ABALAWI 2
2
Okoruegwa kw’endagera
1“Ekero omonto akondetera inche Omonene okoruegwa kw’endagera, arue obosie obonuke, anyororokerie amaguta ase obosie obwo, abeke na ubani. 2Erio arente okoruegwa okwo ase abakuani, abamura ba Haroni. Omokuani otenenerete aimokie obosie boichire roe, amo namaguta, na ubani yonsi, abisambere ase egesasimero bibe ekemanyererio ng’a okoruegwa okwo nokwane inche Omonene. Okwo nokoruegwa kogosambwa nomorero kore ne rimisu rigiya rikongwenera. 3Ekeratigare korwa ase okoruegwa kw’endagera okwo nakobe okwa Haroni na abamura baye. Ekio negechenu mono, ekiagera kiarusigwe korwa ase okoruegwa kogosambwa nomorero asende.
4“Ekero okorenta okoruegwa kw’endagera esambeire riko nebe emegati etabekiri memera eroisirie korwa ase obosie obonuke bwochoganirie namaguta, gose emegati emeoo eakire amaguta.
5“Onye okoruegwa kwao kw’endagera nemegati esambeire orogio, ebe eroisirie korwa ase obosie obonuke amo namaguta, korende ebe etabekiri memera. 6Oyesamunyorane, erio oumore amaguta igoro ase ebisamunye biria. Okwo nokoruegwa kw’endagera.
7“Onye okoruegwa kwao kw’endagera nemegati ekarangeire esuguria, ebe eroisirie korwa ase obosie obonuke amo namaguta. 8Ondetere inche Omonene okoruegwa kw’endagera eroisirie ase enchera eyemo y’echio, na ekero okoruegwa okwo kwairirwe ase omokuani nere akorente ase egesasimero. 9Omokuani arusie ensemo y’okoruegwa okwo kw’endagera ebe ekemanyererio ng’a okoruegwa okwo nokwane inche Omonene, ayesambere ase egesasimero. Okwo nokoruegwa kogosambwa nomorero kore ne rimisu rigiya rikongwenera. 10Ekeratigare korwa ase okoruegwa okwo kw’endagera nakebe ekia Haroni na abamura baye. Ekio negechenu mono, ekiagera kiarusigwe korwa ase okoruegwa kogosambwa nomorero asende.
11“Okoruegwa konde gwonsi kw’endagera bakonduera inche Omonene tigokoroiseranigwa nememera. Timobaisa gosamba ememera, gose obooke, bibe okoruegwa kogosambwa nomorero asende. 12Monyare kondetera ebinto ebio buna ogotongora kw’endagera, korende timobaisa kobisambera ase egesasimero. Moise gokora igo, tigokoba ne rimisu rigiya rikongwenera. 13Goika obeke omonyo ase okoruegwa kwao gwonsi kw’endagera. Ase okoruegwa okwo tibweba kobeka omonyo bw’okobwatana kwane kw’ogotianania. Omonyo tomocha kobekwa ase kera okoruegwa kwao.
14“Aye gokorenta ogotongora kw’endagera asende inche Omonene, goika orente ebigara ebibese bisambire ase omorero, bisenyentire. 15Oumore amaguta ase okoruegwa okwo, obeke na ubani; okwo nokoruegwa kw’endagera. 16Omokuani asambe ebigara bike bie biria bisenyentire, amo namaguta; abisambe amo na ubani yonsi bibe ekemanyererio ng’a okoruegwa okwo nokwane inche Omonene. Okwo nokoruegwa kw’endagera kogosambwa nomorero asende.
Currently Selected:
ABALAWI 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
