OKONG’ANYA 30
30
Egesasimero ase ubani egosamberwa
(Okong’ 37:25–28)
1“Oroisie egesasimero gie chibao chi’emekonge ase ubani egosamberwa. 2Obotambe bwaye bobe obw’ekerengo gi’okoboko okomo, na obogare bwaye okoboko okomo; nabo chinsemo chiaye inye chibe chireng’aine; na obotambe bwaye gochia igoro bobe amaboko abere. Emegwekano yaye ye chingunchara nigo eraroisigwe ebe egento ekemo negesasimero. 3Oyeoome netahabu echenire, igoro yaye, ne chinsemo chiaye inye, amo ne chingunchara chiaye; oyeetananie omong’ororia bw’etahabu. 4Okore chibonyi ibere chie chitahabu ochibeke inse y’omong’ororia chinsemo ibere, na emiaro esoigwe imeo, erinde egesasimero kenyare kobogorerigwa. 5Obaache emiaro eria korwa ase emekonge, oyeoome netahabu. 6Obeke egesasimero ekio bosio bw’etoto eria ekengete aase aria esanduku egachire, eria ere ne chibao chirikire oborori amo n’Oboikaranso bw’Amabera igoro yaye. Aase agwo ndabe nkoumerana naye. 7Kera emambia ekero Haroni akoroisia chitaya nabe ogosambera agwo ubani egotioka buya, 8naende ekero arabe ogwokia chitaya engaki ya mogoroba. Ogosambwa okwo kwa ubani nigo koragenderere botambe ase obosio bw’Omonene, ebiaare ase ebiaare. 9Timobaisa gosamba ubani eye etachikiri, gose ekeng’wanso ki’ogosambwa, gose okoruegwa kw’endagera, gose timobaisa koumora okoruegwa gw’ekenyugwa igoro yaye. 10Ara rimo kera omwaka Haroni akore okobwatanigwa ase emegwekano ye chingunchara ere ase chikoona chi’egesasimero. Naboigo ara rimo kera omwaka nakorere egesasimero okobwatanigwa namanyinga ’ekeng’wanso ki’ebibe. Ayio nigo arakorerwe ebiaare ase ebiaare. Egesasimero ekio nagiatananwe kebe egechenu mono ase Omonene.”
Ebango y’Obomenyo Obochenu
11Omonene agakwana na Musa, akamotebia, 12“Ekero orabe gokobara Abaisraeli ase okorikwa kwabo, kera omonto arue ekeegwa ase Omonene, kebe embooria ase obogima bwaye, tibabaisa konyora amaakwa ekero bakorikwa. 13Ase igo, kera omonto oyorache korikwa goika arue ekeng’ese gi’esekeli ase ekerengo gi’esekeli egokorerwa ase Obomenyo Obochenu, ebe ekeegwa ase Omonene. (Esekeli eyemo nechigera emerongo ebere.) 14Kera omonto oyorarikwe, engencho yaye oyokoorire emiaka emerongo ebere na goetania, goika arue ekeegwa eke ase Omonene. 15Oyore omonda takorua goetania ekeng’ese gi’esekeli, gose oyore omotaka takorua inse y’ekio, ekero morarue ekeegwa ekio ase Omonene. Kerokio kebe embooria ase obogima bwaino. 16Koranyore chibesa echi Abaisraeli bararue chibe embooria, ochikorere ase emeremo y’Eema y’Omosangererekano. Ase igo Abaisraeli babe bakoinyorwa ase obosio bw’Omonene, naende chibesa echio chibe embooria ase obogima bwabo.”
Egetuba gi’etaai
17Omonene agakwana na Musa, akamotebia, 18“Oroisie egetuba gi’etaai amo nenterekerero yaye y’etaai. Okebeke egati y’Eema y’Omosangererekano na egesasimero, na obeke amache imeo. 19Haroni na abamura baye bagwesibia amaboko na amagoro ase amache ayio. 20Ekero bagosoa ase Eema y’Omosangererekano goika besibie ase amache ayio, tibabaisa gokwa; naboigo ekero bakogenda ase egesasimero ase okoruera Omonene ekeng’wanso ki’omorero 21Barabwo babe bagoisaba amaboko, basibie na amagoro, tibabaisa gokwa. Ayio nigo arabe ogochika koragenderere asare na ase ororeria rwaye ebiaare ase ebiaare.”
Amaguta akweakwa
22Naende Omonene agakwana na Musa, akamotebia, 23“Oimokie ebinto bigotioka buya: Amaguta a manemane chikiro ikomi, na omodalasini ore ne rimisu rigiya chikiro isano, na amanukato are ne rimisu rigiya chikiro isano, 24na kasia chikiro ikomi. (Bionsi bibe bi’ekerengo kegokorerwa ase Obomenyo Obochenu). Oimokie na amaguta ’emezeutini ebituba bine. 25Ase ebinto ebio oroisie amaguta akweakwa ase chisemi chi’omoroisia omong’aini, abe amaguta amachenu akweakwa. 26Oake Eema y’Omosangererekano, na Esanduku ere ne chibao chirikire oborori, 27na emesa amo nebinto bireo, na ekebekerero gie chitaya amo nebikorero biaye, na egesasimero ase ubani egosamberwa, 28na egesasimero ase ebing’wanso bigosamberwa amo nebikorero biaye, na egetuba amo nenterekerero yaye. 29Naboigo oraatanane ebinto ebi, obikore ebichenu kegima, erio onde bwensi orabikune abe omochenu. 30Haroni na abamura baye obaake amaguta na kobaatanana babe bagonkorera ase emeremo y’obokuani. 31Kwana n’Abaisraeli, obatebie ng’a amaguta aya akweakwa abe amachenu asende egati yaino ebiaare ase ebiaare. 32Tabaisa goakwa ase emebere ya mwanyabanto. Timoroisia amaguta ande anga buna ayio. Ayio namachenu, nabe amachenu asemore. 33Monto onde bwensi aise koroisia amaguta buna ayio gose koyaaka omonto omoao, oyotari omokuani, nigo araatananwe korwa ase egesaku kiaye.”
Amanukato
34Omonene agatebia Musa, “Oimokie ebinto bigotioka buya: Oborembo bwa nafiti, na amaguta ’amakorogonte na oborembo bwa kalibani, na ebinto binde ebiansu, na ubani engiya; kera egento kebe gi’ekerengo ekemo. 35Korwa ase ebinto ebio oroisie amanukato oyaroisie ase chisemi chi’omoroisia omong’aini ebekwe omonyo, abe amarabu achenire. 36Orusie bike, erio obiswage bibe obosie. Obeke boke bosio bw’Esanduku ere ne chibao chirikire oborori, ase Eema y’Omosangererekano, aase ndaumerane naye. Amanukato ayio abe amachenu mono asemore. 37Timweroiseria amanukato ande onsi y’ogosambwa anga buna ayio. Abe asemore amachenu ase obosio bw’Omonene. 38Monto onde bwensi aise koroisia amanukato anga buna ayio ase okwegokeria rimisu riaye nigo araatananwe korwa ase egesaku ki’abanto b’Omonene.”
Currently Selected:
OKONG’ANYA 30: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
