OKONG’ANYA 31
31
Abakori emeremo b’Obomenyo bwa Nyasae
(Okong’ 35:30—36:1)
1Omonene agakwana na Musa, akamotebia, 2“Rora, nachorire Besaleli, oyore mosinto o Uri, mochokoro o Huri, bw’egesaku kia Yuda. 3Inche Nyasae namoichoirie omoika one, namoeire obong’aini ne chisemi amanye gokora emeremo ende yonsi y’oboroisia, 4abe oyomanyete koroberia na koroisia ebinto bie chitahabu, ne chifeta, ne chitaai. 5Ere abe okobaacha amagena e rigori rinene na koyabeka ase ebikonde, na kobaacha emete, na gokora emeremo ende yonsi y’oboroisia. 6Nachorire Oholiabu, mosinto bw’Ahisamaki bw’egesaku kia Dani amokonye ase emeremo eyio. Nabaeire abaroisia bande bonsi obong’aini, erinde banyare gokora ebinto bionsi ebi nagochikire. 7Barabwo baroisie Eema y’Omosangererekano, na Esanduku ebe ne chibao chirikire oborori, na Oboikaranso bw’Amabera, na ebinto bionsi bi’Eema eyio, 8emesa na ebinto birabeo, ekebekerero gie chitaya gi’etahabu echenire na ebikorero biaye na egesasimero ase ubani erasamberwe, 9egesasimero ase ebing’wanso birasamberwe na ebikorero biaye, na egetuba amo nenterekerero yaye, 10ne chianga chingiya chinchenu chia Haroni omokuani, na echi’abamura baye, echi barabeke ekero bagokora emeremo y’obokuani, 11na amaguta akweakwa, na ubani ere ne rimisu rigiya esamberwe Aase Aachenu ime. Ase ogokora ebinto ebi bionsi goika bakore buna nagochikire kegima.”
Esabato, rituko ri’ogotimoka
12Omonene agakwana na Musa, akamotebia. 13“Kwana n’Abaisraeli obatebie: Goika morende Chisabato chiane, ekiagera echio nekemanyererio egati yane nainwe ebiaare ase ebiaare, erinde momanye ng’a ninche Omonene oyokobachena. 14Ase igo morende rituko ri’Esabato, ekiagera ne rituko richenu asemore. Onde bwensi aise korisaria, nigo araitwe akwe. Onde bwensi aise gokora emeremo ase rituko erio nigo araatananwe korwa ase egesaku ki’abanto b’Omonene. 15Mokore emeremo amatuko atano na rimo, korende rituko ria gatano na kabere n’Esabato Enchenu, rituko ri’ogotimoka, richenu ase Omonene. Onde bwensi aise gokora emeremo ase rituko erio goika aitwe akwe. 16Nabo Abaisraeli goika babwate na korenda rituko ri’Esabato ebiaare ase ebiaare, ekiagera oko nokobwatana koragenderere botambe. 17Rituko erio ribe ekemanyererio keragenderere egati yane na Abaisraeli, ekiagera ase amatuko atano na rimo inche Omonene natongete igoro na ense, korende ase rituko ria gatano na kabere ngatiga emeremo yane yonsi, na gotimoka.”
18Ekero Omonene akoorire gokwana na Musa agwo ase egetunwa gia Sinai, akamoa chibao ibere chi’amagena chirikire oborori nekiara kia Nyasae.
Currently Selected:
OKONG’ANYA 31: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
