Bar 4
4
1 #
Sir 24.23
Ûûgî nî îvuku rîa maathani ma Ngai,
nî watho ûrîa ûtûûraga tene na tene.
Arîa onthe menyitagîrîra kûrî ke nîmagatûûra,
nwatî arîa mamûtiganagîria nîmagaakua.
2Garûrûka, we Jakovu na woce Ûûgî,
thiî na kûrîa ûtheri wake ûrî.
3Ndûkave mûndû ûrîa wîngî riiri waku,
kana ûve mavûrûri mageni mûnyaka waku.
4Tue andû a Isiraeli tûrî akenu,
nîûndû nîtwîcî maûndû marîa makenagia Ngai.
Kûmîrîria andû a Jerusalemu
5Îyûmîrîrieni, mue andû akwa,
nîmue mûtûûrîtie rîîtwa rîa Isiraeli.
6Mue mûtiendua kwa andû a ndûrîrî nîguo mûthire,
nwatî mwanenganîrwe kûrî nthû cienyu nîûndû nîmwarakarîtie Ngai.
7Nîmwarakaririe ûrîa wamûmbire,
rîrîa mwarutire ngoma magongoona vandû va Ngai.
8Nîmwariganîrwe nî Ngai wa tene na tene ûrîa wamûrerire,
mûkîguithia îtûûra rîa Jerusalemu rîrîa rîamûmenyagîrîra kîeva.
9Îtûûra rîu nîrîonire marakara ma Ngai magîûka kûrî mue,
na rîkiuga atîrî, “Tathikîrîriani mue mûriganîtie na Zayuni,
Ngai nîandeterete kîeva kînene mûno,
10nîûndû nîmonete anake na erîtu akwa makîvirwa îthamîriorî,
rîrîa maareterwe nî Ngai wa tene na tene.
11Nînamarerire na gîkeno kînene,
nwatî nînamarekererie makîthiî makîrîraga na marî na kîeva.
12Mûndû ndagakenerere mathîna makwa nie mûndûmûka wa ndigwa,
ciana nyîngî nîinguîrîrîte.
Natigirwe ndarî kîene nîûndû wa mevia ma ciana ciakwa,
nîûndû nîmaagarûrûkire magîtiganîria watho wa Ngai.
13Matiatîîa maathani make,
matiarûmîrîra maathani Ngai,
nîmaaregire amatongorie na njîra ya ûthingu.
14“Ûkani mue mûriganîtie na Zayuni,
ririkanani ûrîa ciana ciakwa cia anake na erîtu ciatavirwe,
gûtavwa kûrîa maareterwe nî Ngai wa tene na tene.
15Nîûndû nîwamaretere vûrûri kuuma kûraca,
vûrûri ûtarî nthoni na waragia rûthiomi rûgeni,
matitîîaga andû arîa akûrû kana meguîra ciana ntha.
16Nîmaakuuire anake a mûndûmûka ûcio arîa endete,
makîndiga na îvooru nîrî mûkuîre nî erîtu akwa.
17“Nwatî nie nîngîvota kûmûtethia atîa?
18Nîûndû ûrîa wamûretere mathîna mama,
nwake ûngîvota kûmûvonokia kuuma kûrî nthû cienyu.
19Thiîni, ciana ciakwa, thiîni tu.
Nie ndigîtwe nîrî wenga.
20Nîndutîte nguo ya thayû,
ngekîra nguo ya macakaya ngîvoya.
Nîndûûra ndîragîra Ngai wa tene na tene.
21“Gîani na vinya ciana ciakwa, mûrîrîre Ngai amûtethie,
nake nîakamûvonokia kuuma kûrî vinya wa nthû cienyu.
22Nîrî nama atî Ngai wa tene na tene nîakûmûvonokia,
nîngîte na gîkeno kuuma kûrî ûcio Mûtheru,
nîûndû wa ntha irîa igaaûka kûrî mue îvinda rîtarî îraca,
kuuma kûrî Mûvonokia wenyu, Ngai wa tene na tene.
23Nîûndû naamûrekererie nîrî na kîeva na ngîrîraga,
nwatî Ngai nîakaamûcokia kûrî nie na gîkeno gîa tene na tene.
24Wata ûrîa andû arîa mariganîtie na Zayuni moonire mûgîtavwa,
nwaguo makoona mûkîvonokua nî Ngai,
ûvonokio ûrîa ûgaûka kûrî mue na riiri mwîngî,
na ûnene wa Ngai wa tene na tene.
25Ciana ciakwa, ûmîrîriani îvera rîu rîûkîte kûrî mue kuuma kûrî Ngai.
Nthû cienyu nîimûverithîtie,
nwatî kavinda gatarî karaca nîmûkoona igîcûkangua,
na nîmûgaakinyanga ngingo ciao na magûrû menyu.
26Ciana ciakwa irîa mendete nîmûthiîrîrîte njîra cia thîna;
nîmwatavirwe ta ndîthia ya ng'ondu yocetwe nî nthû.
27“Îyûmîrîrieni, ciana ciakwa, na mûrîrîre Ngai,
nîûndû ûrîa wamûretere ûndû ûyû nîakaamûririkana.
28Wata ûrîa mwendaga kûthiî kûraca na Ngai,
mûcokerereni mûmûtungatîre na kîîo maita îkûmi.
29Nîûndû ûrîa waretire mûthiro ûyû kûrî mue,
nîakaamûvonokia na amûretere gîkeno gîa tene na tene.”
Jerusalemu nîyerirwe nama atî nîgaatethua
30Îyûmîrîrie we Jerusalemu.
Ngai ûrîa wakûveere rîîtwa nîagaakûmîrîria.
31Kaî arîa maakûnyamaririe marî na thîna-î,
na arîa maakenerere kûgwa gwaku!
32Matûûra marîa makaathînîka nî marîa ciana cienyu ciatungatagîra irî ngombo;
îtûûra rîrîa rîamûkîîre ciana cienyu nîrîkaathînîka.
33Nîûndû wata ûrîa rîakenerere kûgwa gwaku,
na rîgîkenerera gûcûkangua gwaku,
ûguo nwaguo rîkegua ûrûrû rîgîcûkangua.
34Nîngaathiria mwîtîîo wake nîûndû wa wîngî wa andû ake,
na mwîtîîo wake nîûgaatuîka kîeva.
35Nie Ngai wa tene na tene nîngaamûnyûrûrûkîria mwaki ûgaakana mîthenya mîngî,
naguo nîûgatuîka gîkaro Kîam ngoma îvinda îraca.
36We Jerusalemu, roria mwena wa îrathîro,
wone gîkeno kîrîa gîûkîte kûrî we kuuma kûrî Ngai!
37Taroria, ciana irîa ciatavirwe nîciûkîte mûciî.
Ciûkîte kuuma mwena wa îrathîro na wa îthûîro,
ciîtîtwe nî Ngai ûrîa Mûtheru,
ciûkîte igîkûngûagîra riiri wake.
Currently Selected:
Bar 4: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019