MATAYO 17

Okoonchoka ekieni kwa Yeso

(Mar 9:2–13; Luk 9:28–36)

1Na nyuma ase amatuko atano na rimo Yeso akaira Petero, na Yakobo, na Yohana momura omwabo Yakobo, akabaira igoro ase egetunwa egetambe barabwo boka. 2Akaonchoka ekieni kiaye asebare, obosio bwaye bokagirigenta buna erioba, ne chianga chiaye chikaraba buna omobaso. 3Na rora, Musa na Elija bakabaorokera, bagakwana nere. 4Petero agatebia Yeso, “Omworokia, mbuya intwe koba aiga; onye ngwancha, ninkore aiga ebigutu bitato, ekemo ekiao, ekemo ekia Musa, na ekemo eki’Elija.” 5Ekero arenge gokwana, rora, riire rirabu rikababisia, na eriogi rikarwa ase riire riria, rigateba, “Oyo n’Omwana one omwanchwa, ngokirie nere; moigwere ere.” 6Ekero aborokigwa bachia koigwa aya, bakagwa inse maumama, bakabwatwa nomoondoko omonene. 7Korende Yeso agacha akabakuna, akabora, “Imoka, timobaisa kwoboa.” 8Ekero bachia koimokia amaiso abo, tibarora monto otatiga Yeso bweka.

9Kobagotirimboka korwa ase egetunwa, Yeso akabachika, akabora, “Timotebia monto onde okorora oko goika Omwana‐o‐mwanyabanto aboke korwa ase abakure.” 10Aborokigwa baye bakamoboria, “Nase ki rende aborokia b’amariko bagoteba ng’a negwenerete Elija ache ritang’ani?” 11Yeso akairaneria, “Nekeene, n’Elija ore gocha ritang’ani, na ere naroisie onsi. 12Korende nabatebirie ng’a Elija oikire gocha; na barabwo tibamomanyete, korende bakamokorera onsi aya barigetie. Naboigo n’Omwana‐o‐mwanyabanto nachie konyora emechando ase amaboko abo.” 13Erio aborokigwa baye bakamanya ng’a Yohana Omobatisi nere are kobatebia.

Okogwenigwa kw’omomura obwatire nekerecha

(Mar 9:14–29; Luk 9:37–43)

14Ekero bachia goika ase omoganda, omonto oyomo akamochiera agwo, akamotung’amera, akabora, 15“Omonene, ororere omomura one amabera, ekiagera nare nendurume, nigo achandegete mono. Naki ere, kero kende nigo akogwa ase omorero ime, na kero kende ase amache ime. 16Nkamorenta ase aborokigwa bao, tibanyara komogwenia.” 17Yeso akairaneria, “Inwe ekegori getari nokwegena, naende ekebe, nimbe amo nainwe goika ririri? Nindemererie nainwe goika ririri? Mondetere aiga.” 18Yeso agatogonyera ekerecha, na kerokio kegatiga omwana oria na ere akagwenigwa ekero keria. 19Erio aborokigwa bagachiera Yeso bobisi, bakabora, “Ninki kiagera intwe totanyara korusia ekerecha keria?” 20Akabatebia, “Nase engencho y’okwegena kwaino kore ogoke. Ekeene nabatebirie: Moise koba nokwegena koreng’aine buna entetere y’omote onga buna omosabisabi, namotebie egetunwa eke: Karue agwo, ogende aaria, na kerokio nakeruo, tirikoba ring’ana ritanyarekane asemore. [ 21Korende ekerecha kenga buna eke tikegosoka otatiga ase ogosaba na okweng’ata.”]

Obobani bwa kabere bwa Yeso igoro y’ogokwa kwaye

(Mar 9:30–32; Luk 9:43–45)

22Rigoro basangererekanete Galili, Yeso akabatebia, “Omwana‐o‐mwanyabanto ngochia are kobekwa ase amaboko ’abanto. 23Barabwo inabamoite, ne rituko ria gatato naboke.” Bagaichana mono.

Yeso ogoakana ebango ye Hekalu

24Kobaikire Kapernaumu, abaare kobanga ebango ye Hekalu bagachiera Petero, bakamoboria, “Inee! Omworokia oino nkorua are ebango?” 25Akabairaneria, “Ee, nkorua are.” Goika agasoa nyomba, Yeso agatang’ana gokwana na Petero, akamoboria, “Inki okorengereria Simion? Abaruoti b’ense nigo bakorusia ebango na ogochoga korwa ase ng’o? Nkorwa ase abana babo, gose nase abanto bande?” 26Na ekero Petero amoiraneria, “Nkorwa ase abande,” Yeso akamotebia, “Rirorio abana babo barabwo nabasibore. 27Korende titobaisa kobagechia, genda nyancha orute endobio na enswe erache ritang’ani oyebwate; na ekero okoyiasamia omonwa oye norore eropia ereo, oyerusie, obae abwo ase engencho yane amo naye.”

Currently Selected:

MATAYO 17: EKEGUSIIBBLE

Highlight

Copy