OKONG’ANYA 33
33
Omonene ogochika Abaisraeli bagenderere norogendo rwabo
1Omonene agakwana na Musa, akamotebia, “Imoka korwa aa ogende, aye amo nabanto aba kwang’anyetie korwa Misiri, obaire ase ense eria narierete Ibrahimu na Isaka na Yakobo eira, ngateba: Ning’ee ororeria rwaino ense eye. 2Nintome omomalaika agotang’ane, aserie Abakanani, na Abaamori, na Abahiti, na Abaperisi, na Abahivi na Abayebusi. 3Nimbaire ase ense ere entenenku y’amabeere na amooke. Inche omonyene tinkogenda amo nainwe, mbaise kobaitera inchera, ekiagera inwe nabanyabigoti bikong’u.” 4Ekero abanto baigwete amang’ana ayio amakong’u bagaichana gose onde taba obegete ebinto biaye bi’ogwechabera.
5Omonene agatebia Musa “Batebie Abaisraeli: Inwe nabanyabigoti bikong’u. Inse kogenda amo nainwe, nonya netagika eyemo, nigo ndabasirie kegima. Gaki bono rusia ebinto biaino ebi mwechaberete, erio ndore inki ndabakorere.” 6Ase igo Abaisraeli bakarusia ebinto biria bechaberete, na tibabibeka korwa ekero batigete egetunwa kia Horebu kobagendererete ase orogendo rwabo.
Eema y’Omosangererekano
7Musa nigo anarete koira eema na koyetenenia are ake korwa ase egetwori akayeroka “Eema y’Omosangererekano.” Na onde bwensi oganetie koboria Omonene ring’ana, goika agende ase Eema eria, isiko y’egetwori. 8Engaki ende yonsi Musa arenge kogenda ase Eema eria, abanto bonsi nigo baare koimoka na gotenena, kera omonto ase egesoero ki’eema yaye, na korigereria Musa goika osoire Eema eria ime. 9Ekero Musa asoire Eema eria, riire riare buna esiiro riba rigoika na gotenena ase egesoero ki’Eema eria, na Omonene aba ogokwana na Musa. 10Ekero abanto bonsi barorire riire riria rigotenena ase egesoero ki’Eema, baba bakoimoka na gotung’ama inse ase ogosasima, kera omonto ase egesoero ki’eema yaye.
11Na Omonene aba ogokwana na Musa obosio ase obosio, buna omonto agokwana nomonto onde. Erio Musa aba okoirana gochia ase egetwori, korende Yoshua, omosomba oye omosae, mosinto o Nuni, tare korua ase Eema eria.
Eira y’Omonene y’okoba amo nabanto baye
12Musa agatebia Omonene, “Rora, aye nigo gwantebetie: Baire abanto aba, korende tigwantebia ng’a ning’o oratome agende amo nainche. Naende ogantebia: Ninkomanyete buya kegima, na buna okorokwa; naye kwanyorire ogwancherwa ase obosio bwane. 13Ase igo, onye nanyorire ogwancherwa ase obosio bwao, nagosabire, onyorokie chinchera chiao, erinde inyare gokomanya na konyora ogwancherwa ase obosio bwao, naende rigereria ng’a abanto b’egesaku eke nabanto bao bare.”
14Omonene akamotebia, “Inche omonyene nigo ndagende amo naye, ninkoe obotoereru.”
15Musa akamoiraneria, “Onye aye omonyene tokogenda amo naintwe, rirorio totige, tobeere aa. 16Naki eramanyekane ng’a inche na abanto bao twanyorire ogwancherwa ase obosio bwao, onye tokogenda amo naintwe? Koragende amo naintwe, natororekane ng’a twachorirwe korwa ase abanto bande b’ense eye.”
17Omonene akairaneria Musa, “Ninkore erio kwamboria, ekiagera kwanyorire ogwancherwa ase obosio bwane, na inche ninkomanyete buya kegima, na buna okorokwa.”
18Musa akamosaba, “Koranche, onyorokie obonene bwao!”
19Omonene akamoiraneria, “Ninkore obosiani bwane bwonsi boete ase obosio bwao, na erieta riane, inche Omonene, nindirarie ase obosio bwao. Nimororere amabeebe oyio ndarorere amabeebe, na nimororere amabera oyio ndarorere amabera.” 20Naende akamokania, akamotebia, “Tokonyara korora obosio bwane, ekiagera mwanyabanto aise kondora, takonyara koba moyo.” 21Naende Omonene akamotebia, “Rora, aase aiga are ang’e nainche, aye oranyare gotenena egetare igoro. 22Erio ekero obonene bwane borabe bogoeta, ninkobeke ase omotaro bw’egetare keria, na ngotube nokoboko kwane, goika imbe naetire. 23Erio ndusie okoboko kwane, na aye ondore amagega aane, korende obosio bwane tokonyara koborora.”
Currently Selected:
OKONG’ANYA 33: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
