OGOKORA KW’ABATOMWA 13

Ekanisa y’Antiokia

1Ase ekanisa y’Antiokia mbarengeo ababani na aborokia: Barnaba na Simeoni, oyo ore korokwa Nigeri, na Lukio Omokurene, na Manaeni oyo orereretwe amo nomoruoti Herode, na Saulo. 2Abaiga, ekero barenge gosasima Omonene, na kweng’ata, Omoika Omochenu agateba, “Nchorere Barnaba na Saulo ase emeremo eria nabarangereretie bayekore.”

3Erio kobakoorire okweng’ata na ogosaba bakababekera amaboko, bakabatiga bagende.

Barnaba na Saulo ase Kuporo

4Abwo babere bagatomwa n’Omoika Omochenu, bagatirimboka gochia Selukia, na korwa agwo bakaamboka nemeeri gochia Kuporo. 5Bagaika Salami, bakarandia ring’ana ria Nyasae ase chisinagogi chi’Abayahudi, na barabwo nigo barenge na Yohana okobakonya. 6Ekero bakoorire goeta gati‐gati y’egesinka gionsi goika Pafo, bakanyora aroro omonto oyomo Omoyahudi omorogi, omobani bw’oborimo, ore korokwa Bar Yeso. 7Omonto oyio nigo arenge amo na gavuna Sergio Paulo, omonto bw’obong’aini. Ere akarangeria Barnaba na Saulo bache asare, akarigia koigwa ring’ana ria Nyasae. 8Korende Elima, oria omorogi (okoonchorwa kw’erieta riaye nakwo oko) akaamererania nabarabwo, akarigia koonchora gavuna oria atige okwegena. 9Korende Saulo, oyokorokwa naende Paulo, agaichorwa n’Omoika Omochenu, akamotogoreria amaiso, akabora, 10“Aye omwana o Nyachieni omobisa bw’oboronge bwonsi, oichire nobong’ainereria na obobe bwonsi, torigeti gotiga gokora bogeka chinchera chi’Omonene chire boronge? 11Rora bono, okoboko kw’Omonene nigo kore igoro asore, aye nobe omouko, torora erioba ase engaki.”

Erio kegima akabwatwa norotutu na omosunte, agataba‐taba akarigia abanto bamobwate okoboko bamoraae. 12Ekero gavuna achia korora ayakoreka, akeegena, agakumia ase okworokereria kw’Omonene.

Ase Antiokia ya Pisidia. Okorandia gwa Paulo ase Abayahudi

13Erio Paulo na abamwabo bakamanora nemeeri korwa Pafo, bagaika Perga ase Pamfulia. Yohana akabatiga, akairana Yerusalemu, 14korende barabwo bakarua Perga, bakagenda Antiokia, omochie o Pisidia. Rituko ri’Esabato bagasoa ase esinagogi, bagaikaransa aroro. 15Nyuma kabasomire amachiko na ebuku y’ababani, abatang’ani b’esinagogi bagatoma amang’ana asebare kobatebia, “Abaminto, onye more ne ring’ana ri’okoremia, rikwane!” 16Paulo agatenena, akarambora okoboko, agakwana, “Inwe abasacha b’Abaisraeli, na inwe abamoirogete Nyasae, ntegerera. 17Nyasae bw’abanto aba Abaisraeli agachora chisokoro chiaito, na ekero barabwo bamenyete buna abamenyi ase ense ya Misiri, akabaimokereria igoro. Ase okobua kwaye akabarusia aroro, 18na koreng’ana engaki y’emiaka emerongo ene akaremereria nabarabwo ase erooro. 19Agasiria ebisaku bitano na bibere ase ense ya Kanani, na ense yabo akabaa ebe omwando obo, 20koreng’ana engaki y’emiaka amagana ane, na emerongo etano. Nyuma y’ayio akabaa abagambi goika ekero ki’omobani Samweli. 21Erio nyuma yaye bagasaba baegwe omoruoti. Nyasae akabaa Saulo, mosinto o Kishi, omonto bw’ororeria rwa Benjamin, ase engaki y’emiaka emerongo ene. 22Ekero konya amorusirie oyo, akaimokereria Daudi igoro koba omoruoti obo. Akabatebia igoro yaye: Nanyorire Daudi, mosinto o Yese; nere omonto ongweneire ase enkoro yane, naende nere oranyare gokora ogwancha kwane gwonsi. 23Korwa ase oroiboro rw’omonto oyio Nyasae orenteire Abaisraeli Omotooria, nere Yeso. Nabo abarierete eira. 24Ritang’ani ere ataracha, Yohana konya obarandeirie abanto bonsi b’Abaisraeli ebatiso y’okoonchoka. 25Ekero Yohana abeire ang’e gokoora orogendo rwaye akabora, Nigo mokagete ng’a ninche ng’o? Inche tari Kristo. Korende nyuma yane ngocha are oyomo, ere ntaisaini gosibora ebikoroto bi’amagoro aye.

26“Abaminto, abanto b’ororeria rwa Ibrahimu, amo nabande asemore inwe abamoirogete Nyasae, ring’ana ri’ogotooreka riatomirwe asetore. 27Naki abamenyete Yerusalemu, na abanene babo tibamomanyete, ekiagera tibamanyete nonya namang’ana ’ababani. Ase okomogambia baikeranirie ayare gosomwa ase chibuku chi’ababani kera Esabato. 28Nonya tibanyorete engencho y’okomoita, bagasaba Pilato aitwe. 29Ekero bachia goikerania onsi ayarikire igoro yaye, bakamoikia korwa ase omote, bakamobeka ase oboina. 30Korende Nyasae akamobokia korwa ase abakure. 31Ase amatuko amange akarorekana ase abwo barenge gotiira komo korwa Galili goika Yerusalemu. Bono barabwo mbirori baye bare ase abanto. 32Na intwe twabarenteire amang’ana amaya aria Nyasae arierete chisokoro chiaito eira. 33Aya Nyasae atoikeraneirie intwe abana babo ase okobokia Yeso. Naende buna arikire ase Zaburi ibere:

“Aye naye Omwana one, rero nakoiboire.

34Naende ng’a nigo amobogetie korwa ase abakure, erinde tanyara koirana naende ase ogosareka, okwanire iga,

Nimbae ogosesenigwa ogochenu na ogw’ekeene,

koria narierete Daudi eira.

35Ase ayio okwanire naende ase Zaburi ende,

Togotiga Omochenu oo arore ogosareka.

36Naki Daudi, ekero akoorire gokorera ogwancha kwa Nyasae ase ekegori kiaye, agakwa, agatindekwa ase chisokoro chiaye chiatindegete, akarora ogosareka. 37Korende oyo obogetigwe na Nyasae taroche ogosareka. 38Ase ayio baminto, tiga amanyekane asemore ng’a goetera ase oyio nigo mokoranderigwa okwaberwa kw’ebibe, 39na asere kera oyomwegenire nigo akobarerwa oboronge ase amang’ana aria atakonyarekana kobarerwa oboronge ase amachiko a Musa. 40Gaki, erende, tabaisa kobaikera amang’ana aria akwanetwe nababani:

41Rigereria, inwe abachayi, mokumia, mosire,

ekiagera ngochia gokora nde ring’ana ase amatuko aino,

eri motegene nonya omonto naisa kobatebia.”

42Kabasokire, abanto bakabasorora bache kobatebia amang’ana aya Esabato ya kabere. 43Ekero omosangererekano bw’esinagogi oera, Abayahudi abange na abegeni b’ebisaku binde abaonchogete bakabwatana na Paulo na Barnaba, abakwanete nabarabwo, na kobaremia bagenderere ase obuya bwa Nyasae.

Abatomwa bakogenda ase abanto b’Ebisaku

44Ase Esabato ya kabere abanto abange, ang’e omochie bwonsi, bagasangererekana baigwe ring’ana ria Nyasae. 45Korende ekero Abayahudi bachia korora emeganda, bagaichorwa ne ribero, bagakana amang’ana ayare gokwanwa na Paulo, bakamorama. 46Paulo na Barnaba bagakwana noboremu, bagateba, “Igo yagwenerete ng’a ring’ana ria Nyasae rikwanwe asemore ritang’ani. Korende ekiagera mwarisukeirie are mwenacheire inwe abanyene ng’a timogwenereti obogima bwa kare na kare, tweonchoreire abanto b’Ebisaku. 47Nabo twachigetwe n’Omonene,

“Nakobekire obe omobaso ase abanto b’Ebisaku,

erinde ogotooreka kwane kogende,

goike ase chinsinyo chi’ense.”

48Ekero abanto b’Ebisaku bachia koigwa ayio bakagoka, bagatogia ring’ana ri’Omonene, na abwo bachikeretwe konyora obogima bwa kare na kare bakeegena. 49Ring’ana ri’Omonene rikaranda ase ense eria yonsi. 50Abayahudi bakaburukania abakungu abamoirogete Nyasae, abasikire nabanto, na abanene b’omochie, bakagenka abanto bachande Paulo na Barnaba, na kobaseria korwa ensemo yabo. 51Korende Paulo na Barnaba bakabakong’ontera orotu rw’amagoro abo, bakagenda Ikonio. 52Na aborokigwa bagaichorwa nomogoko na Omoika Omochenu.

Currently Selected:

OGOKORA KW’ABATOMWA 13: EKEGUSIIBBLE

Highlight

Copy