OKONG’ANYA 16
16
Mana ne chinkware
1Omoganda bwonsi bw’Abaisraeli bakamanora na koimoka korwa Elimu, na ase rituko ria ikomi na gatano ri’omotienyi o kabere nyuma kobarure ense ya Misiri, bagaika ase erooro ya Sini, eyio ere egati y’Elimu na Sinai. 2Abaisraeli bonsi bakemurunganeria Musa na Haroni aaria ase erooro, 3bakabatebia, “Nanga mbuya onye twakwerete ase amaboko ’Omonene aaria ase ense ya Misiri. Agwo twaikaransete ase chinyongo chie chinyama, tware koria endagera enyinge, twaigota. Korende bono mwatorentire aa ase erooro ase ogotoita intwe twensi nenchara.”
4Erio Omonene agatebia Musa, “Rora, nimbatwerie omogati korwa igoro. Kera rituko abanto bagende isiko, basangererie eyekobaisana ase rituko erimo. Naboigo mbateeme gose mbaganetie kobwatia amachiko aane, gose yaya. 5Korende rituko ria gatano na rimo goika basangererie na koroisia ara kabere buna bagosangereria amatuko ande.”
6Erio Musa na Haroni bagatebia Abaisraeli bonsi, “Mogoroba rero inwe nario moramanye ng’a Omonene nere obarusia korwa ase ense ya Misiri, 7na mambia inamorore obonene bw’Omonene, ekiagera ere oigure buna mwamwemurunganeirie. Ee, ere mwamwemurunganeirie, tari intwe. Intwe inki toisaine?” 8Naende Musa agateba, “Erio nario moramanye obonene bw’Omonene ekero arabae chinyama morie mogoroba, na mambia abae omogati morie, moigote. Naki Omonene oigure buna mwamwemurunganeirie. Intwe titoisaini gento. Tari intwe mwemurunganeirie, korende n’Omonene.”
9Musa agatebia Haroni, “Batebie omoganda bwonsi bw’Abaisraeli basuke gocha ase obosio bw’Omonene, ekiagera oigure okwemurungania kwabo.” 10Ekaba ekero Haroni arenge gokwana nomoganda bwonsi bw’Abaisraeli, barabwo bakeonchora bakarigereria gochia ase erooro, bakarora obonene bw’Omonene bokooroka korwa ase riire. 11Omonene agakwana na Musa, akamotebia, 12“Naigure okwemurungania kw’Abaisraeli. Kwana nabarabwo, obatebie ng’a engaki ya mogoroba mbaegwe enyama barie, na mambia inabaigote omogati. Erio bamanye ng’a ninche Omonene, Nyasae obo.”
13Mogoroba chinkware chigacha, chigaichora ase batoorete, na inkio mambia aase onsi aetanaine aase aria akanyorwa atoorire riime. 14Na ekero riime riakamokire, bakarora inse aria ase erooro ebinto binga buna amagoocho, bikarorekana buna obosie oborabu. 15Ekero Abaisraeli babiroche tibamanyete gose mbinto ki, bagachaka koborania barabwo ase barabwo, “Mbinto ki biria?”
Musa akabatebia, “Oria nomogati oyo Omonene abaeire morie. 16Ring’ana erio nario Omonene achigete: Sangereria endagera eyio, kera oyomo buna agwenerete, ebimunu bibere ase kera omonto. Kera omonto asangererie buna abwate abanto bang’ana ase eema yaye.”
17Abaisraeli bagakora bo, bagasangereria abande enyinge, na abande enke. 18Korende ekero bayerengete ase ebirengo, oyosangereretie enyinge tatigaria kende, na ere oyosangereretie enke taremeretwe gento. Kera oyomo konya osangereirie buna okoria kwaye kwang’ana. 19Musa akabatebia, “Monto onde tatigaria endagera ende goika mambia.” 20Korende tibaigwera Musa; abande bagatigaria eyende goika rituko ria kabere, na mambia yaye bakayenyora yagundire na yasoirwe namakonde, na Musa akababea mono. 21Ase igo kera emambia bakaba bagosangereria kera oyomo buna okoria kwaye kwang’ana; korende ekero omobaso oyesambire, yanyititoka.
22Ase rituko ria gatano na rimo baba bagosangereria endagera eria ekerengo ara kabere, ase kera omonto ebimunu bine. Abagaaka bonsi b’omoganda bakagenda gotebia Musa amang’ana ayio. 23Ere akabairaneria, “Ring’ana erio nario Omonene konya atebire: Ankio nerituko richenu ri’ogotimoka, Esabato Enchenu yaatananirwe ase Omonene. Mosambe eki moganetie gosamba, na moiyeke eki moganetie koiyeka, na ebiratigare mobigache goika ankio.” 24Na buna Musa abachigete bakagacha endagera eria yatigarete goika rituko ria kabere; ero tiyagunda etioke, gose tiyasogwa namakonde. 25Musa akabatebia, “Karie eye rero, ekiagera rero n’Esabato yaatananirwe ase Omonene. Rero timokoyerora isiko ase erooro. 26Ase amatuko atano na rimo mobe mokoyesangereria. Ase rituko ria gatano na kabere n’Esabato, endagera eyio tegotoka ase rituko erio.”
27Ase rituko ria gatano na kabere abande ase abanto baria bakagenda koyesangereria, tibayenyora. 28Omonene agatebia Musa, “Ngoika ririri morabe mokwanga ogotebereria kwane na amachiko aane? 29Inyora ng’a inche Omonene nabaeire Esabato. Ase rituko ria gatano na rimo nkobaa endagera y’amatuko abere. Ase ayio, ase rituko eri ria gatano na kabere mobeere kera omonto aase aye, onde tabaisa korua inka.” 30Naboigo abanto bakaba bagotimoka ase rituko ria gatano na kabere.
31Abaisraeli bakaroka endagera eyio mana; ero nigo yare buna chinyeke chi’amaemba enkomba, chindabu, na obwansu bwaye nigo bware buna omogati ore nobooke. 32Musa akabatebia, “Ring’ana eri nario Omonene achigete: Ebimunu bibere bi’endagera eye egachwe ase engencho ye chinderia chiaino, erinde banyare gocha korora omogati oyo nabaete mokoria ase erooro, ekero nabarusetie korwa ase ense ya Misiri.” 33Musa agatebia Haroni, “Imokia ekeguuru, obeke ebimunu bibere bia mana imeo, oyebeke ase obosio bw’Omonene egachwe ase engencho y’ebigori bigochi‐gocha.” 34Buna Omonene achigete Musa, naboigo Haroni ayebegete bosio bw’Esanduku ere ne chibao chirikire oborori, ekagachwao. 35Abaisraeli bakagenderera koria mana engaki y’emiaka emerongo ene, goika bagaika aase abanto bamenyete; bakayeria goika bagaika orobebe rw’ense ya Kanani. 36(Ekerengo ki’ebimunu bibere ekio nensemo ya ikomi y’ekerengo gi’efa.)
Currently Selected:
OKONG’ANYA 16: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
