मरकुस 14

यीसू जो पकड़ने री योजना

(मत्ती 26:1-5; लूक. 22:1,2; यहू. 11:45-53)

1दो ध्याड़े ले बाद फसह रा साजा होर अस्जेह्ड़ी रोटी रा साजा हूंणे वाल़ा था। होर मुख्य याजके होर तेबे व्यवस्था स्खाणे वाल़े एस गल्ला री ताका मन्झ थे कि यीसू जो धोखे किन्हें पकड़े होर मारी दे। 2पर स्यों बोल्हा ऐं थे कि, “साजे रे ध्याड़े नी पकड़णा, केते एह्ड़ा नी हो कि हाल्ला पई जाए।”

यीसू पर कीमती खुस्बूदार इत्रा रा दलणा

(मत्ती 26:6-13; यहू. 12:1-8)

3जेबे यीसू बैतनिय्याह गांऊँआं मन्झ समौन जेसरा यीसूए पैहले कोढ़ ठीक कितिरा था तेसरे घरा खाणा खांदे बैठिरा था। तेबे एक ज्नाने संगमरमरा रे भांडे मन्झ कीमती खुस्बूदार इत्र लई किन्हें आई, होर भांडा तोड़ी किन्हें इत्र तेसरे मूंडा पर दलेया।

4पर कुछ लोक जो तेथी बैठिरे थे स्यों चिढ़ी किन्हें आपणे मना मन्झ बोल्दे लगे, “एस इत्रा री इतनी बरबादी किधियो किती? 5क्यूंकि एस इत्रा री कीमत जो एक साला री कमाई रे बराबर ई एता जो बेची किन्हें गरीबा मन्झ बांडी सक्हा ऐं थे।” होर स्यों तेस्सा ज्नाने जो प्रुआच्दे लगे।

6यीसूए बोल्या, “एस्सा जो छाडी देऊआ; एस्से मेरे साउगी खरा कितेया, तुस्से एस्सा जो किधियो परेसान करेया करहा ऐं? 7गरीब ता तुस्सा साउगी हमेसा रैहणे होर तुस्से जेबे चाहो तेबे तिन्हा किन्हें भलाई करी सक्हा ऐं; पर मां तुस्सा साउगी हमेसा नी रैहणां। 8जो कुछ से करी सकी, तेस्से कितेया; तेस्से मेरे मरणे ले पैहले ई मेरे सरीरा पर इत्र मली किन्हें मेरी दफनाणे री त्यारी करी दिती। 9हांऊँ तुस्सा किन्हें सच्च बोल्हा कि, सारे संसारा मन्झ जेथी केथी मसीह री खुसी री खबर प्रचार किती जाणी, तेथी तेस्सा रे एस कामा री गल्ला तेस्सा री यादा मन्झ बोली जाणी।”

यहूदा इस्करयोति रा धोखा देणा

(मत्ती 26:14-16; लूक. 22:3-6)

10तेबे यहूदा इस्करयोति जो बारा चेलेया मन्झा ले एक था, मुख्य याजका वाले गया, ताकि से यीसू जो धोखे किन्हे पकड़ने रे कठे तिन्हारी मदद करहे। 11स्यों ये सुणी किन्हें बौह्त खुस हुए होर यहूदा जो ढब्बे देणे रा वादा कितेया, होर से ये मौका तोप्दा लग्या कि किहाँ हांऊँ यीसू जो पकड़वाऊं?

चेले साउगी फसहा रे साजे री आखरी खाणा

(मत्ती 26:17-25; लूक. 22:7-14; यहू. 13:21-30)

12अस्जेह्ड़ी रोटी रे साजे रे पैहले ध्याड़े, जेस मन्झ फसहा रे छेलू रा बलिदान करहा ऐं थे, यीसू रे चेले तेस ले पूछेया, “आस्से फसहा रे साजे रा खाणा केथी त्यार करहे?”

13यीसूए आपणे चेले मन्झा ले दुंहीं जो ये बोली किन्हें भेज्या कि, “यरुस्लेम रे सैहरा मन्झ जाऊआ, होर एक माह्णुं पाणी रा घड़ा ल्याउंदे हुए तुस्सा जो मिलणा, तेसरे पीछे चली जाया। 14होर से जेस घरा मन्झ जाए तेस घरा रे माल्का किन्हें बोल्या: ‘आस्सा रा गुरू बोल्हा कि, प्रौह्णे रा कमरा जेथी जे मां आपणे चेलेया साउगी फसहा रे साजे रा खाणा-खाणा, से केथी आ?’ 15तेस तुस्सा जो एक सजा सजाईरा, होर त्यार कितिरा बडा कमरा दसी देणा, तेथी आस्सा रे कठे खाणे री त्यारी करा।”

16होर दो चेले निकली किन्हें सैहरा मन्झ आई गये होर जेह्ड़ा यीसूए तिन्हा किन्हें बोलिरा था, तेह्ड़ा ई पाया, होर तिन्हें फसहा रे साजे रे खाणे री त्यारी किती।

17जेबे सांझ हुई, ता यीसू आपणे बारा चेलेया तेस साउगी त्यार कितरे हुए कमरे मन्झ आया। 18होर जेबे स्यों बैठी किन्हें खाणा खांदे ही लगिरे थे, ता यीसूए बोल्या, “हांऊँ तुस्सा किन्हें सच्च -सच्च बोल्हा कि, तुस्सा मन्झा ले ऐकीया, जो मेरे साउगी खाणा खाया करहा, हांऊँ पकड़वाणा।”

19स्यों दुआस हुई गये, होर स्यों एक-एक करी किन्हें यीसू ले पूछदे लगे, “क्या से हांऊँ आं?”

20यीसूए तिन्हा किन्हें बोल्या, “से बारा चेले मन्झा ले एक आ, जो मेरे साउगी बैठी किन्हें डोंगें मन्झ रोटी डुबान्दा लगीरा। 21क्यूंकि हांऊँ माह्णुं रे मह्ठे रा मरणा ता पक्का आ, जेह्ड़ा नबिये मेरे बारे पवित्र सास्त्रा मन्झ लिखिरा आ। पर जेस हांऊँ पकड़वाणा तेस कठे ये कितना ड्राऊणा हुणा! होर अगर तेस माह्णुं रा जन्म नी हुन्दा ता तेसरे कठे खरा हुन्दा।”

प्रभु-भोज

(मत्ती 26:26-30; लूक. 22:14-20; 1 कुरि. 11:23-25)

22होर जेबे स्यों खाया करहा ऐं थे ता यीसूए रोटी लई, होर परमेसरा रा धन्यावाद करी किन्हें तोड़ी, होर तिन्हा जो दिती, होर बोल्या, “लऊआ, ये मेरा सरीर आ।”

23फेरी तिन्हें अंगूरा रे रसा रा डोंगा लई किन्हें परमेसरा रा धन्यावाद कितेया, होर तिन्हा जो दितेया; होर तिन्हें सभिऐ तेता मन्झा ले पितेया।

24होर यीसूए तिन्हा किन्हें बोल्या, “ये वाचा रा मेरा से खून आ। होर कई लोका रे पापा रे उद्धारा रे कठे बहाया जाहाँ।” 25“हांऊँ तुस्सा किन्हें सच्च बोल्हा, ऐबे मां ये अंगूरा रा रस कधी नी पीणा, जेबे तक परमेसरा रे राजा मन्झ नंऊँआं नी पिंऊँ।”

26फेरी स्यों भजन गाई किन्हें जैतूना रे प्हाड़ा पर चली गये।

पतरसा रा मुखरी जाणे री भविस्यवाणी

(मत्ती 26:31-35; लूक. 22:31-34; यहू. 13:36-38)

27जेबे स्यों जैतूना रे प्हाड़ा पर जाया करहा ऐं थे तेबे यीसूए तिन्हा किन्हें बोल्या, “आज राती तुस्सा सभिया हांऊँ छाडी देणा होर भगी जाणा,” क्यूंकि पवित्र सास्त्रा मन्झ मेरे बारे मन्झ परमेसरे बोलिरा कि:

“‘मां परमेसरा रा पुहाल मारी देणा,

होर भेडा ओरे-परे बिखरी जाणी।’

28पर जिउंदे हूंणे ले बाद मां तुस्सा ले पैहले ई गलील जिल्ले मन्झ ई किन्हें तुस्सा साउगी मिलणा।” 29पतरसे तेस किन्हें बोल्या, “अगर सभ तुस्सा जो छाडी देह्ंगे तेबे भी मां तुस्से नी छाडणे।”

30यीसूए तेस किन्हें बोल्या, “हांऊँ तुध किन्हें सच्च बोल्हा कि, आज राती ई कुकड़ा रे दो बारी बांग देणे ले पैहले, तुध त्राय बारी मुखरी जाणा।”

31पर तिन्हें होर जोर देई किन्हें बोल्या, “अगर मुंजो तेरे साउगी मरणा भी पहूंगा, तेबे बी मां तेरी नांह कधी नी करणी।” होर सभी चेले भी एह्ड़ा बोल्या।

गतसमनी बगीचे मन्झ प्रार्थना

(मत्ती 26:36-46; लूक. 22:39-46)

32फेरी यीसू होर चेले गतसमनी बगीचे मन्झ आये; होर तिन्हें आपणे चेले किन्हें बोल्या, जेबे तक हांऊँ प्रार्थना करूं, तुस्से एथी बैठी रैहया। 33होर से पतरस होर याकूब होर यहून्ना जो आपु साउगी लई गया; होर से बौह्त ज्यादा दुःखी होर परेसान हुन्दा लग्या, 34होर यीसूए तिन्हा किन्हें बोल्या, “मेरा मन बौह्त दुआस आ, एथी तक कि मुंजो एह्ड़ा लगी करहा कि हांऊँ मरणे वाल़ा आ: तुस्से एथी रूका, होर मेरे साउगी जागदे रहूआ।”

35होर से थोह्ड़ा अगे जे चली गया, होर जमीना पर मुंहा रे भारे झुकी किन्हें प्रार्थना करदा लग्या कि, अगर हुई सके ता दुखा रा ये टैम मेरे वाले ले हट्टाई दे। 36होर बोल्या, “बापू, हे मेरे बाबू, तेरे ले सभ कुछ हुई सक्हा; एस दुखा रा डोंगें जो मेरे वाले ले हट्टाई दे: तेबे भी जेह्ड़ा हांऊँ चाहां तेह्ड़ा नी, पर जो तू चाहां तेह्ड़ा ई हो।”

37होर यीसूए दबारा वापस आई किन्हें स्यों तीनो चेले सुत्तिरे देखे, होर पतरसा किन्हें बोल्या, “हे समौन, तू सोया करहा? क्या तू एक घंटे भी जागी नी सकेया? 38जागदे होर प्रार्थना करदे रैहया ताकि जेबे तुस्सा री परखणी हो तेबे तुस्से परखणी रा मुकाबला करी सको। तुस्सा रा मन ता परखणी रा मुकाबला करणे कठे त्यार आ, पर सरीर कमजोर आ।”

39फेरी यीसू दबारा वापस चली गया, होर पैहले साहीं किन्हें प्रार्थना किती। 40होर यीसूए दबारा वापस आई किन्हें स्यों तीनो चेले सुत्तिरे देखे, क्यूंकि स्यों बौह्त निंद्रा मन्झ थे कि स्यों आपणी हाखिया नी घुआड़ी सके; जेबे यीसूए स्यों आई किन्हें जगाए ता स्यों सर्मिन्दा हुई गये होर स्यों समझी नी पाए कि यीसू जो क्या जवाब दे।

41यीसू त्रीजी बारी दबारा वापस आया होर तिन्हा किन्हें बोल्या, “तुस्से हल्ली भी सौंदे होर अराम करदे लगिरे, बस भतेरा हुआ, टैम आई गया; हांऊँ माह्णुं रा मह्ठा पापिया रे हाथा पकड़वाया जाहाँ। 42ऊठा, चला! देखा, मेरा पकड़वाणे वाल़ा नेडे आई गईरा!”

यीसू रा धोखे किन्हें पकड़वाया जाणा

(मत्ती 26:47-56; लूक. 22:47-53; यहू. 18:3-12)

43यीसू एह्ड़ा बोल्या ई करहा था कि, यहूदा इस्करयोति, जो बारा चेले मन्झा ले एक था, आपणे साउगी मुख्य याजक होर व्यवस्था स्खाणे वाल़े होर यहूदी मुखिये री तरफा ले एक बडी भीड़ तलवारा होर डंडे लई किन्हें झटपट आई पुज्ही।

44होर तेसरे पकड़वाणे वाले यहूदे तिन्हा जो ये चिन्ह दस्सीरा था कि, जेस जो हांऊँ गले लगाऊं, सेई यीसू हूंणां, तेस जो पकड़ी किन्हें स्पाहीया री निगरानी मन्झ लई जाया। 45होर तिन्हें झटपट यीसू वाले जाई किन्हें बोल्या, “हे गुरु!” होर यहूदे यीसू गले लगाया। 46तेबे तिन्हें तेस जो पकड़ी किन्हें गिरफ्तार करी लया। 47होर यीसू रे चेलेया मन्झा ले एकिये तलवार काढी होर बडे याजका रे नौकरा पर चलाई, होर तेसरा कान टुकी दितेया।

48यीसूए तिन्हा किन्हें बोल्या, “क्या तुस्से डाकू समझी किन्हें मुंजो पकड़णे रे कठे तलवारा होर डंडे लई किन्हें निकली रे? 49हांऊँ ता हर रोज मन्दरा मन्झ तुस्सा साउगी रही किन्हें उपदेस देहां था, होर तेबे तुस्से हांऊँ नी पकड़ेया: पर ये इधी कठे हुआ कि पवित्र सास्त्रा री गल्ला पूरी हुई जाए।” 50होर सभ गल्ला जो देखी किन्हें चेले यीसू जो छाडी किन्हें भगी गये।

51होर एक जुआन आपणे नांगे सरीरा पर चादर ढखी किन्हें यीसू रे पीछे-पीछे चल्लीरा था; होर लोके तेस जो पकड़णा चाहेया। 52पर से चादर छाडी किन्हें नांगा भगी गया।

माहसभा रे साम्हणें यीसू

(मत्ती 26:57-68; लूक. 22:54,55,63-71; यहू. 18:13,14,19-24)

53फेरी स्यों यीसू जो बडे याजका वाले लई गये; होर सभ मुख्य याजके होर यहूदी मुखिये होर व्यवस्था स्खाणे वाल़े तेस वाले कठे हुई गये। 54पतरस दूरा-दूरा ले ई तेसरे पीछे-पीछे बडे याजका रे आंघणा रे अंदर तक गया, होर पैहरेदारा साउगी बैठी किन्हें आग तफ्दा लग्या।

55मुख्य याजक होर सारी माहसभा यीसू जो मारणे रे कठे तेसरे बरखलाफ गुआही री तलासा मन्झ थे, पर नी पाई सके। 56क्यूंकि बौह्त सारे लोक तेसरे बरखलाफ झूठी गुआही देआ करहा ऐं थे, पर तिन्हा लोका री गुआही इतनी मजबूत नी थी कि यीसू पर दोस लगी सके।

57पर कुछ लोके उठी किन्हें तेसरे बरखलाफ झूठी गुआही देंदे लगे 58कि “आस्से यीसू जो बोल्दे सुणीरा कि, ‘मां ये हाथा रा बणाईरा मन्दर ढाई देणा, होर तीन ध्याड़े मन्झ होर दूजा मन्दर बणाई देणा जो हाथा ले नी बणीरा हो।’” 59पर एस गल्ला पर भी तिन्हारी गुआही एक बराबर नी थी।

60तेबे बडे याजके बीचा मन्झ खड़ी किन्हें यीसू ले पूछेया; कि “तू कोई जवाब नी देंदा? ये लोक तेरे बरखलाफ गुआही देआ करहा ऐं?” 61पर से चुपचाप रैहया, होर कुछ जवाब नी दितेया। बडे याजके दबारा तेस ले पूछेया, “क्या तू तेस धन्य परमेसरा रा मह्ठा मसीह आ?”

62यीसूए बोल्या, “हां, हांऊँ आं! होर हांऊँ माह्णुं रा मह्ठा तुस्सा सर्वसक्तिमान परमेसरा री सीधी वखा जो बैठीरे देखणा, होर आसमाना रे बादला साउगी आऊंदे देखणा।” 63यीसू जेबे एह्ड़ा बोल्दा लगीरा था ता ये सुणी किन्हें तेबे बडे याजके आपणा चोगा छेकी#14:63 जेबे कोई परमेसरा री निंदा करहा ऐं थे ता स्यों आपणा चोगा फाड़हा ऐं थे, ये यहूदी लोका रा रुआज था। किन्हें बोल्या, “ऐबे आस्सा जो होर गुआहा रा क्या काम आ?” 64“तुस्से सब यीसू जो परमेसरा री निंदा करदे हुए सुणी करहा ऐं; तुस्सा रा क्या विचार आ?” तिन्हें सभिए बोल्या, ये मौता री सजा रे लायक आ। 65तेबे कुछ तेस पर थुकदे लगे, होर तेसरा मुंह ढकदे होर तेस जो मुक्के मारी किन्हें, तेस किन्हें बोल्दे लगे, “लोक तुजो नबी बोल्हा ऐं ऐबे अंदाजा लगाई किन्हे बोल तुजो कुण मारेया करहा!” होर पैहरेदारे यीसू जो पकड़ी किन्हें चांडे मारे।

पतरसा रा मुखरी जाणा

(मत्ती 26:69-75; लूक. 22:56-62; यहू. 18:15-18,25-27)

66जेबे पतरस हेठ आंघणा मन्झ था, ता बडे याजका री नौकराणिया मन्झा ले एक तेथी आई। 67तेस्से पतरसा जो आग तफदे देख्या होर तेस जो ध्याना किन्हें देखी के बोलदी लगी, “तू भी तेस नासरता रे यीसू साउगी था।”

68से मुखरी गया, होर बोल्या, “ना हांऊँ तेस जो जाणहां होर ना मेरी समझा मन्झ आया करहा कि तू क्या बोल्या करहा ई?” फेरी से बाहर दुराजे री चोखटा वाले गया; होर तेभे ई कुकड़े बांग दिती।

69जेबे नौकराणिये पतरसा जो तेथी खड़ीरे देख्या तेबे से लोका साउगी बोल्दी लगी कि, “ये भी यीसू रे लोका मन्झा ले एक आ।” 70पर पतरस दबारा मुखरी गया। होर कुछ टैमा बाद कुछ लोक जो ओरे परे खड़ीरे थे तिन्हें पतरसा किन्हें बोल्या, “पक्का तू यीसू रे साउगी रैह्णे वाल़ेया मन्झा ले एक आ; क्यूंकि तुस्सा री गला ले लग्या करहा कि तू भी गलील जिल्ले रा आ।”

71पतरसे बोल्या हांऊँ कसम खाई किन्हें बोल्हा कि, “हांऊँ तेस माह्णुं जो नी जाणदा, जेसरे बारे मन्झ जे तुस्से गल्ला करेया करहा ऐं।”

72होर तिहां ईं दूजी बारी कुकड़े बांग दिती, पतरसा जो यीसू री बोलिरी ये गल याद आई कि, “कुकड़ा रे दो बार बांग देणे ले पैहले तुध त्राय बारी मेरी नांह करणी।” से तेसरी ये गल्ला सोची किन्हें बड़ा भारी रोंदा लग्या।

Currently Selected:

मरकुस 14: MJLNT

Highlight

Copy