OKONG’ANYA 40
40
Ogotenenia Obomenyo Obochenu na kobwatanana
1Omonene agakwana na Musa, akamotebia, 2“Ase rituko rie ritang’ani, omotienyi bwe ritang’ani, otenenie Obomenyo, Eema eria y’Omosangererekano. 3Obeke Esanduku ere ne chibao chirikire oborori imeo, na oyekenge netoto. 4Osoyie emesa, na obeke ebinto biaye igoro yaye; osoyie na ekebekerero gie chitaya, na obeke chitaya igoro yaye. 5Erio obeke egesasimero gi’etahabu ase ubani erasamberwe bosio bw’Esanduku ere ne chibao chirikire oborori, na osunge egetambaa kere ase egesoero ki’Obomenyo. 6Obeke egesasimero ase ebing’wanso birasamberwe bosio bw’egesoero ki’Obomenyo, Eema eria y’Omosangererekano. 7Obeke egetuba egati y’Eema y’Omosangererekano na egesasimero, obeke na amache imeo. 8Otenenie orosenge rw’egetambaa roetanane eraaro, na osunge egetambaa ase egesoero ki’eraaro.
9“Oimokie amaguta akweakwa, oake Obomenyo na ebinto bionsi ebire imeo na obwatanane Obomenyo amo nebinto biaye bionsi, erinde bibe ebichenu. 10Naende oake amaguta ase egesasimero ase ebing’wanso birasamberwe, amo nebikorero biaye bionsi. Naboigo ogiatanane, kebe egechenu mono. 11Oake egetuba amaguta amo nenterekerero yaye, na kogiatanana.
12“Orente Haroni amo nabamura baye ase egesoero ki’Eema y’Omosangererekano, obasibie namache. 13Erio obekere Haroni chianga chiria chinchenu, omoake amaguta na komwatanana, anyare gonkorera ase emeremo y’obokuani, 14Orente na abamura baye, obabekere chianga chiabo, 15obaake amaguta buna oraake ise, na barabwo nababe abakuani baane. Ogoakwa kw’amaguta kwabo nkobanyorere obokuani boragenderere botambe ase ororeria rwabo, ebiaare ase ebiaare.”
16Musa agakora onsi buna Omonene konya amochikire. 17Ase rituko rie ritang’ani, omotienyi bwe ritang’ani, omwaka o kabere nyuma kobarure Misiri, Obomenyo boria bogatenenigwa.
18Musa agatenenia Obomenyo boria, akabeka chinterekerero aase abo, agatenenia ne chibao chiaye, agasoyia emeriibo, na gotenenia chisiiro. 19Akaara eema igoro y’Obomenyo boria, na kobeka egietubo kiaye buna Omonene konya amochikire. 20Akaimokia chibao chirikire oborori, agachibeka ase Esanduku ime, agasoyia emiaro ase chibonyi, akamumeka Esanduku eria n’Oboikaranso bw’Amabera. 21Akabeka Esanduku eria ime y’Obomenyo, agasunga etoto eria y’egetambaa ase ogokenga Esanduku ere ne chibao chirikire oborori, buna Omonene konya amochikire.
22Akabeka emesa ase Eema y’Omosangererekano ime, isiko y’etoto, ensemo ya sugusu, 23na akaroberia emegati igoro yaye ase obosio bw’Omonene, buna ere konya amochikire. 24Akabeka ekebekerero gie chitaya ase Obomenyo ime, ensemo ya irianyi, kororia ase emesa. 25Naende akabeka chitaya igoro y’ekebekerero ase obosio bw’Omonene, buna ere konya amochikire. 26Akabeka na egesasimero gi’etahabu ase Eema y’Omosangererekano ime, bosio bw’etoto, 27na igoro yaye agasambera ubani ekorua rimisu rigiya, buna Omonene konya amochikire. 28Agasunga egetambaa ki’egesoero ki’Obomenyo. 29Na egesasimero ase ebing’wanso birasamberwe akabeka ase egesoero ki’Eema y’Omosangererekano. Igoro yaye akarua ekeng’wanso ki’ogosambwa, na okoruegwa kw’endagera, buna Omonene konya amochikire. 30Akabeka egetuba ase egati y’Eema y’Omosangererekano na egesasimero, akabeka amache ogwesibia imeo. 31Musa na Haroni bakaba bagoisaba amaboko na gosibia amagoro ase amache ayio. 32Ekero baare gosoa Eema y’Omosangererekano, gose goika ang’e ase egesasimero, baba bagwesibia, buna Omonene konya achikire Musa. 33Agatenenia orosenge rw’eraaro roetanane Obomenyo na egesasimero, na agasunga ebitambaa bi’egesoero ki’eraaro. Naboigo Musa agakoora emeremo eyio yonsi.
Riire igoro y’Eema y’Omosangererekano
(Omob 9:15–23)
34Erio riire rigatuba Eema y’Omosangererekano, na obonene bw’Omonene bogaichora ime ase Obomenyo. 35Musa tanyara gosoa Eema y’Omosangererekano, ekiagera riire riria riabete igoro yaye, na obonene bogaichora ime ase Obomenyo. 36Na ekero kende gionsi riire riare koimokerera igoro korwa ase Obomenyo obwo, Abaisraeli nigo baare koimoka kogenda orogendo rwabo. Naboigo baare gokora ase orogendo rwabo rwonsi. 37Korende onye riire tiriare koimokerera igoro, barabwo tibaare koimoka kogenda goika rituko riria riire riare koimokerera igoro naende. 38Naki riire ri’Omonene nigo riare kobeera ase Obomenyo ekero kia mobaso, na ekero kia botuko omorero oba ase riire ime; na agwo Abaisraeli bonsi baba bakorirora aande onsi ase barenge ase orogendo rwabo.
Currently Selected:
OKONG’ANYA 40: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
