Bar 2
2
1“Kwoguo Mwathani nîavingîtie ciugo irîa aaririe nîûndû wetû, atirîrîri vûrûri etû arîa maatongoragia Isiraeli, athamaki etû, atongoria etû na andû a Isiraeli na a Juda. 2Gûtirî kûndû kwîngî gûkû nthî maûndû mau mekîkîte ta marîa meekirwe Jerusalemu rîrîa Mwathani aavingirie maûndû marîa mandîke wathorî wa Musa. 3Maûndû maarî macûku mûno atî mûndû nîwarîcaga nyama cia mûvîcî na wîngî akarîa nyama cia mwarî. 4Mwathani nîwanyaganirie andû etû akîmanenganîra kûrî mavûrûri monthe marîa maatûrigicîrîtie na tûkîgîa na gîconoko na kûnyararwa nî andû arîa maatûrigicîrîtie kûrîa Mwathani aatûnyaganîtie. 5Nîtwevîrie Mwathani Ngai wetû na tûkîrega kûmwathîkîra, kwoguo vûrûri wetû nîwavootirwe vandû va kûvootana.
6“Mwathani Ngai wetû nî mûthingu, nwatî tue twîcûrîtwe nî mevia ta marîa maarî na methe metû. 7Maûndû macûku marîa Mwathani aatwîrire nîmagaatûnyita rîu nîmatûkinyîrîte. 8Kûnarî ûguo, tûtiamûcokerera na tûvoye nîguo tûtigane na merirîria macûku ma ngoro cietû. 9Kwoguo Mwathani nîmûvarîrîriu mîthiro îrîa aagwetire nayo nîîtûnyitîte, nîûndû Mwathani nî mûthingu maûndûrî monthe marîa aatwathire twîkage. 10Nwatî tue tûtiathîkîra mûgambo wake kana tûtûûre kûringana na mawatho marîa aatûveere.”
Îvoya nîûndû wa gûkûûrwa
11“We Mwathani Ngai wa Isiraeli, nîwe warutire andû aku vûrûrirî wa Misiri na ûvoti waku mûnene na ciama, morirû na vinya waku mûnene na ûkîgîa rîîtwa rîrî na riiri nginya ûmûnthî. 12We Mwathani Ngai wetû, nîtwîvîtie na twîthîrîtwe tûtarî evokeku. Nîtûregete kûrûmîrîra maathani maku monthe. 13Nwatî ndûgatûrakarîre rîngî nîûndû mavûrûrirî marîa ûtûnyaganîtie tûtigarîte andû nî anini mûno. 14We Mwathani, thikîrîria mavoya na mathaithana metû na ûtûkûûre nîûndû wa wendi waku. Tûma arîa matûvirîte îthamîriorî makenue nîtue. 15Nayo nthî yonthe nîîkamenya atî we wî Mwathani Ngai wetû na atî nîûthuurîte rûrîrî rwa Isiraeli rûtuîke andû aku we mwene.
16“We Mwathani, tûrorie ûrî kûrîa ûtûûraga na wone mathîna metû. Tûthikîrîrie Mwathani na ûtwîgue. 17Vingûra metho maku ûtûrorie. Arîa marî kwa arîa akuû na matarî na mîvevû matingîgûkumia kana manîrîre ûrîa wî mwagîrîru we Mwathani. 18Nwatî andû arîa marî mwoyo we Mwathani, nwao mavote gûgûkumia na kuga ûrîa ûrî kîvooto wana ethîrwa marî na mathîna mûno, matarî vinya, marî na yûra na metho mao mathirîte vinya.
19“We Mwathani Ngai wetû, twakûvoya ûtwîguîre ntha, tîûndû wa ûthingu wa methe metû kana athamaki etû. 20Nîûtûmîte tûnyitwe nî marakara na mang'ûrîka maku wata ûrîa watwîrire na njîra ya arathi ndungata ciaku rîrîa waugire: 21#Jer 7.34; 27.10-12 ‘Înamîrîriani ciande cienyu mûtungatîre mûthamaki wa Babuloni namue nîmûgaatûûra vûrûrirî ûrîa naveere methe menyu. 22Nwatî mwarega kwathîkîra mûgambo wa Mwathani na mûrege gûtungatîra mûthamaki wa Babuloni, 23nîngaathiria maûndû monthe ma gîkeno na gûkûngûîra matûûrarî ma Juda na Jerusalemu. Gûtikethîrwa kûrî na mîgambo ya irugo cia ûviki na vûrûri wonthe ûgaatigwa ûrî werû na ûtarî na atûûri.’
24 #
Jer 8.1-2
“Nwatî tue tûtiathîkîra mûgambo waku ûvororî wîgiî gûtungatîra mûthamaki wa Babuloni, nawe nîûvingîtie maûndû marîa waririe na njîra ya arathi ndungata ciaku rîrîa waugire atî mavîndî ma athamaki etû na ma methe metû nîmakaathikûrua mbîrîrarî ciao. 25Na rîu nîmatetwe ûrugarîrî wa mûthenya na ndavaîki ya ûtukû. Maaûragirwe nî mathîna ma yûra, mbaara na mîrimû mîcûku. 26Nîûtûmîte nyomba îrîa twakûgoocagîra îcûkange ta ûrîa îkariî ûmûnthî, nîûndû wa waganu wa andû a Isiraeli na andû a Juda.
27“Kûnarî ûguo, we Mwathani Ngai wetû, nîûtûkirîrîrîtie nîûndû wa wega waku na ntha ciaku nyîngî, 28#Gûco 28.58-62 wata ûrîa weranîre na njîra ya ndungata yaku Musa mûthenya ûrîa wamwathire andîke watho waku andû onthe a Isiraeli makîonaga ûkiuga atîrî, 29‘Mwarega kwathîkîra mûgambo wakwa mûnarî eengî ûguo, mûgaatuîka andû anini mûrî mavûrûrirî marîa ngaamûnyaganîria. 30Nîmbîcî atî mue mûtikambathîkîra nîûndû mûrî andû aûmû ciongo. Nwatî rîrîa mûkavirwa îthamîriorî, nîrîo mûkamenya ûrîa mûreka, 31na nîmûkaamenya atî nie nînie Mwathani Ngai wenyu. Nie nîngaamûva ngoro îrî na wathîki na matû ma kwîgua. 32Nîmûkaangumia na mûndirikane mûrî vûrûrirî ûrîa mûkaathamîrua. 33Nîmûgaatiga kûmia ngoro na waganu nîûndû nîûkaaririkana ûrîa gwekîkire kûrî methe menyu arîa mevirie mbere ya Mwathani. 34Nîngaamûcokia rîngî vûrûrirî ûrîa nevîtire ngiuga atî nîngaava methe menyu, Iburahimu, Isaka na Jakuvu na nîûgatuîka wenyu. Nîngaatûma mwongerereke na mûtikaanyiva rîngî. 35#Jer 32.38-40 Nîngaarûtha kîrîkanîro gîa tene na tene namue; nîngethîrwa nîrî Ngai wenyu namue mûkethîrwa mûrî andû akwa. Ndikaamûruta rîngî mue andû akwa a Isiraeli kuuma vûrûrirî ûrîa namûveere.’
Currently Selected:
Bar 2: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019