OKONG’ANYA 39
39
Chianga chi’abakuani chikoroisigwa
(Okong’ 28:15–30)
1Korwa ase chiusi chi’amarionya chire buru, ne chimonyinga, ne chimbariri, bakaroisia chianga chinseera chi’ogokorera emeremo ime y’Aase Aachenu. Bakaroisia chianga chinchenu chia Haroni, buna Omonene konya achikire Musa.
2Bagakora egesibao ki’obokuani korwa ase chiusi chi’etahabu, na echi’amarionya chire buru, ne chimonyinga, ne chimbariri, amo nechi’egatani engiya chisisire. 3Bagasunyunta etahabu ekaba eng’oo, naende bakayeninta ekaba chiusi chinyerere, bagachisang’ania ne chiusi chi’amarionya chire buru, ne chimonyinga, ne chimbariri, ase okoroisia egetambaa buna omoroisia omong’aini aranyare gokeroisia. 4Bakaroisia ebitwanga bi’amareko bi’egesibao keria, bakabibwatania nakerokio, nyuma na bosio; chinsinyo chiaye ibere ibere chikabwatanigwa amo. 5Orokini rw’okobwataneria egesibao rokaroisigwa rw’egetambaa keria ki’egesibao keroisirie korwa ase chiusi chi’etahabu, na echi’amarionya chire buru, ne chimonyinga, ne chimbariri, amo nechi’egatani engiya chisisire. Bionsi bigakoreka buna Omonene konya achikire Musa. 6Bakabaacha amagena e rigori rinene akorokwa oiniki, bakayabeka ase ebikonde bie chitahabu; na buna omoroisia omong’aini aranyare komanya komang’era ebimanyererio, bakamang’era amarieta ’abamura ba Israeli. 7Bakayabeka ase ebitwanga bi’amareko ase egesibao ki’obokuani, abe ase okoinyora abamura ba Israeli. Bionsi bigakoreka buna Omonene konya achikire Musa.
Egesembe ki’obokuani gekoroisigwa
(Okong’ 28:15–30)
8Egesembe ki’obokuani bagakeroisia, buna omoroisia omong’aini aranyare gokeroisia, korwa ase egetambaa kere buna eki’egesibao ki’obokuani, nakio keroisirie korwa ase chiusi chi’etahabu na echi’amarionya chire buru, ne chimonyinga, ne chimbariri, amo nechi’egatani engiya chisisire. 9Bakaroisia egesembe keria keringire rimo; obotambe bwaye nigo bwarenge chisentimita emerongo ebere, na ibere, na obogare bwaye boigo. Chinsemo chiaye inye nigo chiarenge chireng’aine. 10Bagakebekera emeng’ororia ene y’amagena e rigori. Ase omong’ororia bwe ritang’ani bakabeka saridio, na topasio, na sumaridi; 11na ase oyo o kabere alimasi, na safiro, na yasipi; 12na ase oyo o gatato hiakinto, na agati, na ametisito; 13na ase oyo o kane kurusolito, na oiniki, na berulo. Amagena ayio onsi bakayabeka ase ebikonde bie chitahabu. 14Na amagena ayio nigo arenge ikomi na abere, akaba namarieta ’abamura ba Israeli, amang’ekire buna ekemanyererio gekomang’wa. Kera rigena rikaba nerieta ri’egesaku ekemo ki’ebisaku biabo ikomi na bibere. 15Bagakora ebichanga bie chitahabu chichenire bisisire, bikabekwa ase egesembe keria. 16Bagakora na ebikonde bibere bie chitahabu, ne chibonyi ibere chie chitahabu, na bakabeka chibonyi echi ibere ase emego ebere ya igoro y’egesembe keria. 17Bagasiberania ebichanga ebi bibere bie chitahabu ase chibonyi echi ibere ase emego y’egesembe keria. 18Naende bakabwaterania chinsinyo chinde ibere chi’ebichanga ase ebikonde biria bibere, na buna biare igo bakabibwaterania nebitwanga bi’amareko bire bosio bw’egesibao ki’obokuani. 19Bagakora chibonyi ibere chie chitahabu bagachibeka ase egesembe keria, ase emego ebere ya inse korwa nyuma, echigete egesibao. 20Naende bagakora chibonyi chinde chie chitahabu, bagachibeka ase ebitwanga biria bibere bi’amareko bi’egesibao bire bosio, ang’e nomobarero, igoro y’orokini rw’egesibao. 21Bagachibwaterania chibonyi chi’egesembe amo nechi’egesibao ki’obokuani neusi eburu; erio egesembe gekabeera orokini igoro, tigecha gosuka. Bionsi bigakoreka buna Omonene konya achikire Musa.
Chianga chinde chi’abakuani chikoroisigwa
(Okong’ 28:31–43)
22Bagakora eganchwa korwa ase egetambaa keroisirie ne chiusi chiburu chioka. 23Ase eganchwa eria bakabochora engoro ase omotwe ogosoera, enga buna engoro y’esati. Engoro eria ekabekwa ekenaario buna egi’esati, techa gotandoka. 24Bagakora emegwekano y’amatunda e rikomomanga korwa ase chiusi chi’amarionya chire buru, ne chimonyinga, ne chimbariri, bakayebeka ase omoringero o inse. 25Naende bagakora chindege chie chitahabu chichenire, bagachibeka gati y’emegwekano ye rikomomanga chietanane omoringero o inse ase eganchwa. 26Ase igo omong’ororia bw’emegwekano ye rikomomanga bwateranirie ne chindege orenge ase omoringero o inse ase eganchwa eria ekobekwa ase obokoreri bw’obokuani. Naboigo buna Omonene konya achikire Musa.
27Bakaroiseria Haroni amo nabamura baye chiganchwa chi’egatani engiya, 28na egetinti amo nebigogwa emechoro bi’oboseera bi’egatani engiya, ne chisirwari chi’egatani engiya, 29na orokini rwe chiusi chi’egatani engiya chisisire, amo ne chiusi chi’amarionya chire buru, ne chimonyinga, ne chimbariri. Bionsi bigakoreka buna Omonene konya achikire Musa.
30Bagatura ebao y’etahabu echenire, na buna omonto akomang’a ekemanyererio, bakamang’a amang’ana aya: “Achenirwe ase Omonene”. 31Bakayesiberania bosio bw’ekegogwa ne chiusi chiburu, buna Omonene konya achikire Musa.
Ogoikeranigwa kw’emeremo
(Okong’ 35:10–19)
32Naboigo emeremo y’Obomenyo bw’Eema y’Omosangererekano egaikeranigwa n’Abaisraeli; bagakora onsi buna Omonene konya achikire Musa. 33Barabwo bakarentera Musa Obomenyo boria, na eema amo nebinto bionsi ebirabeo: ebigobanio, ne chibao, ne chisiiro amo ne chinterekerero chiabo, 34na egietubo ki’amasankwa e chimingichi, aakire etaago, na egietubo ki’amasankwa e ching’iti chia rooche, na etoto eria ekengete, 35na Esanduku eria ere ne chibao chirikire oborori, amo nemiaro yaye, na Oboikaranso bw’Amabera, 36na emesa amo nebikorero biaye bionsi, na Emegati eyare koruegwa ase Nyasae, 37na ekebekerero gie chitaya gi’etahabu echenire, ne chitaya chiare kobekwa aroro amo nebikorero biaye bionsi, na amaguta e chitaya, 38na egesasimero gi’etahabu, na amaguta akweakwa, na ubani ekorua rimisu rigiya, na egetambaa ki’egesoero ki’Eema, 39na egesasimero gi’etaai amo negechungi gi’etaai, na emiaro yaye, na ebikorero biaye bionsi, na egetuba amo nenterekerero yaye, 40na ebitambaa bi’eraaro, ne chisiiro amo ne chinterekerero chiabo, na egetambaa ki’egesoero ki’eraaro, ne chingori, na ebirochi, na ebikorero bionsi bi’obokoreri ase Obomenyo ime, ase Eema y’Omosangererekano, 41ne chianga chiria chinseera chi’abakuani ase obokoreri bwabo ime y’Aase Aachenu, engencho yaye chianga chia Haroni amo nechi’abamura baye barabe bakobeka ekero bagokora emeremo y’obokuani. 42Abaisraeli konya bakorire emeremo yonsi boronge kegima buna Omonene konya achikire Musa. 43Musa akariga‐rigereria ebinto bionsi ebiakoretwe, akarora ng’a abanto babikorire boronge kegima buna Omonene konya achikire. Erio Musa akabasesenia.
Currently Selected:
OKONG’ANYA 39: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
