Bar 1
1
Mworoto wa îvuku rîîrî
1 #
Jer 36.4
Ino nî ciugo irîa ciandîkirwe nî Baruku mûvîcî wa Neraia, mûvîcî wa Mahiseia, mûvîcî wa Zedekia, mûvîcî wa Hasadia mûvîcî wa Hilikia. Aandîkire arî Babuloni 2mûthenya wa mûgwanja wa mweri, mwakarî wa gatano vîndî îrîa Akalidei maanyitire îtûûra rîa Jerusalemu na makîrîvîvia. 3#2Atha 24.8-17 Baruku nîwathomire îvuku rîîrî augîrîrîtie mbere ya Jekonia mûvîcî wa Jehoiakimu, mûthamaki wa Juda na andû onthe arîa maaûkîte kwîgua rîkîthomwa, 4mbere ya atongoria na anene, athuuri na andû onthe anini na arîa anene arîa matûûraga Babuloni ndeererî cia rûnjî rwa Sudi.
5Rîrîa îvuku rîathomirwe, andû onthe nîmaarîrire, makîînyerekia na makîvoya Mwathani. 6Nîmaacokire makîûngania mbeca, na wa mûndû akîruta kûringana na ûvoti wake. 7Nîmaaivirire Jerusalemu kûrî Jehoiakimu Mûthînjîri-Ngai mûnene, mûvîcî wa Hilikia, ûmawe wa Shalumu, na kûrî athînjîri-Ngai acio engî vamwe na andû onthe arîa maarî nake kûu Jerusalemu.
8Mûthenya wa îkûmi wa mweri wa Sivani, Baruku nîwocire indo irîa ciarî ntheru irîa ciarutîtwe hekarûrî na agîicokia vûrûrirî wa Juda. Nacio ciarî indo cia sîlûva irîa Zedekia mûvîcî wa Josia mûthamaki wa Juda aarûthithîtie, 9vuva wa Nebukadinezarû mûthamaki wa Babuloni kûvira îthamîriorî Jekonia na anene na andû arîa maarî ove, andû arîa maarî vinya na andû acio engî kuuma Jerusalemu.
Maarûa kûrî andû a Jerusalemu
10Nao andû nîmaandîkire atîrî:
“Ino nîcio mbeca îrîa twamûtûmîra. Gûra nacio nyamû cia matega ma kûvîvua, matega ma kûtheria mevia na ûbani, na mûvarîrie matega ma irio. Mûkaamarutîra îgûrû rîa metha ya kîgongoona ya Mwathani Ngai wetû, 11na mûvoere mûthamaki Nebukadinezarû wa Babuloni na mûvîcî Belishazaru nîguo matûûre mîaka mîngî ta îgûrû. 12Nake Mwathani nîagaatûva vinya na atûtongorie. Nebukadinezarû mûthamaki wa Babuloni na mûvîcî Belishazaru nîmagaatûgitîra na nîtûtûûra tûmatungatagîra nao makenague nîtue. 13Tûvoereni kûrî Mwathani Ngai wetû, nîûndû nîtûmûvîtîrîtie na nîtûmûrakarîtie. 14Thomani îvuku rîîrî tûramûtûmîra na mumbûre mevia menyu mûrî nyombarî ya Mwathani mûthenya wa kîrugo gîa tûnyomba na vîndî ya mîthenya îrîa îngî mîamûre.”
Kumbûra mevia
15Mûkaaumbûra atîrî:
“Mwathani Ngai wetû nî mûthingu, nwatî tue tûrî ecûre nî gîconoko. Tue tuonthe, andû a Juda na atûûri a Jerusalemu, 16athamaki etû na atongoria etû, athînjîri-Ngai etû, arathi etû na aa vava, 17nîtwîvîtie mbere ya Mwathani 18na nîtwareganire nake na tûtiathikîrîria Mwathani Ngai wetû rîrîa atwîrire tûrûmagîrîre maathani marîa aatûveere. 19Kuuma mûthenya ûrîa Mwathani aarutire methe metû vûrûrirî wa Misiri nginya ûmûnthî, tûtûûrîte tûtarî evokeku kûrî Mwathani Ngai wetû na tûkarega kûmwathîkîra. 20#Gûco 28.15-68 Kwoguo nginya ûmûnthî, twîthîrîtwe na mathîna na irumi irîa Mwathani aaririe kûvîtûkîrîra Musa ndungata yake vîndî îrîa aarutire methe metû vûrûrirî wa Misiri nîguo atûve vûrûri wîcûrîte îriia na ûûkî. 21Nîtwaregire kwathîkîra mûgambo wa Mwathani Ngai wetû ûrîa aatwarîrie naguo kûvîtûkîrîra kûrî arathi. Vandû va ûguo wa mûndû aarûmîrîre merirîria macûku ma ngoro yake na njîra ya gûtungatîra ngai ciîngî na gwîka maûndû macûku mbere ya Mwathani Ngai wetû.
Currently Selected:
Bar 1: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019