OGOKORA KW’ABATOMWA 12

Herode ogochanda abanto b’ekanisa. Okorusigwa gwa Petero korwa ase echela

1Nabo ase engaki eria, omoruoti Herode akarambora amaboko aye agachanda abanto bande b’ekanisa. 2Agaita Yakobo omwabo Yohana nomoyio o birende. 3Ekero aroche ng’a aya agweneire Abayahudi, akagenderera, akabwata Petero nere. Amatuko ayio naro amatuko emegati etabekiri memera. 4Akamobwata akamobeka echela ime. Akamobeka ase ebiombe bine bi’abarwani; kera ekeombe nigo kiare nabarwani bane. Barabwo bakamorenda. Akarigia komosokia ase abanto nyuma y’Epasaka. 5Nabo Petero arendetwe ase echela ime, abanto b’ekanisa bakamosabera ase Nyasae nomoyo bw’omokia.

6Ase obotuko boria bwatang’anerete rituko riria Herode arengereretie komoira ase ekegambero, Petero nigo arenge oraire gati y’abarendi babere, osibire nebinyuri bibere, na abarwani nigo barenge gesieri barendete echela. 7Na rora, omomalaika bw’Omonene akamoorokera, na amasase akamoreka akanyomba ime. Omomalaika oria agaaka Petero rikere riaye, akamotura, agateba, “Imoka bwango!” Ebinyuri bigasansoka korwa ase amaboko aye. 8Omomalaika akamotebia, “Eboyie, obeke ebikoroto biao.” Agakora bo. Naende akamotebia, “Beka eganchwa yao, ontunyane!”

9Agasoka, akamotunyana, gose tamanyete ng’a ayakoretwe nomomalaika nay’ekeene, korende agakaga ng’a nokorora arorire. 10Ekero bachia goetania ensemo ye ritang’ani na ensemo ya kabere ase abarendi barendete, bagaika egeita ki’ebioma kegosoerwa omochie ime. Eke gekabaigokera, na barabwo bagaeta ase enchera eyemo. Erio kegima omomalaika oria agatiga Petero. 11Ekero Petero achia komanya, agateba, “Bono namanyire bori ng’a Omonene nere otoma omomalaika oye ochia kondusia ase okoboko kwa Herode, na korwa ase ogosemeria gwonsi kw’abanto b’Abayahudi.”

12Erio kararengereretie aya, agaika ase enyomba ya Mariamu ng’ina Yohana, oyokorokwa naende Mariko; na abanto abange nao basangererekanete gosaba. 13Na ekero Petero achia gotura egesieri kia geita, omoiseke omosomba, okorokwa Roda, agacha koigwa. 14Kamanyire eriogi ria Petero, akaba nomogoko, taigora egesieri, korende akaminyoka, agasoa nyomba, akabatebia ng’a Petero ngesieri ateneine. 15Bakamotebia, “Nebarimo ore!” Korende akaamereria mono, agateba ng’a naboigo are. Bakabora, “Nomomalaika oye!”

16Petero akagenderera gokong’onta egesieri. Erio bakamoigorera, bakamorora, bagakumia. 17Ere akabakania nokoboko, ng’a bakire, tibakwana, akabatebereria buna Omonene amosokia korwa ase echela. Akabora, “Genda, motebie Yakobo na abaminto amang’ana aya.” Agasoka, akagenda ensemo ende.

18Ekero bwachia gokia abarendi bagasogwa nomoondoko omonge igoro ya Petero, naki abete. 19Herode akamorigia, tamonyora. Akana‐kounia abarendi, agachika ng’a baitwe. Erio agatirimboka korwa Boyahudi, akagenda Kaisaria, akamenya aroro.

Ogokwa kwa Herode

20Herode nigo abeete mono abanto ba Turo na Sidoni. Korende barabwo bakamochiera ase obomo, na ekero baebereirie Blasto, oyorenge korenda enyomba y’omoruoti, bakarigia omorembe, ekiagera ense yabo nigo yare konyora endagera korwa ase ense y’omoruoti. 21Ase rituko erimo eriabekire, Herode akeboyia chianga chi’oboruoti, agaikaransa ase ekerogo ki’oboruoti, agakwana asebare. 22Abanto bagaaka eriogi, bagateba, “Eri neriogi ri’enyasae, tari eri’omonto!” 23Erio bwango omomalaika bw’Omonene akamoaka ekiagera atasigete Nyasae; akariegwa namakonde, agatweka mo.

24Korende ring’ana ria Nyasae rikagenderera komentekana.

25Barnaba na Saulo, ekero bakoorire obotomwa bwabo, bakairana korwa Yerusalemu, bakarentana Yohana ore korokwa Mariko.

Currently Selected:

OGOKORA KW’ABATOMWA 12: EKEGUSIIBBLE

Highlight

Copy