OMOCHANKO 43
43
Orogendo rwa kabere rw’abamwabo Yusufu gochia Misiri
1Enchara ekaba enene ase ense. 2Na ekero bakoorire endagera eria bagorete korwa Misiri, ise akabatebia, “Irana naende motogorere endagera nke toche koria.”
3Korende Yuda akamotebia, “Omonto oria nigo atochigete bokong’u, agatotebia: Timogocha kondora obosio bwane oyio omino atacheti amo nainwe. 4Koratoe oyominto agende amo naintwe, rirorio inatotirimboke tokogorere endagera. 5Korende onye togotomoa togende komo, rirorio titokogenda, ekiagera omonto oria nigo atotebetie: Timokondora obosio bwane motacheti noyio omino.”
6Israeli akababoria, “Ninki mwankorera igo na gonchanda, goika mogatebia omonto oria ng’a mokare noyomino onde inka?”
7Barabwo bakamoiraneria, “Omonto oria nigo atounetie mono amanye amang’ana aito na ay’eamate yaito, agatoboria: Iso moyo are? Mokare nonde omino? Na intwe tokamoiraneria buna atoboretie. Inee! Ntwamanyete aya agochia gokwana ng’a: Gachie morente oyomino?”
8Yuda agatebia Israeli ise, “Mong’e omosae oyo agende amo nainche, erio toimoke togende aroro, erinde egere tobe moyo, titokwa, intwe, naye, amo nabana baito abake. 9Nerure imbe intenenera asare: korwa ase okoboko kwane oche komonsaba. Onye tinkomoirania gocha asore, rirorio ontige mbogorie okomocha okwo amatuko onsi ase obosio bwao. 10Onye totatebanire nanga twairanire chintunda ibere.”
11Israeli ise akabatebia, “Onye naboigo are, bono mokore iga: Mobeke ebinto ebiya bi’ense eye yaito ase chigunia chiaino, moirere omonto oyio buna ebiegwa. Momoirere amaguta okogwenia make, na obooke boke, na ubani, na manemane, na amajozi,#43:11 amajozi: chinchugu gete chikwama ase emete igoro na amalozi.#43:11 amalozi: chintetere chikoriegwa chikorwa ase emete gete 12Mobogorie chibesa ara kabere ase amaboko aino, moirane chibesa chiria chiairanetigwe, echio chiabegetwe igoro y’endagera ase chigunia chiaino ime. Aande nigo chiebetwe chikabekwao. 13Moire na oyomino, mogende komo, mogende ase omonto oria naende. 14Nyasae Omobui abae ogwancherwa ase obosio bw’omonto oyio, erio abasiborere oria omino onde, erinde moirane nere amo na Benjamin. Onye inche ekongwenera nsirerwe nabana baane, tiga abe bo.”
15Ase igo abanto abwo bakaimokia ebiegwa, bakaimokia ne chibesa ara kabere; amo na Benjamin bakagenda, bagatirimboka gochia Misiri, bagachia bagatenena ase obosio bwa Yusufu. 16Ekero Yusufu aroche Benjamin ore amo nabarabwo agatebia omoteneneri bw’enka yaye, “Barente abanto abwo nyomba, na onyenye emori, oyeroisie, ekiagera abanto abwo nigo bagocha koragera amo nainche endagera ya mobaso.” 17Omonto oria agakora buna Yusufu amotebetie, agasoyia abanto abwo nyomba ime.
18Korende abanto aba bakaondoka, ekiagera bairetwe nyomba mwa Yusufu, bakabora, “Nigo twarentirwe nyomba ime ase engencho ye chibesa chiria chiabegetwe ase chigunia chiaito engaki eria entang’ani. Na bono nigo ararigie gotosoera, na atoimokere, atobwate, atokore tobe abasomba baye, aire ne chitigere chiaito.” 19Ase igo bakamoika ang’e omoteneneri oria bw’enka ya Yusufu, bakaba bagokwana nere gesieri ki’enyomba, 20bakamotebia, “Koranche omonene, otoigwe! Engaki eria entang’ani twachete aiga kogora endagera, 21ekero twairanete gochia seito, gotwaikire ase twararete botuko, togachia gosansora chigunia chiaito, tokanyora kera omonto chibesa chiaye nao chire igoro y’endagera ase egunia yaye ime, chibesa chionsi pi. Bono chibesa echi chionsi ntwachirentana, naa tochibwate amo naintwe. 22Naende ntwarentana chibesa chinde, echi togocha kogora endagera. Titomanyeti gose ning’o ochibegete ase chigunia chiaito ime.”
23Akabairaneria “Timoka, motoerere, timoondoka; Nyasae oino, oyore Nyasae o iso, nere obaete enibo eye ase chigunia chiaino; chibesa chiaino inachinyorete.” Erio akarenta Simeoni asebare.
24Omonto oria akaira abanto baria nyomba mwa Yusufu, akabaa amache bagesibia amagoro abo, akaa ne chitigere chiabo endagera. 25Barabwo bakabeka ebiegwa biabo ang’e, baganye Yusufu kagocha mobaso, ekiagera konya baigure ng’a nao bagocha koragerera endagera ya mobaso. 26Na ekero Yusufu achete nyomba ime bakamoirera ebiegwa biria barentete, bagatung’ama inse ase obosio bwaye. 27Akabakwania, akababoria, “Inee! Iso mbuya are, omogaaka oria mwantebia? Moyo are?”
28Bakamoiraneria, “Ee, omosomba oo tata mbuya are. Nabo moyo are.” Barabwo bagatureka emetwe yabo inse.
29Yusufu agachia koimokia amaiso aye, akarora Benjamin omwabo, omwana omwabo baruete enda eyemo nere, akababoria, “Oyo nere oria omoke omino, oria mwantebia?” Akaonchokera Benjamin, akamotebia, “Nyasae akoe obuya, omwana one!” 30Erio Yusufu akaimoka, agasoa enyomba ende, ekiagera enkoro yaye nigo yare namaiga ase omwana omwabo, aroro ase enyomba eyio akarera amariga. 31Erio agesibia obosio, agasoka oremereretie. Naende akabora, “Renta endagera!” 32Bakamobekera endagera bweka ao, na abamwabo boka ao, na Abamisiri baria konya bakoragera komo boka ao, ekiagera Abamisiri nigo bagechete Abaibirania, tibari koria amo nabarabwo. 33Abamwabo Yusufu bagaikaransigwa ase obosio bwaye, bakaroberigwa gochakera ase oria omonene kogenderera goika ase oria omoke. Bonsi kobaikaransire, bakarigererania, bagakumia. 34Bakaegwa endagera korwa ase emesa ya Yusufu, korende Benjamin ere akarenterwa enyinge kobua abwo bande, ebirengo bitano. Naboigo bakanywa, bakagoka amo nere.
Currently Selected:
OMOCHANKO 43: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
