OKONG’ANYA 29
29
Haroni na abamura baye bagwatananwa ase emeremo y’obokuani
(Abal 8:1–36)
1“Aya naro orakore ase Haroni na abamura baye ase okobaatanana, babe bagonkorera ase emeremo y’obokuani: Orusie eeri ensae ne chimingichi ibere chitari na kemocho ase emebere yabo. 2Orusie boigo emegati etabekiri memera na amaandasi atabekiri memera, biroisirie namaguta, na emegati emeoo eakire amaguta. Emegati eyio yonsi eroisigwe korwa ase obosie obonuke bw’engano. 3Oyebeke ase egetonga, oyendetere ebe egetonga ime ekero okondetera ekeng’wanso ki’eeri na egie chimingichi chiria ibere.
4“Erio orente Haroni amo nabamura baye ase egesoero ki’Eema y’Omosangererekano, obasibie namache. 5Oimokie chianga chiria, obekere Haroni: Eganchwa erobekanirie egoika inse, na eganchwa eria ende, na egesibao ki’obokuani na egesembe keria; omoboerie norokini rw’egesibao. 6Omobekere na ekegogwa omotwe oye, na ase ekegogwa eke osiberanie ekemanyererio keria egechenu gekoorokia ng’a bwatananirwe. 7Erio oimokie amaguta akweakwa, omonyororokerie ase omotwe oye, omoyaake.
8“Orente na abamura baye, obabekere chianga. 9Obaboerie chinkini ebinema biabo, Haroni na abamura baye, na obabekere ebigogwa emetwe yabo. Ase enchera eyio bwatanane Haroni amo nabamura baye babe bagonkorera ase emeremo y’obokuani kogenderera botambe.
10“Orente eeri bosio bw’Eema y’Omosangererekano; Haroni na abamura baye babeke amaboko abo ase omotwe bw’eeri eyio. 11Erio oyenyenyere ase obosio bw’Omonene ase egesoero ki’Eema y’Omosangererekano. 12Oimokie amanyinga make, erinde ogindie nekiara kiao emegwekano ye chingunchara chi’egesasimero. Na amanyinga amatigari oyaumore inse ase egesasimero. 13Orusie ebitinya biria bitubete chinyama chi’enda; naboigo nebi’eriini, ne chinyigo chionsi ibere, amo nebitinya bichitubete; obisambere ase egesasimero igoro. 14Korende chinyama chi’eeri eyio, ne risankwa, na eubi yonsi y’enda obisambere isiko y’egetwori. Ekio nekeng’wanso ase engencho y’ebibe.
15“Orente emingichi eyemo ase echio ibere, na Haroni na abamura baye babeke amaboko abo ase omotwe oye. 16Erio oyenyenye na oitorore amanyinga aye ase egesasimero chinsemo chionsi. 17Onache chinyama chi’emingichi eria chibe ebing’ese; osibie chinyama chi’enda eria amo nebirenge, na obibeke igoro y’ebing’ese biria na omotwe oye. 18Osambere chinyama echi chionsi chi’emingichi ase egesasimero igoro. Eke nekeng’wanso ki’ogosambwa ase Omonene, ekeng’wanso ki’omorero kere ne rimisu rigiya rikogwenera Omonene.
19“Erio orente emingichi eria ende, na Haroni na abamura baye babeke amaboko abo ase omotwe oye. 20Nyuma y’ayio oyenyenye, orusie amanyinga make, na ase amanyinga ayio ogindie mesia y’ogoto kwa borio kwa Haroni amo na mesia y’amato ’abamura baye; ogindie boigo ebiara ebinene bi’amaboko abo a borio, na ebiara ebinene bi’amagoro abo a borio. Oitorore amanyinga amatigari ase egesasimero chinsemo chionsi. 21Orusie amanyinga make ayare ase egesasimero, na amaguta ayio akweakwa, onyororokerie Haroni ne chianga chiaye, na abamura baye, ne chianga chiabo. Naboigo Haroni na abamura baye baatananwe ase emeremo emechenu, amo ne chianga chiabo.
22“Orusie ebitinya bi’emingichi eyio, na omokera oye ore omonoru, na ebitinya bitubete chinyama chi’enda, na ebi’eriini, ne chinyigo chionsi ibere amo nebitinya bichitubete, na ebachwa ya borio, ekiagera emingichi eyio nigo yarurwe ase ogwatanana abakuani ase emeremo emechenu. 23Orusie omogati oyomo, ne rindasi erimo riroisirie namaguta, na omogati oyomo omoo, ebio bitabekiri memera, bire ase egetonga ime, bibekire ase obosio bw’Omonene. 24Ebi bionsi obibeke ase amaboko a Haroni amo nay’abamura baye, obisungusie bibe okoruegwa ase Omonene. 25Erio obirusie ase amaboko abo, obisambere ase egesasimero igoro y’ekeng’wanso keria kere ne rimisu rigiya rikogwenera Omonene. Eke nekeng’wanso ki’omorero.
26“Obogorie ritaana ri’emingichi eyio yarurwe ase ogwatanana Haroni, orisungusie ribe okoruegwa ase Omonene. Nerio naribe eriao, erigotungetie korwa ase eng’iti eyio.
27“Naboigo oraatanane ritaana ri’emingichi eyio yarurwe ekeng’wanso amo nekenama kiaye, ebitari ebio bi’emingichi eyio bibe ebitungetie Haroni amo nabamura baye. 28Ebi nigo birabe bitungetie Haroni amo nabamura baye kogenderera botambe korwa ase Abaisraeli, bibe ekeegwa ki’Omonene korwa asebare, ekeng’wanso kiabo ki’omorembe.
29“Chianga chiria chinchenu chia Haroni nigo chiraegwe ab’ororeria rwaye nyuma gakure, bachieboyie ekero bagochia goakwa amaguta na gwatananwa. 30Omomura o Haroni, oyorabogorie emeremo y’obokuani ase ribaga riaye, goika eboyie chianga echi engaki y’amatuko atano na abere, ekero agochia gosoa Eema y’Omosangererekano na gokora emeremo ime y’Aase Aachenu.
31“Oire emingichi eria yarurwe ase ogwatanana abakuani ase emeremo emechenu, oiyekere chinyama chiaye aase aatananire. 32Agwo ase egesoero ki’Eema y’Omosangererekano, Haroni na abamura baye barie chinyama chi’emingichi eria amo nemegati ere ase egetonga ime. 33Barabwo barie ebinto ebi biarurwe ase ogokora okobwatanigwa ekero baatananetwe ase emeremo emechenu. Monto onde omoao takoba ne ribaga ri’okobiria, ekiagera ebinto ebi nebichenu. 34Onye chinyama gose emegati bigotigara goika mambia, erio obisambe nomorero; tibibaisa koriegwa, ekiagera nebichenu.
35“Naboigo orakorere Haroni amo nabamura baye koreng’ana buna nagochikire. Ogwatananwa kwabo kobe gokogenderera ase engaki y’amatuko atano na abere. 36Kera rituko orue eeri ebe ekeng’wanso ki’ebibe ase ogokora okobwatanigwa. Ase okorua ekeng’wanso ase okobwatanigwa nigo orabe kogochena egesasimero. Erio ogeake amaguta na kogiatanana ase emeremo emechenu. 37Ase engaki y’amatuko atano na abere obe gokogenderera gokora okobwatanigwa ase egesasimero na kogechena mono; na kera egento kerabe gekogekuna, nigo kerabe egechenu.”
Ebing’wanso bia kera rituko
(Omob 28:1–8)
38“Na ebing’wanso orabe gokorua igoro ase egesasimero nabio ebi: Kera rituko botambe, orue chimanwa ibere chie ching’ondi echiakoorire omwaka oyomo. 39Emanwa eyemo y’echio oyerue mambia na eria ende mogoroba. 40Amo nemanwa eria entang’ani orue ebimunu bibere bi’obosie obonuke bwochoganirie namaguta amaya, egetuba ekemo na ekeng’ese, amitire korwa ase amazeituni. Naende goika orue edivai egetuba ekemo na ekeng’ese ebe okoruegwa gw’ekenyugwa. 41Emanwa eria ende oyerue mogoroba; oyerue amo nokoruegwa kw’endagera na ogw’ekenyugwa, buna gwakorete mambia, kobe ekeng’wanso ki’omorero kebe ne rimisu rigiya ase Omonene. 42Ekeng’wanso eke ki’ogosambwa kebe gekoruegwa ebiaare ase ebiaare botambe agwo ase egesoero ki’Eema y’Omosangererekano, ase obosio bwane, inche Omonene. Agwo ndabe nkoumerana nainwe, naende nkwane naye. 43Agwo ning’umerane n’Abaisraeli, na aase agwo ning’akore abe aachenu nobonene bwane. 44Ninchene Eema y’Omosangererekano amo negesasimero; naboigo ninchene Haroni amo nabamura baye babe bagonkorera ase emeremo y’obokuani. 45Inche nimenye ase egati y’Abaisraeli, imbe Nyasae obo. 46Barabwo nabamanye ng’a inche ninche Nyasae obo; ninche nabarusetie korwa ase ense ya Misiri, erinde imbe imenyete ase egati yabo. Inche ninche Nyasae obo.”
Currently Selected:
OKONG’ANYA 29: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
