Bar 3
3
1“We Mwathani Mwene Vinya wonthe, Ngai wa Isiraeli, nîtûrakûrîrîra we tûrî na ngoro nthînîku na nthiru vinya. 2Tûthikîrîrie we Mwathani na ûtwîguîre ntha, nîûndû tue nîtwîvîtie mbere yaku. 3We ûtûûraga wî mûthamaki tene na tene, nwatî tue tûkucaga na tûkathira tene na tene. 4We Mwathani Mwene vinya Wonthe, Ngai wa Isiraeli, thikîrîria mavoya metû. Tûtirî aro gûkîra Aisiraeli arîa mekariî ta andû akuû arîa maakûvîtîrie. Nîmaaregire kwathîkîra mûgambo wa Mwathani Ngai wao, na kîu nîkîo gîtûmîte tûnyitwa nî mûthiro. 5Ndûkaririkane mevia marîa methe metû meekire tene, nwatî kavinda gaka ka mathîna ûririkane vinya waku na rîîtwa rîaku, 6nîûndû we wî Mwathani Ngai wetû, na nîwe wenga tu tûgakumagia. 7Nîûtûmîte ngoro cietû igwîtigîre nîguo tûkûvoyage. Tue tûgaagûkumagia tûrî gûkû îthamîriorî nîûndû nîtûverete mevia monthe marîa meekirwe nî methe metû. 8Roria, rîu tûrî îthamîriorî kûrîa ûtûnyaganîtie nîguo tûnyararwe na tûrumwe na tûverithue nîûndû wa mevia monthe ma methe metû arîa maareganire na Mwathani Ngai wetû.”
Gûkumia Ûûgî
9 #
Nthi 4.20-22
Thikîrîria mawatho ma mûtûûrîre, we Isiraeli!
Thikîrîria na nîûkûgîa na ûûgî.
10Nîkwa gwîkariî atîa we Isiraeli,
nîndûî gîtûmîte wîthîrwe ûrî rungu rwa nthû ciaku?
Nîûrakûra ûrî vûrûrirî mûgeni na ûkagwatua gîko nî ciimba.
11Nîndûî kîratûma ûtaranîrua na arîa akuû?
12We nîûtiganîrîtie kîthima Kîam ûûgî.
13Kethîrwa nîûrarûmîrîra njîra cia Ngai,
ûngîtûûraga ûrî na thayû tene na tene.
14Îthomithie kûrîa kûrî na ûûgî,
kûrîa kûrî na vinya,
kûrîa kûrî na ûmenyo,
nîguo ûvote kûmenya kûrîa kûrî na ûtûûro mûraca na mwoyo,
kûrîa kûrî na ûtheri na thayû.
15 #
Ayu 28.12,20 Nû wanamenya kûrîa Ûûgî atûûraga?
Nû wanatonya îkûmbîrî rîake?
16Marî kû atongoria a ndûrîrî,
na arîa mathaga nyamû gûkû nthî?
17Marî kû arîa mathakaga na iconi cia rîerarî,
na arîa maûnganagia sîlûva na thaavu irîa andû mevokaga,
na matitigaga gûicaria?
18Marî kû arîa mavangaga na magetanga magîcaria sîlûva,
na wîra wao ndwonekaga?
19Acio onthe nîaûru makathiî kwa arîa akuû,
na engî nîaumîru vandûrî vao.
20Andû engî nîaciare na magatûûra nthî,
nao nîmonete ûtheri wa mûthenya.
Nwatî wanao matiathoma njîra ya ûmenyo,
kana mamenya njîra ciake kana manyita ûûgî.
21Ciana ciao nî nyumu njîrarî ya ûûgî.
22Ûûgî ndwaneguîka Kanaani,
kana wanonekana kûu Temani.
23Ciana cia Hagari icaragia ûmenyo gûkû nthî,
magûraga na makendia indo Merani na Temani,
agani ng'ano nao nîmacaragia ûmenyo,
matiathoma njîra ya ûûgî,
na matiîcî njîra cia guo.
24We Isiraeli, nîkwa nyomba ya Ngai îrî nene atîa!
Nîkwa vûrûri wake ûrî mûnene atîa!
25Nî mûnene na ndûrî mûvaka,
nî mwariî na ndûngîthimîka ûraca na îgûrû.
26 #
Kîam 6.4; Ûûgî 14.6 Marimû marîa ma tene maaciarîrwe kuo,
andû anene na mecî kûrûa.
27Ngai ndamathuura,
kana amamenyithia njîra ya ûûgî.
28Maakuire nîûndû matiarî na ûûgî,
maakuire nîûndû wa ûrimû wao.
29Nû wanaunûkia îgûrû kûgîra Ûûgî,
na akaûrete gûkû nthî kuuma maturî?
30Nû wanathiîra îriarî na akamwona?
Nû ûngîvota kûmûgûra na thaavu îrîa ntheru?
31Gûtirî mûndû ûngîmenya njîra îrîa îthiîte kûrî ke,
na gûtirî mûndû ûrûmbûyanagia na njîra îrîa îthiîte kûrî ke.
32Nwatî ûrîa wîcî maûndû monthe nîecî ûûgî,
aamûmenyire na njîra ya ûmenyo wake.
Nîke wavarîrîrie nthî kuuma tene,
na akîmîcûria ciûmbe irî na magûrû mana.
33Ke ûrîa wîraga ûtheri ûthiî na ûkathiî,
nîwawîtire naguo nîwamwathîkîre ûrî na guoya.
34Njata nîikengaga irî varîa ciîkaraga na gîkeno,
ke nîaciîtaga, nacio ikauga, “Tûrî ava.”
Nîikengaga irî na gîkeno nîûndû wa ûrîa waciûmbire.
35Ûyû nî Ngai wetû,
gûtirî ûngîringithanua nake.
36Ngai nîwamenyire njîra yonthe ya ûmenyo,
akîûnenganîra kûrî Jakovu ndungata yake,
akîûnengera Isiraeli ndungata yake îrîa endete.
37Vuvarî Ûûgî nîwaumîre gûkû nthî,
agîtûûrania na andû.
Currently Selected:
Bar 3: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019