OGOKORA KW’ABATOMWA 14
14
Paulo na Barnaba ase Ikonio
1Ase Ikonio Paulo na Barnaba bagasoa esinagogi amo, bagakwana goika abanto abange b’Abayahudi na Abagiriki bakeegena. 2Korende Abayahudi abategenete bakaburukania emioyo y’abanto b’Ebisaku na gosaria emioyo yabo igoro ase abaminto. 3Ase engaki entambe Paulo na Barnaba bakamenya aroro, bagakwana noboremu igoro ase Omonene, oyorenge koorokia ring’ana ri’obuya bwaye na kobanchera ebikone na amakumia bikoreke ase amaboko abo. 4Korende abanto b’omochie oria bagaatananekana. Abande bakabwatana n’Abayahudi na abande nabatomwa. 5Ekero okong’orerwa kw’abanto b’Ebisaku na Abayahudi amo nabanene babo gwakoretwe igoro y’abatomwa ase okobakorera amabe na kobaaka amagena, 6barabwo bakanyora amang’ana, bagatama gochia Listra na Deribe, emechie ya Lukania, ne chinsemo chionsi echiarenge ang’e. 7Aroro bakagenderera korandia enchili.
Ase Listra
8Agwo Listra narengeo omonto oyomo ekerema. Ere nigo arenge rigata korwa ase okoiborwa kwaye, tana kogenda nonya ng’ake. 9Omonto oyio akaigwa Paulo kagokwana. Paulo akamobeta amaiso, akarora ng’a nare nokwegena gw’okogwenigwa, 10agakwana neriogi rinene, agateba, “Tenena boronge namagoro ao.” Agatenena bwango, agataarataara. 11Ekero emeganda yachia korora aya Paulo akora, bagaaka amariogi abo, bagakwana ase Ekelukania, “Chinyasae chiatoikeire ase emegwekano ya mwanyabanto!” 12Bakaroka Barnaba Zeu, na Paulo Herme, ekiagera nere orenge omonene ase ogokwana. 13Omokuani o Zeu, oyo hekalu yaye yarenge isiko y’omochie, akarenta chieri na ebisembe bi’ebisicha goika ase ebiita; ere amo nabanto bakarigia korua ekeng’wanso. 14Korende abatomwa Barnaba na Paulo, ekero bachia koigwa amang’ana ayio bagatandora chianga chiabo, bakaayerera, bagasoa ase omoganda, bagaaka egeturi, bagoteba, 15“Inwe abasacha! Nase ki mogokora aya? Intwe nigo tore mwanyabanto koreng’ana buna inwe. Twabarandeirie inwe amang’ana amaya, erinde motige chinyasae echi chia bosa, moonchokere Nyasae ore moyo, oyotongete igoro na ense, na enyancha, na ebinto ebire imeo. 16Kare ase ebigori biaetire nigo atigete ebisaku bionsi bitaare ase chinchera chiabo abanyene, 17korende ere omonyene tetigete atari na birori. Ere nigo are gokora amaya na kobaa embura korwa igoro, ne chingaki chie rigesa, agaisanekia chinkoro chiaino nendagera na omogoko.” 18Na ase amang’ana aya bagatanga abanto baria bokong’u, tibabaruseria ebing’wanso.
19Erio Abayahudi korwa Antiokia na Ikonio bagacha, na ekero bagenkire abanto bagaaka Paulo amagena, bakamokurura gochia isiko y’omochie, bagakaga ng’a okure, 20Korende ekero aborokigwa bamoetananire ase chinsemo chionsi, agatenena, agasoa omochie ime, ne rituko ria kabere riaye agasoka, akagenda Deribe amo na Barnaba.
Okoirana ase Antiokia
21Nyuma kobarandirie amang’ana amaya ase omochie oria, na kobakorire abange koba aborokigwa, bakairana goika Listra, na Ikonio, na Antiokia, 22bakabeka emioyo y’aborokigwa chinguru na kobaremia bagenderere ase okwegena, bakabatebia ng’a “Netogwenerete gosoa ase oboruoti bwa Nyasae ase enchera y’emechando emenge.” 23Erio kobachorire abagaaka ase kera ekanisa ase ogosaba na okweng’ata, bakababeka ase amaboko ’Omonene, oyio begenete.
24Bagaeta egati ya Pisidia, bagasoa Pamfulia. 25Na nyuma kobarandirie ring’ana ase Perga, bagatirimboka gochia Atalia, 26na korwa agwo bakairwa nemeeri ase enyancha, bagaika Antiokia. Agwo nao babekeretwe ase obuya bwa Nyasae ase emeremo eria banyarete goikerania. 27Ekero bachia goika aroro bagasangereria ekanisa amo, bakaorokia amang’ana onsi Nyasae akorete nabarabwo, na buna aigoreire abanto b’Ebisaku egesieri gi’okwegena. 28Bakaba agwo amatuko atai make amo naborokigwa.
Currently Selected:
OGOKORA KW’ABATOMWA 14: EKEGUSIIBBLE
Highlight
Share
Copy

Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020