1Mak 2
2
Matathia mûndû warî mwîvokeku
1Vîndî îo, mûthînjîri-Ngai wetagwa Matathia mûvîcî wa Johana wa mbarî ya Jehoiaribu na cûkû wa Simeoni, nîwaumire Jerusalemu akîthiî gûtûûra Modeini. 2Aarî na ciana ithano cia arûme. Nacio nî: Johana ûrîa wetagwa rîngî Gadi, 3Simeoni ûrîa wetagwa rîngî Thasi, 4Judasi ûrîa wetagwa rîngî Makabii, 5Eleazaru ûrîa wetagwa rîngî Avarani, na Jonathani ûrîa wetagwa rîngî Afusi. 6Rîrîa Matathia oonire maûndû mau monthe macûku meekîtwe Judea na Jerusalemu, 7nîwaugire atîrî,
Ûûi! Nie naciaragwa nîkî nîguo monage maûndû mama monthe macûku magîkîka,
andû akwa nîmaaûragirwe na îtûûra rîrîa rîtheru rîgîcûkangua?
Kûngîvoteka atîa mbîkare ava gûtarî ûndû ngwîka,
na îtûûra nwakwa rîracûkangua nî nthû,
nayo hekarû îtigîrîtwe andû ageni?
8Hekarû îkariî ta mûndû atavetwe gîtîîo.
9Indo irîa ciamîgemetie nîciocirwe na ikîthiîwa nacio.
Ciana cietû ciûragîrîtwe varavararî,
na anake etû makîûragwa na mviû nî nthû.
10Îtûûra rîîrî rîetû rîtûûrîtwe nî andû kuuma ndûrîrî cionthe cia nthî,
na makaîa ûtonga warîo!
11Mathaga ma rîo nîmakuue makathiîwa namo;
rîu ke nî ngombo, ndarî na wîathi rîngî.
12Taroriani hekarû yetû;
ndîrî na ûthaka kana riiri wanarî vanini,
andû a ndûrîrî nî mamîgwatîtie mûgiro.
13Nîtûthiî na mbere na gûtûûra mwoyo nîkî?
14Matathia na avîcî ake nîmaatembûrangire nguo ciao, magîkîra nguo cia macakaya na makîrîra methori marî na ûrûrû mwîngî mûno. 15Vîndî îo atongoria arîa maathuurîtwe nî mûthamaki monage atî andû nîmatiganîria Ngai, nîmaathiîre îtûûrarî rîa Modeini nîguo meere andû na vinya wonthe marutîre ngai cia mîvuanano magongoona. 16Nake Matathia na avîcî ake na andû eengî a Isiraeli, nîmaumagarire gûtûnga andû acio. 17Atongoria a mûthamaki nîmeerire Matathia atîrî, “We wî mûtongoria ûrî gîtîîo îtûûrarî rîîrî na andû aku na anake aku nîmakûnyitîte mbaru. 18Nîndûî kîragiria we Matathia ûtuîke wa mbere kûvingia îtua rîa mûthamaki? Tamenya atî andû a ndûrîrî, andû onthe a Juda na andû arîa matigarîte Jerusalemu nîmavingîtie maûndû mau. Ethîrwa nîûkûvingia watho wa mûthamaki, we vamwe na ciana ciaku nîmûkûvewa gîtîîo kînene mûno na mûgetagwa ‘Arata a mûthamaki,’ na nîmûkaavewa sîlûva na thaavu na indo ciîngî nyîngî.”
19Nake Matathia nîwacokirie na mûgambo mûnene atîrî, “Wana ethîrwa mavûrûri monthe marîa marî rungu rwa mûthamaki nîmathîkîrîte na makavingia watho wa mûthamaki na magatiganîria ndini ciao cia tene, 20nie na ciana ciakwa na andû etû, tûtingîtiganîria kîrîkanîro kîrîa Ngai wetû aarîkanîre na methe metû. 21Ngai arotuîka mûtûtethia tûtigatiganîrie watho wake kana tûregane na maathani make ûrîa augîte. 22Tûtingîathîkîra watho wa mûthamaki, na tûtingîcenjia ûrîa tûvoyaga Ngai wetû wana vanini.”
23Rîrîa Matathia aarîkirie kwaria ciugo icio, Mûyahudi ûmwe nîwaumîrire vau mbere ya andû onthe na akîambîrîria kûrutîra ngai cia mîvuanano magongoona metharî ya kîgongoona îrîa yaigîtwe vau. 24Rîrîa Matathia oonire ûguo, nîwanyitirwe nî marakara manene na ngoro yake îkîambarara na îgûrû. Na wa agîtetemaga nî marakara, nîwathiîre na îvenya kûrî mûndû ûcio na akîmûragîra vau îgûrû rîa metha ya kîgongoona. 25Nîwacokire akîûraga ndungata ya mûthamaki îrîa yaringagîrîria andû kûruta îgongoona, na akîomomora metha îo ya kîgongoona. 26#Nda 25.6-15 Ûndû ûcio nîwatûmire kûmenyeke atî Matathia nî mwathîkîri wa watho, wata ûrîa Finehasi oonanirie rîrîa aûragire Zimuri, mûvîcî wa Salu.
27Matathia nîwacokire agîtuîkanîria werûrî akîanagîrîra na mûgambo mûnene atîrî, “Mûndû wa wonthe wîcî atî nîathîkagîra watho wa Ngai na nî mwîvokeku kîrîkanîrorî gîake, nîanûmîrîre!” 28Matathia na avîcî ake nîmaavinyûrire na magîtiga indo ciao cionthe irîa maarî nacio kûu îtûûrarî.
29Vîndî îo andû a Isiraeli eengî arîa mendaga kûrûmia ndini yao na watho nîmaanyûrûkire na makîthiî werûrî gûtûûra kuo, 30marî na ciana ciao aka ao, ndîthia ciao, nîûndû nîmoonaga mathîna mûno na makanyarirwa. 31Kwoguo ndûmîrîri nîyakinyîre atongoria a mûthamaki na athigari arîa maarî Jerusalemu îtûûra rîa Daudi atî, andû arîa mararegire kwathîkîra watho wa mûthamaki nîmatorokete makathiî kwîthitha werûrî. 32#2Mak 6.11 Athigari eengî mûno nîmaamarûmîrîrie na rîrîa maamakinyîre, nîmaambire magema mang'ethanîrîte nao na makîambîrîria kûmatharîkîra mûthenya wa thavatû. 33Nao athigari acio nîmerire Ayahudi acio atîrî, “Nî ûguo rîu! Umîrani na mwîyûmîrîrie nîguo mûvingie watho wa mûthamaki na nî mûgûtûûra mwoyo.”
34Nao Ayahudi acio methithîte nîmaacokirie atîrî, “Tûtingiumîra wana tûtingîathîkîra watho wa mûthamaki kana tûgwatie mûthenya wa thavatû mûgiro.”
35Athigari acio nîmaambîrîrie kûmatharîkîra na îvenya. 36Nao Ayahudi matierîvîrîria kana mamaikîria îthiga, kana kûmagiria matonye kûrîa meethithîte, 37nîûndû maaugire atîrî, “Tuonthe nîtûkua tûrî na ngoro ntheru. Tiga îgûrû na nthî ituîke aira atî mûratûûraga vatarî na kîvooto.” 38Kwoguo nîmaamatharîkîre mûthenya wa thavatû na makîûraga andû ngiri îmwe, (1,000) arûme, aka, ciana, wana nginya ndîthia.
39Rîrîa Matathia na arata ake meeguire ûrîa Ayahudi maûragîtwe, nîmaamarîrîre mûno na makîmacakaîra makiugaga atîrî, 40“Tûtingîîrekereria ta ûguo aa mûrwaiya marekire na marega kûrûa na nthû ciao nîguo magitîre mîoyo yao na ndini yao, nîûndû mavota gûtûûraga tuonthe tûthire gûkû nthî.” 41Kwoguo mûthenya ûcio nîmaatuire îtua makiuga atîrî, “Mûndû wa wonthe ûgaatûtharîkîra mûthenya wa thavatû, wana ethîrwa nû kana nû, nwanginya tûkerûîrîra nîguo tûtikaûragwe ta andû etû arîa maaûragîrwe kûrîa meethithîte.”
42Nakîo gîkundi Kîam Ayahudi arîa meetîkîtie na maarûmîtie kîrîra Kîamo na mendete kûgitîra vûrûri wao, arîa maarî njamba cia Isiraeli, nîmeetukanîre na Matathia na arata ake. 43Wana Ayahudi arîa maaûrîte nîûndû wa gwîtigîra kûûragwa, nîmetukanîre nao nîguo mamaimbîrîrie. 44Rîrîa maagîre na gîkundi kînene Kîam mbaara, nîmaatharîkîre Ayahudi arîa maagarûrûkîte magatiganîria watho, mecûrîtwe nî marakara na ûrûrû mwîngî. Nao arîa maavotire kûûra nîmaathiîre kwîthitha kûrî andû a ndûrîrî. 45Matathia na arata ake nîmaathiîre kûndû na kûndû makîomomorangaga metha cia magongoona cia ngai cia mîvuanano, 46na kûruithia na vinya anake onthe arîa meethagîrîria matarî aruu kûu Isiraeli kuonthe. 47Nao nîmaavootire atongoria acio a mûthamaki. 48Kwoguo nîmaavonokirie watho wa Musa kuuma njararî cia andû a ndûrîrî na athamaki a kuo na matietîkîria mûthamaki ûcio mwîvia avootane.
Matathia nîwakwire
49Rîrîa Matathia oonire mavinda make ma gûkua nîmakuvîvîria, nîwerire ciana ciake atîrî: Mavinda mama nî ma thîna na mbaara. Andû matarî na gîtîîo nîo marî na ûvoti, nîmatûcambîtie wana magatûconorithia. 50Kûnarî ûguo mue ciana ciakwa, namûthaitha mûrûmie watho na mûgitîre kîrîkanîro Kîam Ngai na methe metû, wana ethîrwa gwîka ûguo nwa gûtûme mûragwe.
51“Taririkanani maûndû marîa methe metû meekire îvindarî rîao, namue nîmûkaavewa gîtîîo na mûtûûre mûkumagua tene na tene. 52#Kîam 15.16; 22.15-18 Taririkanani ûrîa Iburahimu aarî mwîvokeku mbere ya Mwathani, atî wana agerua nîwakenirie Ngai na agîtuwa mûthingu. 53#Kîam 39.1—45.28 Nake Josefu rîrîa aarî mathînarî, nîwathîkîre maathani ma Ngai na agûtuwa mûthamaki wa Misiri. 54Nake ûma Finehasi, nîûndû wa kwîrutîra gwake, nîwerîrwe atî njiarwa ciake nîitûûra irî athînjîri-Ngai tene na tene. 55#Nda 13.1—14.12 Joshua, nîûndû wa kûvingia watho nîwatuîkire mûtirîrîri vûrûri wa Isiraeli. 56Nake Kalebu, nîûndû wa kûvirîra andû ndûmîrîri mbaro, nîwagaîrwe gîcunjî kîmwe Kîam vûrûri kîrî kîveo. 57#2Sam 7.16 Daudi, nîûndû aarî wa ntha, nîwaverwe gîtî Kîam ûthamaki gîa tene na tene. 58#2Atha 2.9-12 Nake Elija, nîûndû wa kwîrutîra gûtîîa watho na vinya, nîwavirirwe îgûrû. 59#Dan 3.8-30 Hanania, Azaria na Mishaeli, nîmaavonokirue kuuma mwakirî mûnene nîûndû maarî na wîtîkio. 60#Dan 6.1-24; Beli 31-42 Danieli aarî mûndû mûthingu, nake Ngai nîwamûvonokirie kanyuarî ka mûnyambû. 61Methe acio etû maarî kîonereria gîetû, nîguo mûmenye atî mûndû ûrîa wîvokaga Ngai ndangîtura ûtethio.
62“Ndûgetigîre wamakua nî mûndû mwîvia. Ririkanani atî wanake nwa agaakua na mwîtîîo ûcio wake ûthire na mwîrî wake wonthe ûrîwe nî mûthûa. 63Ûmûnthî nwa atûgîrue na akumue, nwatî rûciû ndakeethîrwa arî vo. Mwîrî wake ûkethîrwa ûcokete mûtheturî, nayo mîvango yake yagithîtue kîene. 64Nwatî mue ciana ciakwa, îîyûmîrîrieni na mûgîe na vinya ûvororî wa kûrûmîrîra watho, nîûndû watho nîûgaatûma mûvewe gîtîîo. 65Simioni mûrwanyûkwe nî mûndû mûûgî na arî kîrîra. Vîndî cionthe mûthikagîrîrieni wata ûrîa mûngînthikîrîria nie îthe wenyu.
66“Judasi Makabii atûûrîte arî mûthigari njamba kuuma arî mûndû mwîthî. Nîke ûgûtongoria gîkundi kîenyu Kîam mbaara mûkîrûa na nthû cienyu. 67Kwoguo îtani andû onthe, wa mûndû mwathîkîri watho magomane vamwe, mûrîvîrîrie maûndû macûku marîa makîtwe nî andû enyu. 68Vani andû a ndûrîrî mûcara wa wîra wao ûrîa marutîte, na vîndî cionthe mwathîkagîre watho na irîra ciaguo.”
69Nake arîkia kûmarathima, nîwakuire. 70Akuire mwaka wa 146#2.70 mwaka wa 146: mwaka ûyû ûringanîte na mwaka wa 166 mbere ya gûciarwa kwa Jesû Kristû., na akîthikwa mbîrîrarî ya methe make ma tene kûu Modeini. Nao andû a Isiraeli onthe nîmaamûrîrîre na makîmûcakaîra mûno.
Currently Selected:
1Mak 2: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019