MATAYO 2
2
Abanto abang’aini bagochia gokwania Yeso
1Ekero Yeso aiboretwe aria Bethlehemu ya Boyahudi ase amatuko ’omoruoti Herode, rora, abanto abang’aini bakarwa ensemo ya moocha, bagacha Yerusalemu, bakaboria, 2“Ng’ai are oria oiborwa omoruoti bw’Abayahudi? Ekiagera eng’enang’eni yaye ntwayeroche moocha; nigo twachire komosasima.” 3Ekero omoruoti Herode achia koigwa aya agaichanigwa, na Yerusalemu yonsi amo nere. 4Erio kabasangereirie abakuani abanene na aborokia b’amariko, akababoria, “Ng’ai Kristo agocha koiborerwa?” 5Barabwo bakamoiraneria, “Nase Bethlehemu ya Boyahudi, ekiagera nabo yarigetwe nomobani,
6“Naye Bethlehemu, ase ense ya Yuda,
tori moke ase egati y’abanene ba Yuda,
naki korwa asore aye nache omogambi
orache koba Omorisia bw’abanto baane Abaisraeli.”
7Erio Herode akarangeria abanto baria abang’aini bobisi, akarigia asebare ekeene nkero ki eng’enang’eni eria yarorekanete. 8Akabatoma goika Bethlehemu, akabatebia “Genda morigie mono omwana oyio; kamoramonyore moche gontebia, nainche boigo ngende komosasima.” 9Bagachia koigwa amang’ana ’omoruoti, bakagenda; na rora, eng’enang’eni eria baroche moocha ekabatang’ana, goika egatenena igoro aase omwana oria arenge. 10Ekero barora eng’enang’eni eria, bagaichorwa nomogoko omonene mono. 11Bagachia gosoa nyomba bakarora omwana amo na Mariamu ng’ina, bagatung’ama inse, bakamosasima; bagakunora chinibo chiabo, bakamokwaneria ebinto ebiya, etahabu, na ubani, na manemane. 12Erio kabakureirwe na Nyasae ase chindoto, tibairanera ase Herode, bakabwatia enchera eng’ao, bakagenda sobo.
Ogotamigwa kw’Omwana gochia Misiri
13Ekero abanto baria bamanoire kogenda, rora, omomalaika bw’Omonene akaorokera Yusufu ase chindoto, akamotebia, “Imoka korwa aa, oire omwana na ng’ina, otame gochia Misiri, omenye aroro goika ngotebie, ekiagera Herode narigie omwana oyo anyare komoita.” 14Ere akaimoka botuko, akaira omwana oria na ng’ina, akagenda Misiri, 15akamenya aroro goika Herode agakwa, erinde rinyare goikerana eriatebetwe n’Omonene ase omonwa bw’omobani, “Korwa Misiri nkarangeria omwana one.”
Herode ogoita abana ba Bethlehemu
16Ekero Herode achia korora ng’a ochayirwe nabanto baria abang’ani, akaba nekeririanda ekenene mono, agatoma abanto goita abana abaisia bonsi abarenge Bethlehemu ne chinsemo chiaye chionsi, abakoorire emiaka ebere na abatarakoora emiaka ebere, koreng’ana nekero keria atebetigwe nabanto baria abang’aini. 17Ekero ekio rigaikerana eriatebetwe nomobani Yeremia,
18“Eriogi riaigurwe Rama, okorera na okweumia.
Raeli nkoreera are abana baye,
tancheti akirigwe, ekiagera tibaiyo.”
Okoiranigwa kw’Omwana korwa Misiri
19Ekero Herode akure, rora, omomalaika bw’Omonene akaorokera Yusufu aria Misiri ase chindoto, akamotebia, 20“Imoka, oire omwana na ng’ina, mogende ase ense ya Israeli, ekiagera baria barenge korigia obogima bw’omwana bakure.” 21Akaimoka, akaira omwana amo na ng’ina, akagenda ase ense ya Israeli. 22Korende agachia koigwa ng’a Arikelau obekirwe oboruoti Boyahudi ase ribaga ria Herode ise, akaba nokoiroka ase okogenda aroro, korende erio gakureirwe na Nyasae ase okorota, akagenda ensemo ya Galili. 23Akagenda, akamenya omochie oyomo okorokwa Nazareti, rinyare goikerana eriatebetwe nababani, “Igo ararokwe Omonazareti.”
Currently Selected:
MATAYO 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020