe ase endiba y’enyancha.

7“Obobe nobw’ense ase engencho y’amateemwa ayakorenta ebibe! Naki amateemwa takomocha kobao, korende obobe nobwaye omonto oyio okorenta ogoteemwa! 8Na onye okoboko kwao gokogera okore ebibe, gose nokogoro kwao, konache, ogotugute are; mbuya asore osoe ase obogima kore omonungu, gose egesegora, kobua koba namaboko abere, na amagoro abere, na gotugutwa ase omorero o kare na kare. 9Onye neriso riao rikogera okore ebibe, orirusie, oritugute are; mbuya asore osoe ase obogima kore egetong’o kobua koba namaiso abere na gotugutwa ase omorero o kare na kare.

10“Rigereria, timobaisa gochaya oyomo bw’aba abake; naki nabatebirie inwe, nonya nabamalaika babo igoro tibagotiga korora obosio bwa Tata one ore igoro. [ 11Naki Omwana‐o‐mwanya banto nigo achete gotooria egiasirete.]

Omoreng’anio bw’eng’ondi ensiru

(Luk 15:3–7)

12“Inki mokorengereria? Omonto, onye ore ne ching’ondi rigana erimo, na eyemo kerasire, Inee, tagotiga chiria emerongo kianda na kianda ase ebitunwa, achie korigia eria yasirire? 13Kayenyorire, nekeene nabatebirie: Nagoke ase eria kobua ase chiria emerongo kianda na kianda chitasirete. 14Naboigo, tari ogwancha gwa Tata one ore igoro ng’a oyomo bw’aba abake asire.

Buna orakore ase oyo okorire bobe

(Luk 17:3)

15“Oyomino karakore ebibe, genda omotebie okomocha kwaye, aye nere, inwe mweka. Karakoigwere, igo kwamonyorire. 16Korende atakoigwereti, ira omonto oyomo, gose babere, mogende asare mwensi, ng’a kera ring’ana rinyare gwancheranwa ase abarori babere gose batato. 17Ere atabaigwereti abwo, tebia ekanisa; naende ataigwereti ekanisa nero, asore aye tiga abe buna omonto bw’Ebisaku, na buna omorusia ebango. 18Nekeene nabatebirie: Ande onsi morasibe ase ense, nabe asibirwe na igoro; na ande onsi morasibore ase ense, nabe asiboirwe na igoro.

Ogosaba kw’obomo

19“Naende nabatebirie: Onye babere asemore bagwancherana ase ense igoro ya ing’ana rinde rionsi barasabe, inabakorerwe rirorio na Tata one ore igoro. 20Naki asebare babere gose batato basangererekanire ase erieta riane, nainche nao inde agwo gati‐gati yabo.”

Buna ogwenerete kwabera, na omoreng’anio bw’omosomba otari koiraneria ng’a mbuya mono

(Luk 17:4)

21Erio Petero agacha, akamoboria, “Omonene, ng’ara karenga oyominto arankorere ebibe, na inche mwabere? Goika chintunda isano na ibere gose?” 22Yeso akamotebia, “Tingotebeti komwabera chintunda isano na ibere, mwabere nonya ne chintunda isano na ibere ara emerongo etano na ebere.

23“Ase ayio, oboruoti bwa igoro nigo bogwekaine nomoruoti origetie gokora omobaro nabasomba baye. 24Ekero achakire gokora omobaro akarenterwa omosomba oyomo omoriete chitalanta chilifu ikomi. 25Ekero asinyetwe goakana, omonene oye agachika aoonigwe, ere na mokaye, na abana baye, na ebiabwate bionsi, na esira eria eakanwe. 26Omosomba oria akagwa inse, akamosorora, agateba: Omonene, ing’ira ng’ora, na inche ningoakane bionsi. 27Omonene bw’omosomba oria agasogwa namabera, akamosibora, akamwabera ase esira yaye. 28Korende omosomba oyio, ekero achia korua aroro, akarora ase abasomba bande oyomo omoriete chidinari rigana erimo, akamobwata emioyo, akabora: Ng’akane ebi kwariete. 29Omosomba oria agatung’ama inse, akamosorora, agateba: Ing’ira ng’ora, na inche ningoakane. 30Akaanga, agachia akamoruta echela ime goika aakane esira eria. 31Ekero abasomba bande bachia korora aya akoreka, bagaichana mono, bakagenda, bagatebia omonene obo onsi ayakorekire. 32Erio omonene oye akamorangeria, akamotebia: Aye omosomba omobe! Inche ngakwabera esira yonsi, ekiagera gwansororete. 33Inee! Aye tikwagwenerete kwabera omosomba oria onde, buna nainche nakwaberete? 34Omonene oye akabea mono, akamobeka ase abarendi b’echela, goika aakane ebi ariete bionsi. 35Naboigo na Tata one ore igoro arabakorere nainwe, onye timokwabera abamino ase chinkoro chiaino ime.”

Currently Selected:

MATAYO 18: EKEGUSIIBBLE

Highlight

Copy