OKONG’ANYA 34
34
Chibao chi’amagena chia kabere
(Okoir 10:1–15)
1Omonene agatebia Musa, “Baacha chibao chi’amagena ibere chire buna chiria chie ritang’ani, na inche nindike ase chibao echio amang’ana aria arenge ase chiria chie ritang’ani, echio gwatete. 2Oche bwebeke ang’e mambia, otiire gocha ase egetunwa gia Sinai, onganye aroro ase egechuria ki’egetunwa. 3Monto onde tatiira amo naye, gose monto onde tarorekana aande onsi ase egetunwa eke, gose ching’ondi ne chiombe tichiba chikorisia ang’e negetunwa eke.”
4Erio Musa akabaacha chibao ibere chi’amagena chire buna chiria chie ritang’ani, akaimoka mambia chuni, agatiira gochia ase egetunwa gia Sinai, buna Omonene konya amochikire, obogoretie chibao chiria ibere chi’amagena koboko kwaye. 5Omonene agaika ore riire ime, agatenena amo nere, akararia erieta riaye OMONENE.
6Omonene agaeta ase obosio bwa Musa, akeraria, “Omonene, Omonene, nere Nyasae omonyene amabera na obuya, tari omwango bw’okoba nendamwamu; nigo are nobwanchani botari koera, na obwegenwa. 7Nigo agokorera abanto chilifu obwanchani botari koera; ere nigo akwabera amamocho, na ogosaria, na ebibe, korende tagotiga koa abana na abachokoro egesusuro goika ekiaare kia gatato na egia kane ase engencho y’amabe ’abaibori babo.” 8Erio bwango Musa agatung’ama inse, agasasima, 9akabora, “Omonene, ekiagera bono nanyorire ogwancherwa ase obosio bwao, nagosabire ogende amo naintwe. Naki abanto aba nabanyabigoti bikong’u, korende otwabere ogosaria gwaito na ebibe biaito, otwanchere tobe abanto bao.”
Okobwatana kw’ogotianania kogokorwa naende
(Okong’ 23:14–19; Okoir 7:1–5; 16:1–17)
10Omonene akabora, “Rora, bono ngokora inde nainwe okobwatana kw’ogotianania. Ase amasio ’abanto bao bonsi ninkore ebikone ebio bitana gokoreka ase ense yonsi, gose ase egesaku kende gionsi. Na abanto bonsi abagoetanaine inabarore ogokora kw’Omonene, naki ayio ndagokorere namang’ana ay’okoondokia. 11Obwate amachiko ayio ndakoe rero. Norore ase obosio bwao ngoseria Abaamori, na Abakanani, na Abahiti, na Abaperisi, na Abahivi, na Abayebusi. 12Bwerende, tobaisa gokora okobwatana nabanyene ense eria ase okogenda, babaise kobatega mogwe. 13Inwe motagore ebisasimero biabo, mobiiyerie inse, na gosenyenta chisiiro chi’amagena ase bagosasimera, na emete y’enyasae enkungu Asera moyenache.
14“Tobaisa gosasima enyasae ende eng’ao, ekiagera Omonene nigo akorokwa Omonyaisemi, nere Nyasae bwe risemi. 15Tobaisa gokora okobwatana nabanyene ense eria, ekiagera ekero bagokora obotomani ase ogosasima chinyasae chiabo na gochiruera ebing’wanso, mbabaise kobarangeria inwe morie ebing’wanso biabo. 16Timobaisa konyuomeria abamura baino abaiseke b’abanto abwo, ekiagera abaiseke abwo, ekero baragende gokora obotomani ase ogosasima chinyasae chiabo mbabaise kogera abamura baino basasime chinyasae chiabo.
17“Tibwekorera chinyasae korwa ase ebioma binyititoire na kobombwa.
18“Orende rituko rinene ri’Emegati etabekiri memera; na buna nagochigete, orie emegati etabekiri memera ase amatuko atano na abere, ase engaki yachigetwe, y’omotienyi bw’Abibu, naki ase omotienyi oyio oyio noro kwaruete ense ya Misiri.
19“Kera omwana omoisia omotangi nabe oyone, ne ching’iti chintangi boigo, chibe chieri gose chimingichi. 20Korende emori entangi y’etigere goika oyeboorie ase okorua eng’ondi ebe ekeng’wanso. Onye tibwancheti koyebooria, goika oyebune ebigoti. Abana bao abaisia abatangi goika obaboorie. Onde tari orabe ogocha ase obosio bwane, inche Omonene, namaboko amasa.
21“Okore emeremo ase amatuko atano na rimo, korende rituko ria gatano na kabere otimoke, nonya nengaki y’okorema na eye rigesa.
22“Orende Rituko Rinene rie Chichuma, ase engencho y’ogotongora kw’engano, ne Rituko Rinene ri’Ogosangereria Rigesa, omoerio bw’omwaka.
23“Ara gatato kera omwaka abanto bao bonsi abasacha babe bagocha ase obosio bwane, inche Omonene, Nyasae bw’Abaisraeli. 24Nyuma konaseririe abanto b’ebisaku korwa asore na kogareyia orogongo rwao, onde tari orakoroure ase chingaki echi isato kera omwaka, ekero orabe kogocha ase obosio bwane, inche Omonene, Nyasae oo.
25“Ekero okondetera amanyinga ’ekeng’wanso, tobaisa koyandetera amo nomogati obekire ememera. Tobaisa gotigaria chinyama chinde chi’ekeng’wanso kie rituko rinene ri’Epasaka goika mambia.
26“Goika orente ase enyomba yane, inche Omonene Nyasae oo, ogotongora kwao okore okuya korwa ase omogondo oo.
“Tobaisa koiyekera emanwa y’embori ime y’amabeere ’eng’ina.”
27Omonene agatebia Musa, “Rika amang’ana aya, ekiagera ase amang’ana ayio nakorire okobwatana kw’ogotianania naye amo n’Abaisraeli.” 28Musa akabeera n’Omonene ase engaki y’amatuko emerongo ene, omobaso na obotuko, tare koria kende, gose konywa, akarika ase chibao echi ibere amang’ana ’okobwatana koria, Amachiko ayio ikomi.
Musa ogotirimboka korwa ase egetunwa
29Ekero Musa arenge gotirimboka korwa ase egetunwa gia Sinai, obwate ase okoboko kwaye chibao chirikire oborori, tamanya ng’a risankwa ri’obosio bwaye nigo riare komeka‐meka, ekiagera konya okwanire n’Omonene. 30Haroni na abanto bonsi, ekero baroche buna risankwa ri’obosio bwa Musa riare komeka‐meka, bakoboa komoika ang’e. 31Korende Musa akabarangeria, erio Haroni amo nabatang’ani bonsi b’omosangererekano bakairana asare, na Musa agakwana nabarabwo. 32Nyuma y’ayio Abaisraeli bonsi bagacha ase Musa, na ere akabaa amachiko onsi aya Omonene konya amoeire ase egetunwa gia Sinai. 33Ekero Musa akoorire gokwana nabarabwo, akabeka egietubo ase obosio bwaye. 34Ekero kende gionsi Musa are gosoa eema ase obosio bw’Omonene gokwana nere, nigo are korusia egietubo goika osoka korwa aroro. Ekero asokire aba ogotebia Abaisraeli amang’ana onsi aya achikirwe gokwana, 35na barabwo baba bakorora risankwa ri’obosio bwaye rikomeka‐meka. Erio Musa abeka egietubo ase obosio bwaye goika airana naende gokwana n’Omonene.
Currently Selected:
OKONG’ANYA 34: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
