OMOCHANKO 42
42
Orogendo rwe ritang’ani rw’abamwabo Yusufu gochia Misiri
1Ekero Yakobo aigwete ng’a endagera nekare ase ense ya Misiri, akaboria abamura baye, “Inaki morigereranetie iga?” 2Naende akabatebia, “Naigure ng’a endagera nekare Misiri, tirimboka gochiao, motogorere endagera toche koria, tobe moyo, titokwa.” 3Ase igo bamura bamwabo Yusufu ikomi bagatirimboka gochia Misiri kogora endagera. 4Korende Benjamin, omwabo Yusufu, Yakobo tamotiga agende amo nabarabwo, ekiagera nigo oboete ng’a aande nabaise gochia konyorwa namabe.
5Nabo basinto ba Israeli bakagenda amo nabanto bande abachiete kogora endagera, ekiagera enchara yarenge ase ense ya Kanani. 6Yusufu nere orenge gavuna igoro y’ense yonsi ya Misiri, naende nere orenge kooneria abanto bonsi b’ense eria endagera. Na abamwabo Yusufu, ekero baigete asare, bagatung’ama inse ase obosio bwaye. 7Yusufu, ekero abarora, akabamanya, korende agekora buna tabamanyeti, agakwana nabarabwo amang’ana amakong’u. Akababoria, “Abanto aba, ng’ai mwarure?”
Barabwo bakamoiraneria, “Nigo twarure ase ense ya Kanani, twachire kogora endagera.”
8Nonya Yusufu omanyete abamwabo, barabwo tibamomanyete ere. 9Erio Yusufu akainyora chindoto chiria arenge kobarotera, akabatebia, “Inwe nechirooti more, nigo mwachire koroota ense eye, na korora ase ere bosa etari na getango.”
10Bakamokania, “Taibo, omonene, intwe abasomba bao nigo twachire kogora endagera. 11Intwe twensi nabana b’omonto oyomo. Intwe abasomba bao nigo tore abanto abaronge, titori chirooti.”
12Akabakania, “Yaya, nigo mwachire koroota ense, na korora ense ase ere bosa etari na getango.”
13Barabwo bakamoiraneria, “Intwe abasomba bao nigo tore abamura ikomi na babere, abana b’omonto oyomo, ase ense ya Kanani; na bono omoke ominto tari aa, inka akare ase tata, na oyomo ere takaiyo.”
14Korende Yusufu akabatebia “Nabo ere buna konya naikire kobatebia, ng’a inwe nechirooti more. 15Ase amang’ana aya nimbateeme: Amaene, buna Farao are moyo, timokorua aa mogende, oria omino omoke ataracha aa. 16Toma oyomo oino agende korenta oyio omino, na inwe abande motigare echela. Nabo morateemwe gose namaene mogoteba. Onye taibo, amaene buna Farao are moyo, inwe nechirooti more.” 17Erio agasiekera bonsi amo echela ime ase amatuko atato.
18Rituko ria gatato Yusufu akabatebia, “Mokore iga buna ndabatebie, nario morabe moyo; naki inche nomonto imoirogete Nyasae. 19Onye inwe more abanto abaronge, tiga oyomo oino atigare aa ase echela, na inwe abande moirere abwo mwatigete inka endagera, ase engencho y’enchara; 20erio morente oria omino omoke asende. Igo amang’ana aino aenekigwe ng’a namaene are, na inwe timobaisa gokwa. Barabwo bagakora bo.”
21Erio bagatebania barabwo ase barabwo, “Amaene, ntwamocherete oyominto. Nigo twaroche ogochandeka kw’omoyo oye, na ekero atosororete titwamoigwete. Ase ayio nakio kiagerire obokong’u obo bwatonyorire.”
22Reuben akabairaneria, “Tinabakanetie ng’a timomochera omosae oyo? Korende inwe mokaanga, timwanyigwera. Ase igo bono amanyinga aye aganigwe aakanwe.” 23Barabwo tibamanya ng’a Yusufu nayaigwete, ekiagera omonogi narengeo ore komoonchorera. 24Erio akarua asebare, akagenda ensemo, akarera amariga; naende akairana, agakwana nabarabwo. Akarusia Simeoni korwa asebare, akamosiba ase amasio abo. 25Yusufu agachika abanto baichorie chigunia chiabo endagera, na kera oyomo airanerigwe chibesa chiaye, chibekwe egunia yaye ime, na aegwe endagera agochia koria inchera. Naboigo babakorerete.
Abamwabo Yusufu bakoirana gochia Kanani
26Erio bakaberekia chitigere chiabo endagera, bakagenda. 27Ekero baigete ase bakorara botuko, oyomo obo agasansora egunia yaye arusie endagera ae etigere yaye, akarora chibesa chiaye igoro y’endagera ase egunia yaye ime, 28agatebia abamwabo, “Ayee! Chibesa chiane nigo chiairanetigwe, rigereria, nao chire aa egunia yane ime!” Chinkoro chiabo chikagoyaana, bakarigererania na koiguswa, bagateba, “Inki eke Nyasae atokoreire iga?”
29Ekero baigete ase Yakobo ise, ase ense ya Kanani, bakamotebia ayio onsi abanyorete, bakabora, 30“Omonto oria omonene bw’ense eria nigo akwanete naintwe amang’ana amakong’u agatoroka ng’a intwe nechirooti, tokoroota ense. 31Korende tokamotebia: Intwe nigo tore abanto abaronge, titori chirooti. 32Nigo tore abamura ikomi na babere, tata noyomo. Oyomo oito takaiyo, na omoke kegima nere okare ase tata inka, ase ense ya Kanani. 33Omonto oyio, omonene bw’ense eria, agatotebia: Ase amang’ana aya naro ndamanyere gose nabanto abaronge more: Tiga oyomo oino aiga asende, inwe abande genda, moire endagera ase engencho y’enchara ekare inka seino. 34Genda mondetere oyio omino omoke, erio nario ndamanye ng’a timori chirooti, korende nabanto abaronge. Erio nimbairanerie oyomino, na inwe inamonyore ribaga mobe mokoonchoreria ase ense eye.”
35Ekaba ekero baumorete endagera korwa ase chigunia, bakanyora kera oyomo esaro ye chibesa chiaye nao ere egunia yaye ime. Na ekero barabwo amo na ise baroche chisaro chie chibesa chiabo, bakaondoka. 36Yakobo ise akabatebia, “Mwang’urire abana baane, Yusufu taiyo, na Simeoni taiyo, na bono morigetie koira Benjamin nere. Amang’ana aya onsi anyorire inche.”
37Erio Reuben agatebia ise “Oite abana baane babere abamura onye tinkomoirania gocha asore. Mobeke ase amaboko aane na inche nimoiranie.”
38Akamokania, “Omwana one tagotirimboka amo nainwe, ekiagera oyomwabo okure, na oyo nere otigarete bweka. Amabe aise gochia komonyora agwo inchera, nigo moragere ngende ase oboina ne chimbuche chiane inde nomoichano.”
Currently Selected:
OMOCHANKO 42: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
