ABALAWI 1
1
Ekeng’wanso ki’ogosambwa
1Omonene akarangeria Musa, agakwana nere korwa ase Eema y’Omosangererekano, akamotebia,
2“Kwana n’Abaisraeli, obatebie ng’a ekero omonto onde bwensi korwa ase egati yabo akondetera inche Omonene eng’iti y’ekeng’wanso, ayerusie korwa ase chiombe gose ching’ondi, gose chimbori. 3Onye nigo akorua ekeng’wanso ki’ogosambwa korwa ase amaicho e chiombe, arue eeri etari na kemocho ase omobere oye, ayerente agwo ase egesoero ki’Eema y’Omosangererekano, erinde inche mwanchere. 4Omonto oria goika abeke okoboko kwaye igoro ase omotwe bw’eng’iti eria ekoruegwa ekeng’wanso ki’ogosambwa, erinde yancherwe ase okobwatania omonto oria na Nyasae. 5Erio omonto oria anyenyere eeri eria ensae agwo ase obosio bwane inche Omonene, na abakuani, abamura ba Haroni, barente amanyinga bayasiarere chinsemo chionsi chi’egesasimero kere agwo ase egesoero ki’Eema y’Omosangererekano. 6Naende arusie riiyo ri’eng’iti eria ekoruegwa ekeng’wanso, ayenachane ebitari, 7na abamura ba Haroni omokuani baute omorero ase egesasimero, bachoke chinko ase omorero oyio. 8Naende abakuani, abamura ba Haroni, babeke ebitari biria, amo nomotwe na ebitinya, igoro ase chinko chiria chire ase omorero bw’egesasimero. 9Korende chinyama chi’enda, amo nebirenge, bisibigwe namache. Omokuani oria otenenerete asambe eng’iti eria yonsi ase egesasimero, ebe ekeng’wanso kegosambwa nomorero, kere ne rimisu rigiya rikongwenera inche Omonene.
10“Onye omonto okorua ekeng’wanso ki’ogosambwa korwa ase amaicho e ching’ondi, gose chimbori, nigo ararente emingichi, gose egoree, etari na kemocho ase omobere oye. 11Erio ayenyenyere ase ensemo ya sugusu y’egesasimero, agwo ase obosio bwane inche Omonene, na abakuani, abamura ba Haroni, basiarere amanyinga aria ase egesasimero chinsemo chionsi. 12Naende anachane eng’iti eria ebitari, na omokuani oria otenenerete abichoke buya, amo nomotwe na ebitinya, igoro ase chinko chiria chire ase omorero bw’egesasimero, 13korende chinyama chi’enda na ebirenge bisibigwe namache. Erio omokuani arue bionsi na kobisambera ase egesasimero. Ekio nekeng’wanso kegosambwa nomorero, kere ne rimisu rigiya rikongwenera inche Omonene.
14“Onye ekeng’wanso ki’ogosambwa akonduera inche Omonene gekorusigwa ase chinyoni, rirorio arente amaruma gose amage ’amaruma. 15Omokuani arente enyoni eyio ase egesasimero, na amine omotwe oye, ayobutore. Erio ayosambe ase egesasimero. Anyititorere amanyinga ase egesasimero ensemo, 16korende embochero yaye, amo neubi ere imeo, abitugute ensemo ya moocha y’egesasimero, ase ribu rigotugutwa. 17Erio atandorane egekuba, korende tarusia chimbaba, ayesambere ase egesasimero, igoro ye chinko chiria chire ase omorero. Ekio nekeng’wanso kegosambwa nomorero, kere ne rimisu rigiya rikongwenera inche Omonene.
Currently Selected:
ABALAWI 1: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
