OKONG’ANYA 15
15
Ogotera kwa Musa
1Erio Musa na Abaisraeli bakamoterera Omonene ogotera oko, bagoteba:
“Nimoterere Omonene, ekiagera ere obuire ase okobua okonene;
chibarasi amo nabachiriinete obarimeirie ase enyancha ime.”
2“Omonene nere chinguru chiane, nimoterere ere,
ere nogotooreka kwane.
Ere Nyasae one, nimotogie;
ere Nyasae o tata, ninterere obonene bwaye.
3Omonene nomorwani bwe chisegi,
Omonene nario erieta riaye.
4Orutire chigari chia Farao amo nomoganda oye ase enyancha ime;
abarwani baye abachore obarimeirie ase Enyancha Embariri.
5Amache abatubire, barimeire chindiba ime buna rigena rikorutwa.”
6“Omonene, okoboko kwao gw’okorio nkore nokobua okonene,
Omonene, okoboko kwao gw’okorio ngosenyente ababisa.
7Ase okobua kwao okonene nigo okobaiyeria inse abagokoimokera;
endamwamu yao egwoka, nigo ekobasamba buna chimboba chinyomo.
8Endamwamu yao entindi ekagera amache akaimoka,
agatenena buna orwaki,
enyancha egakamoka goika inse kegima.”
9“Omobisa agateba,” “Nimbabwatie, mbaikeere,
mbiatanane ebi ndasakore, omoyo one oisaneke;
ninsomore omoyio one o birende, k nimbasirie nokoboko kwane.”
10Naboigo ekero aye kwagusete buna omwaga, amache akabamera;
bakamerwa buna embunde ekorimera ase amache amange ime, yarika inse.
11“Omonene, ning’o onga buna aye ase egati ye chinyasae?
Ning’o onga buna aye ore nobonene na obochenu?
Naye ogwenerete koirokwa na gotogigwa, aye naye oyogokora amakumia.
12Ekero kwaramborete okoboko kwao gw’okorio, ense ekabamera.”
13“Ase obwanchani bwao botari koera okaraa abanto aba kwabooretie,
ase chinguru chiao okabaikia ase obomenyo bwao obochenu.
14Abanto b’ebisaku bakayaigwa, bagatengechigwa ase omoondoko,
omoichano na obororo bikabwata abamenyete Bofilisti.
15Abagambi b’Edomu bakaondoka, abanto abanene ba Moabu bakabwatwa nomotengecho,
na abanto bonsi ba Kanani bakerusia moyo.
16Omoondoko na obwoba bikababwata;
ase engencho y’okobua gw’okoboko kwao bagatenena,
bagakira‐kiri buna amagena,
goika abanto bao baetire, ee, Omonene,
goika abanto bao kwabooretie baetire.
17Nobasoyie na kobabeka ase egetunwa kiao aye omonyene,
aase aria kweroiseretie, aye Omonene,
obomenyo obochenu kwaagachete namaboko ao.
18Omonene nagambe kare na kare.”
Ogotera kwa Miriamu
19Ekero chibarasi chia Farao, amo ne chigari na abariini basoete nyancha ime, Omonene akairania amache igoro yabo, akabatuba; korende Abaisraeli bagaeta egati y’enyancha ase ense enkamoku.
20Na Miriamu omobani, omoiseke omwabo Haroni, akaimokia ekebangarara kiaye, na abakungu bonsi bakamobwatia bakobugia ebibangarara biabo na gotenga. 21Miriamu akabaitaberia, na gotera,
“Moterere Omonene, ekiagera ere obuire ase okobua okonene,
chibarasi amo nabachiriinete obarimeirie ase enyancha ime.”
Chinsoko chire namache amaroro
22Musa agatang’ana Abaisraeli kogenda orogendo korwa ase Enyancha Embariri gochia erooro ya Suri. Ase engaki y’amatuko atato bagataara ase erooro, tibanyora amache. 23Erio bagaika aase are korokwa Mara,#15:23 Mara, engencho yaye: obororo tibanyara konywa amache arengeo, ekiagera arenge amaroro mono. Nakio kiagerete aase aria akarokwa Mara. 24Agwo abanto bakemurunganeria Musa, bakamoboria, “Ninki tokonywa?” 25Musa akarera ase Omonene, na Omonene akamworokia omote. Omote oyio Musa akayoruta amache ime, na amache aria akaba amaansu.
Agwo Omonene akabekera abanto amachiko akobaraa, na agwo akaba okobateema. 26Akabora, “Oise koigwera aya inche Omonene Nyasae oo ngokwana, na koyakora ayare boronge ase amaiso aane, na gotegerera amachiko aane, na kobwata emeroberio yane yonsi, rirorio inche tingokobekera amarwaire ande onsi buna aria nabekerete Abamisiri; naki ninche Omonene oo, oyogokogwenia.”
27Erio abanto bagaika Elimu; agwo chinsoko nchiarengeo ikomi na ibere, na emekendo emerongo etano na ebere. Bagatoora agwo ang’e namache.
Currently Selected:
OKONG’ANYA 15: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
