OMOCHANKO 41
41
Chindoto chia Farao
1Nyuma y’emiaka ebere koyaetire Farao akarota chindoto. Akarora ng’a oteneine engegu y’orooche rwa Naili, 2akarora chiombe isano na ibere, chingiya mono chinoru, chikorwa rooche, chikorisia amasangaka. 3Naende akarora chiombe chinde isano na ibere, chimbe mono chindeu, chikorwa rooche, chigochitunyana korwa nyuma, chigatenena ase engegu y’orooche ang’e nase chiombe chiria chinde. 4Agwo chiombe chiria chimbe chindeu chikaria chiria chingiya chinoru. Erio Farao akaboka. 5Akarara naende, akarota eria kabere, akarora ebigara bitano na bibere ebinene ebinoru, bikinete ase oroboba oromo. 6Nyuma yabo ebigara binde ebireu, ebiasusanirie nomwaga ore korwa moocha, bikaoroka. 7Agwo ebigara ebio ebireu bitano na bibere bikaria biria binde ebinene ebinoru. Farao akaboka, akanyora ng’a nigo are korota. 8Ekero bwachia gokia mambia, akaba oichanete, agatoma abanto barangerie abaringoria bonsi ba Misiri na abanto abang’aini bonsi abarengeo. Farao akabatebia chindoto chiaye, korende onde tatogete ore konyara komotebia engencho ye chindoto echio.
9Erio omoteneneri bw’ebinyugwa agatebia Farao, “Bono nainyoire okomocha kwane. 10Ekero aye Farao gwatobeete intwe abasomba bao, na gotosiekera, inche na omoteneneri bw’abaroisia emegati, ase echela eyere ase enyomba y’omotang’ani bw’abarendi, 11intwe ase obotuko obomo tokarota chindoto twensi, kera oyomo okorota kwaye kore nengencho yaye eng’ao. 12Agwo amo naintwe narengeo omomura oyomo Omoibirania, omosomba bw’omotang’ani bw’abarendi. Tokamotebia chindoto chiaito, na ere agatotebia engencho ye chindoto chiria, agatobanorera kera oyomo engencho y’okorota kwaye. 13Na buna ere atotebetie engencho ye chindoto chiaito, naboigo abete; inche nkairanigwa ase emeremo yane, na oria onde agasungwa ase omote igoro.”
14Erio Farao agatoma abanto korangeria Yusufu. Bakamorenta bwango korwa ase echela, na ere akagingirwa, akaonchoreria chianga chiaye, akagenda ase obosio bwa Farao. 15Farao agatebia Yusufu, “Nigo narota okorota, gose onde tari oranyare gontebia engencho y’okorota kwane. Inche naigure amang’ana ao ng’a gokwaigure chindoto, nabo okomanya engencho ye chindoto echio.”
16Yusufu akairaneria Farao, akabora, “Tari inche, korende Nyasae orakoe aye Farao okoiraneria kw’omorembe.”
17Erio Farao agatebia Yusufu, “Ase okorota kwane nigo naroche ng’a nteneine ase engegu y’orooche. 18Nkarora chiombe isano na ibere, chinoru chingiya mono, chikorwa rooche, chikorisia amasangaka; 19naende nkarora chiombe chinde isano na ibere, chimbe mono chindeu, chikorwa rooche, chigochitunyana korwa nyuma. Ase ense yonsi ya Misiri tinana korora chiombe chimbe buna echio. 20Agwo chiombe chiria chimbe chindeu chikaria chiombe chiria isano na ibere chie ritang’ani, chiare chingiya chinoru, 21korende ekero chiachirire tichiarorekana ng’a nchiachiria, nkarora nabo chire buna chiare ritang’ani. Erio nkaboka. 22Naende konararire nkarora ase okorota kwane ebigara ebinene ebinoru bitano na bibere, bikinete ase oroboba oromo; 23na ebigara ebiomo ebireu, ebiasusanirie nomwaga ore korwa moocha, bikaoroka korwa nyuma yabo, 24na ebigara biria ebireu bikaria biria ebinoru bitano na bibere. Inche ngatebia abaringoria, korende onde tari onyarete gontebia engencho y’okorota kwane.”
25Erio Yusufu agatebia Farao, “Chindoto chiao, aye Farao, nigo chire echimo. Nyasae okworokirie, aye Farao, aya agochia gokora iga bwango. 26Chiombe chiria chingiya isano na ibere, eyio nemiaka etano na ebere, na ebigara biria ebiya bitano na bibere, eyio nemiaka etano na ebere; chindoto echio nechimo. 27Ne chiombe chiria isano na ibere chimbe chindeu, chiachitunyanete chiria chinoru, eyio nemiaka etano na ebere, na ebigara biria bitano na bibere bitaamete, biasusanirie nomwaga ore korwa moocha, eyio nemiaka etano na ebere y’enchara. 28Aya naro buna nagotebia aye Farao, ng’a Nyasae okworokirie aya agochia gokora iga bwango. 29Rora, ngochi‐gocha ere emiaka etano na ebere y’omoigoto ase ense yonsi ya Misiri, 30korende nyuma y’ayio neche emiaka ende etano na ebere y’enchara; na omoigoto oria bwonsi nigo ogochia kwebwa ase ense ya Misiri, ekiagera enchara eria nigo erarie ense eye. 31Omoigoto oria tokoinyorwa ase ense eye, ase engencho y’enchara eye erache gocha korwa nyuma yaye, ekiagera nigo erabe endito mono. 32Na bono Farao, okorota kwao nigo gwachete eria kabere, aya nigo akoorokia ng’a Nyasae ochikire amang’ana aya, na Nyasae nayaikeranie iga bwango.
33“Ase ayio Farao, rigia omonto ore omomanyi na omong’aini, omobeke igoro y’ense yonsi ya Misiri. 34Na bono Farao, aya naro ogwenerete okore: Obeke abateneneri igoro y’ense eye bachoge ensemo ya isano y’endagera ase ense ya Misiri ase emiaka eye etano na ebere y’omoigoto. 35Tiga basangererie endagera eye yonsi y’emiaka eye emiya egocha, bayebeke erendwe ase emechie, ase okobua gwa Farao. 36Na endagera eye egachwe eche koegwa abanto emiaka eye etano na ebere y’enchara, erache gocha ase ense ya Misiri, abanto tibabaisa gocha gosira ase enchara eyio.”
Yusufu okoimokigwa konyora obonene ase Misiri
37Amang’ana ayio akagwenera Farao amo nabasomba baye bonsi. 38Farao akaboria abasomba baye, “Inee! Ng’ai toranyore omonto onga buna oyo ore n’Omoika o Nyasae ime yaye?” 39Erio Farao agatebia Yusufu, “Ekiagera Nyasae okomanyirie amang’ana ayio onsi, onde tari aa omanyete, naende ore na omong’aini buna aye. 40Bono naye orabe omoteneneri bw’enka yane, na abanto baane bonsi nabakoigwere buna orabe gokobachika. Ase ekerogo kiane ki’obogambi oka, nao ndabe omonene gokobua.” 41Farao agatebia Yusufu, “Rora nakobekire aye igoro y’ense yonsi ya Misiri.” 42Erio Farao akarusia ebonyi yaye ere nekemanyererio korwa ase ekiara kiaye, akamoyebekera Yusufu kiara kiaye, akamobekera na eanga engiya y’egatani, akamobekera ne chisonoi chi’etahabu igoti riaye. 43Akamoriinia ase egari yaye ya kabere y’oboruoti. Abanto bagaaka eriogi, bakobora, “Tung’ama inse!” Naboigo akamobeka abe omogambi bw’ense yonsi ya Misiri. 44Naende Farao agatebia Yusufu, “Ninche Farao. Otancheti aye, onde takoba ase ense yonsi ya Misiri oraimoke gokora gento.” 45Farao akaroka Yusufu Safenati‐Panea; akamonyuomeria omokungu, nere Asenati, omoiseke o Potifera, omokuani bw’Oni. Yusufu akagenda aaria na aaria korigereria ense yonsi ya Misiri.
46Agwo Yusufu, ekero asoete gokorera Farao, omoruoti o Misiri, nigo arenge nemiaka emerongo etato. Na Yusufu akarua ase obosio bwa Farao, agaetanana ase ense yonsi ya Misri. 47Emiaka eria etano na ebere y’omoigoto egaika, ense ekaama endagera enyinge, 48na Yusufu agasangereria endagera yonsi ase emiaka eria etano na ebere, ase ense ya Misiri, akayegacha ase emechie. Ase kera omochie akagacha endagera yonsi y’emegondo eria yayoetanaine. 49Yusufu akagacha endagera ase obonge mono, ekaba enyinge buna omokenye bw’enyancha, goika agatiga koyerenga, ekiagera tiyare konyara korengeka.
Enchara egosoa Misiri
50Ritang’ani emiaka eria y’enchara etaracha, Asenati, mosubati o Potifera, omokuani bw’Oni, akaiborera Yusufu abana abaisia babere. 51Yusufu akaroka omwana oria omotangi Manase,#41:51 Manase, engencho yaye aande: okogera okweba agateba, “Nyasae ogerire inyebe obokong’u bwonsi na abanto b’enka ya tata.” 52Na omwana o kabere akamoroka Efraimu,#41:52 Efraimu, engencho yaye: okoibora ara kabere agateba, “Nyasae ong’eire oroiboro ase ense y’emechando yane.”
53Emiaka eria etano na ebere y’omoigoto ekaera ase ense ya Misiri, 54na emiaka eria etano na ebere y’enchara egachaka gocha, buna Yusufu abanete. Enchara egacha ase chinse chionsi, korende ase ense yonsi ya Misiri endagera yarengeo. 55Ekero enchara yariete abanto bonsi ba Misiri, barabwo bakamorera Farao abae endagera; na Farao agatebia Abamisiri bonsi, “Genda ase Yusufu, na rinde rionsi arabatebie, goika morikore.” 56Ase igo, ekero enchara yasoete ase ense eria engima, Yusufu akaigora ebiage bionsi, akaooneria Abamisiri endagera, ekiagera enchara nigo yabete endito ase ense ya Misiri. 57Abanto be chinse chionsi bagacha Misiri kogora endagera korwa ase Yusufu, ekiagera enchara nigo yarenge endito ase ense engima.
Currently Selected:
OMOCHANKO 41: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
