OKONG’ANYA 32
32
Emori y’etahabu
(Okoir 9:6–29)
1Ekero abanto baroche ng’a Musa otebanire goika korwa ase egetunwa, bagasangererekana amo, bagachiera Haroni, bakamotebia, “Inchuo aa, tokorere enyasae eratotang’ane, ekiagera titomanyeti eki kiamonyorire Musa, oyo otong’anyetie korwa ase ense ya Misiri.”
2Haroni akabatebia, “Rusia ebigera bie chitahabu bire ase amato ’abakungu baino, na ase abana baino, abamura na abaiseke, mobindetere.” 3Erio abanto bonsi bakarusia ebigera bie chitahabu biare ase amato abo, bakamobiirera Haroni. 4Ere akanyora ebinto ebi korwa ase amaboko abo, akanyititora chitahabu chiria. Ekero yabwatanire, akayebomba, ekaba omogwekano bw’emori eeri.
Abanto bagateba, “Abaisraeli aba, eye nero enyasae yaino, eyabang’anyetie korwa ase ense ya Misiri.”
5Ekero Haroni ayeroche, akaagacha egesasimero bosio bw’omogwekano oria. Erio akararia, akabora, “Ankio nigo rirabe Rituko Rinene ri’Omonene.” 6Rituko ria kabere abanto bakaimoka mambia chuni, bakarua ekeng’wanso ki’ogosambwa, bakarenta na ekeng’wanso ki’omorembe. Abanto bagaikaransa, bakaria na konywa, erio bakaimoka gotenga.
7Korende Omonene agatebia Musa, “Tirimboka gochia inse, ekiagera abanto abwo bao kwang’anyetie korwa ase ense ya Misiri besaririe ase ogokora amabe, 8baonchokire bwango, batigire enchera eria nabachigete gotunyana, bekoreire emori eeri y’etahabu. Bayesasimire na koyeruera ekeng’wanso, bagoteba: Abaisraeli aba, eye nero enyasae yaino, eyabang’anyetie korwa ase ense ya Misiri.” 9Ase igo agatebia Musa, “Narorire abanto aba ng’a nabanyabigoti bikong’u. 10Bono tiga endamwamu yane yoke igoro asebare, erinde mbasirie, erio ngokore aye obe egesaku ekenene.”
11Korende Musa agasorora Omonene, Nyasae oye, akabora, “Omonene nase ki endamwamu yao egwoka igoro y’abanto bao, abakwang’anyetie korwa Misiri ase okobua okonene, na ase okoboko kwao gwe chinguru? 12Inee! Nigo origetie Abamisiri batebe: Igo abarusia aa, oganetie kobaita ase ebitunwa na kobasiria kegima? Ase igo onchoka korwa ase endamwamu yao enene, tokora amabe aya kwarengereirie gokorera abanto bao. 13Inyora abasomba bao Ibrahimu, na Isaka, na Israeli, na buna kwabarierete eira ase ogwetiania, okabatebia: Nigo ndamente oroiboro rwaino robe oronge buna ching’enang’eni chia igoro. Nimbae ense eye yonsi nabarierete eira ng’a nimbae ebe omwando obo kare na kare.” 14Erio Omonene akaonchoka, tabakorera amabe aria konya arengereirie gokorera abanto baye.
15Musa akeonchora, agatirimboka korwa ase egetunwa igoro, na ase amaboko aye obwate chibao ibere chi’amagena chirikire oborori chinsemo chionsi ibere, bosio na nyuma. 16Chibao echio nigo chiaroisetigwe na Nyasae omonyene, na amariko aya nigo arikire na Nyasae, amang’eire ase chibao chiria.
17Yoshua akaigwa eriogi ri’abanto bakwoga, agatebia Musa, “Naigure eriogi ase egetwori, eriogi buna eri’esegi.”
18Musa akamoiraneria, “Eriogi eri tiriri eri’abanto babuire esegi, gose eri’okorera kw’abanto babuirwe, korende eriogi naigure neri’abanto bagotera.”
19Musa gaikire ang’e negetwori akarora emori eria, na buna abanto baare gotenga, akaba nendamwamu enene; agaakera inse chibao chiria abwate maboko aye, chigaateka, chikaba ebisamunye ase egetunwa inse. 20Erio akabwata emori eria bakorete, akayesamba na koyesegenyia goika ekaba orotu, akaroitera ase amache ime, na akaa Abaisraeli amache ayio, na barabwo bakanywa. 21Agwo Musa akaboria Haroni, “Naki abanto aba bagokorete goika okagera bagakora ebibe ebinene buna ebi?”
22Haroni akamoiraneria, “Omonene one, toba nendamwamu entindi, aye nomanyete abanto aba ng’a nababe. 23Naki nigo bantebia: Tokorere enyasae eratotang’ane, ekiagera titomanyeti eki kiamonyorire Musa, oyo otong’anyetie korwa Misiri. 24Inche: nkabatebia: Onde bwensi obwate etahabu ayerusie. Barabwo bagachirusia, bagaching’a, na inche ngachiruta ase omorero ime, na emori eye ekabao.”
25Musa akarora abanto bakoonchobana, na buna Haroni abatigete baonchobane na gosasima omogwekano oria, ase amasio ’ababisa babo. 26Agwo Musa agatenena geita ki’egetwori, akabora, “Onde bwensi oyore ensemo y’Omonene ache aa asende.” Abalawi bonsi bagasangererekana asare. 27Ere akabatebia, “Omonene, Nyasae bw’Abaisraeli, otebire iga: Kera oyomo oino abogorie omoyio oye o birende, agende aaria na aaria ase egetwori korwa geita ekemo goika ekende. Kera oyomo aite onde bwensi aranyore, nonya noyomwabo, gose omosani, gose omogisangio.” 28Abalawi bagakora buna Musa abatebetie, na abanto chilifu isato bagaitwa ase rituko erio. 29Musa akabatebia. “Rero inwe mweatananire ase ogokorera Omonene, ekiagera timwarengereretie abana baino gose abamino; ase igo Omonene obasesenirie rero.”
30Rituko ria kabere Musa agatebia abanto, “Mwakorire ebibe ebinene mono. Na bono ngotiira inde gochia ase Omonene, aande nabo ndabanyorere okobwatanigwa, ekiagera mwakorire ebibe.” 31Naende Musa akairana gochia ase Omonene, akamotebia, “Abanto aba bakorire ebibe ebinene mono, bekoreire enyasae y’etahabu. 32Na bono, koranche, obaabere ebibe biabo. Onye taibo, rirorio otinyie erieta riane korwa ase ebuku eria kwarigete.”
33Omonene akairaneria Musa, “Omonto oria onkoreire ebibe, nere ndatinyie erieta riaye korwa ase ebuku yane. 34Korende bono genda, oraae abanto abwo goika aase aria nagotebetie; omomalaika one nagotang’ane. Korende rituko ndiche ekero ndabae egesusuro ase engencho y’ebibe biabo.”
35Omonene akabaa egesusuro, ekiagera bagerete Haroni agakora emori eria, bakayesasima.
Currently Selected:
OKONG’ANYA 32: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
