OGOKORA KW’ABATOMWA 11

Petero ogwekengera ase ogokora kwaye

1Naende abatomwa na abaminto abarenge Boyahudi bakaigwa ng’a abanto b’Ebisaku nabarabwo banyorire ring’ana ria Nyasae. 2Erio ekero Petero achete ase Yerusalemu, baria abare ensemo y’okwaroka bakaamererania nere, 3bakamotebia, “Aye ngwasoa ase abanto batarogeti, okaragera amo nabarabwo!” 4Korende Petero agachaka kobatebereria amang’ana onsi buna abete, 5“Nigo narenge ase omochie okorokwa Yopa, ngosaba nare, nkaba buna oyobwatire nobogondereria, nkarora ase okorora egento kere buna egetambaa kiabwatire emekoba ene, kegoikigwa korwa igoro gocha asende. 6Ngakerigereria mono, nkarora ching’iti chire namagoro ane, ne ching’iti chi’orosana, na echikwagura, ne chinyoni chia igoro. 7Nkaigwa eriogi rigonte bia: Petero, imoka, onyenye orie! 8Korende nkabora: Yaya Omonene, ekiagera egento getachenegeti gose ekere neubi, tibiana gosoa ase omonwa one nonya ng’ake. 9Eriogi rigantebia eria kabere korwa igoro: Eki Nyasae achenire tokeroka ng’a tikeri egechenu. 10Ring’ana eri rigakoreka ara gatato, naende ebinto biria bionsi bikang’uswa gochia igoro. 11Ani! Ekero ekio abanto batato baikire ase enyomba eria namenyete, na barabwo nigo batometwe asende korwa Kaisaria. 12Omoika Omochenu ogantebia ngende amo nabarabwo, timbaisa koba ne chitang’u‐tang’u. Na abaminto aba batano nomo bakagenda amo nainche, togasoa ase enyomba y’omonto oria; 13ere agatotebia buna aroche omomalaika oteneine mwaye, na komotebia: Toma abanto bagende Yopa, barangerie Simion, oyokorokwa Petero. 14Nere oragotebie amang’ana ayarakorentere ogotooreka, aye na ab’enyomba yao yonsi. 15Ekero nachagete gokwana, Omoika Omochenu okabaikera buna otoikerete intwe agwo ritang’ani. 16Nkainyora ring’ana riria ri’Omonene, buna atebete: Yohana nigo arenge kobatisa ase amache, korende inwe inamobatiswe ase Omoika Omochenu. 17Gaki onye Nyasae obaeire barabwo ekeegwa keria keria atoete intwe, ekero twamwegenete Omonene Yeso Kristo, inche ninche ng’o, ndanyare koamereria Nyasae?”

18Ekero bachia koigwa amang’ana aya, bagakira‐kiri. Na barabwo bagatogia Nyasae, bagoteba, “Gaki, Nyasae oeire abanto b’Ebisaku boigo okoonchoka gokorenta obogima.”

Ekanisa y’abanto b’Ebisaku ase Antiokia

19Baria baatananegete nyuma y’emechando eria yabete igoro ya Stefano bakagenda Foiniki na Kuporo, na Antiokia, bakarandia ring’ana ase Abayahudi boka, tari ase abanto bande. 20Korende mbarengeo ase egati yabo abanto ba Kuporo na Kurene, barabwo ekero bachia goika Antiokia bagakwana n’Abagiriki, bakabaranderia amang’ana amaya igoro y’Omonene Yeso. 21Okoboko kw’Omonene nigo kwarenge amo nabarabwo; abanto abange bakamwegena Omonene, na komoonchokera. 22Abanto b’ekanisa ya Yerusalemu bakaigwa amang’ana aya, bagatoma Barnaba agende Antiokia. 23Ere, ekero achia goika na korora buna obuya bwa Nyasae bwakorire, akagoka, agasorora bonsi babe abegenwa ase Omonene ase okogania gwe chinkoro. 24Ere nigo arenge omonto omuya, oichire n’Omoika Omochenu na okwegena. Abanto abange bakamenteka ase Omonene. 25Barnaba akarua agwo, akagenda Tariso korigia Saulo, 26na ekero amonyorete akamorenta Antiokia. Ase engaki y’omwaka omogima bagasangererekana amo nekanisa na kworokereria abanto abange. Agwo Antiokia nao aborokigwa batang’anete korokwa Abakristo.

Obotomwa bwa Barnaba na Saulo gochia Yerusalemu

27Ase amatuko aria ababani bagatirimboka korwa Yerusalemu gochia Antiokia. 28Oyomo obo, ore korokwa Agabo, agatenena akabana ase Omoika Omochenu, ng’a enchara enene nechiche ase ense engima; ero ekaba ekero Klaudio are kogamba. 29Na aborokigwa baria, kera oyomo koreng’ana buna okonyara kwaye, bakang’ea gotoma ogokonywa ase abamwabo abamenyete Boyahudi. 30Bagakora bo, bagatoma ebiegwa ase abagaaka ase amaboko a Barnaba na Saulo.

Currently Selected:

OGOKORA KW’ABATOMWA 11: EKEGUSIIBBLE

Highlight

Copy