मरकुस 15

पिलातुसा हाकमा रे साम्हणें यीसू

(मत्ती 27:1,2,11-14; लूक. 23:1-5; यहू. 18:28-38)

1होर भ्याग हुंदे ई झटपट मुख्य याजके, यहूदी मुखिये होर व्यवस्था स्खाणे वाल़े ये होर माहसभा रे लोके सलाह करी किन्हें यीसू जो बान्हेया, होर तेस जो लई जाई किन्हें यहूदिया ईलाके रे पिलातुस हाकमा रे हाथा मन्झ सौंपी दितेया।

2होर पिलातुस हाकमे तेस ले पूछेया, “क्या तू यहूदी लोका रा राजा आ?” यीसूए तेस जो जवाब दितेया कि, “तू आप्हुए बोल्या करहा।”

3होर मुख्य याजक तेस पर बौह्त गल्ला रा दोस ल्गाया करहा ऐं थे। 4पिलातुस हाकमे तेस ले दबारा पूछेया, “क्या तू कुछ जवाब नी लगीरा देंदा, देख, यूं तेरे पर दोस ल्गाया करहा ऐं?” 5यीसूए दबारा कुछ नी बोल्या; एथी तक कि पिलातुस हाकमे जो बड़ी हरानी हुई।

मौता री सजा रा हुक्म

(मत्ती 27:15-26; लूक. 23:13-25; यहू. 18:39; 19:16)

6होर हर साल फसहा रे साजे रे टैमा मन्झ एक कैदी जो लोका री मांगा रे मताबक छाडणे रा हाकमा रा रुआज था। 7होर बरअब्बा नांऊँआं रा एक माह्णुं तिन्हा बंदी साउगी कैदी था, जिन्हें जे दंगे मन्झ हत्या कितिरी थी। 8होर भीड़ पिलातुस हाकमा वाले जाई किन्हें तेस ले अर्ज करदी लगी कि, जिहां तू हमेसा ले आस्सा रे कठे करदा आईरा तेह्ड़ा ई तू एक कैदी जो आस्सा रे कठे छाडी दे।

9पिलातुस हाकमे तिन्हा जो जवाब दितेया, जेस जो तुस्से यहूदी लोका रा राजा बोल्हा ऐं क्या तुस्से चाहें कि, हांऊँ तेस जो छाडी देऊँ। 10क्यूंकि पिलातुस जाणहां था कि, मुख्य याजके यीसू किन्हें जलन रखणे री वजहा ले से पकड़वाईरा था। 11पर मुख्य याजके भीड़ भड़काई ताकि स्यों पिलातुसा हाकमा किन्हें अर्ज करहे कि मसीह यीसू री जगहा पर बरअब्बा जो छाडी दे।

12ये सुणी किन्हें पिलातुस हाकमे तिन्हा ले दबारा पूछेया, “तेबे जेस जो जे तुस्से यहूदी लोका रा राजा बोल्हा ऐं, तेसरा हांऊँ क्या करूं?”

13स्यों दबारा चिंगे कि, यीसू जो क्रूसा प्रयाल्हे चढ़ाई किन्हें मुकाई देआ।

14पिलातुस हाकमे तिन्हा किन्हें बोल्या, “किधियो, इन्हें क्या बुराई कितिरी?” पर स्यों होर भी चिंगी-चिंगी किन्हें बोलदे लगे कि, “यीसू जो क्रूसा प्रयाल्हे चढ़ाई किन्हें मुकाई देआ।”

15तेबे पिलातुस हाकमे भीड़ा जो खुस करणे रे कठे, बरअब्बा जो तिन्हारे कठे छाडी दितेया, होर यीसू जो कोड़े ल्गाई किन्हें स्पाहीया रे हाथा सौंपी दितेया कि, तेस जो क्रूसा प्रयाल्हे चढ़ाई किन्हें मुकाई दितेया जाए।

स्पाहीया रे ज्रीए यीसू रा मजाक डुआणा

(मत्ती 27:27-31; यहू. 19:2,3)

16होर स्पाही यीसू जो किले रे अंदर आंघणा मन्झ लई गये, (जेस जो प्रीटोरियन मतलब पिलातुस हाकम रा सानदार घर बोल्या जाहाँ) होर सारी पलटना जो सादी लया। 17होर तिन्हें तेसरा मजाक डुआणे रे कठे तेस जो बैंगणी रंगा रा चोगा पन्ह्याये होर काण्डे रा ताज गुन्धी किन्हें तेसरे मूंडा पर रख्या। 18होर ये बोली किन्हें स्यों तेस जो नमस्ते करदे लगे कि, “हे यहूदी लोका रे राजे, नमस्कार!” 19होर स्यों तेसरे मूंडा पर सरकंडे लेई किन्हें बार-बार मारदे, होर तेस पर थुकदे होर घुटने टेकी किन्हें तेस जो नमस्कार करदे रहे। 20होर जेबे स्यों तेसरा मजाक डूआई बैठे ता तिन्हें जो बैंगणी रंगा रा चोगा तेस जो पन्ह्याईरा था से तुआरी किन्हें तिन्हें तेस जो तेसरे कपड़े पन्ह्याई दिते, होर तेबे तेस जो क्रूसा प्रयाल्हे चढ़ाणे रे कठे यरुस्लेम सैहरा ले बाहर लई गये।

यीसू रा क्रूसा प्रयाल्हे चढ़ाया जाणा

(मत्ती 27:32-44; लूक. 23:26-43; यहू. 19:17-27)

21कुरेनी#15:21 उत्त्तर अफ्रीका रे देसा मन्झ एसरा जन्म हुईरा था, होर ये कुरेनी सैहरा रे यहूदी समूह रा था, हुई सक्हा कि समौन फसहा रा साजा मनाणे रे कठे इस्राएल देसा मन्झ आईरा था सैहरा रा एक समौन नांऊँआं रा माह्णुं से जे सिकंदर होर रूफसा रा बापू आ, से यरुस्लेम सैहरा वखा जो आई करहा था; तिन्हें तेस जो बगारी मन्झ जबरदस्ती पकड़ेया कि से यीसू रा क्रूस चकी किन्हें लई चले। 22होर स्यों तेस जो गुलगुता नांऊँआं री जगहा पर लई गये जेसरा मतलब आ, खोपड़ी री जगहा। 23होर स्यों तेस जो लोहबान#15:23 स्यों चाहें थे कि यीसू एता जो पिए ताकि तेस जो क्रूसा प्रयाल्हे चढ़ाए जाणे पर ज्यादा पीड़ मैहसूस नी करहे मिलाईरा अंगूरा रा रस देंदे लगे कि तेस जो पीड़ ना हो, पर तिन्हें से नी लया। 24तेबे तिन्हें यीसू क्रूसा प्रयाल्हे चढ़ाई दितेया, होर तेसरे कपड़े पर चिठिया पाई, ताकि ये फैसला हुई सके कि केस-केस जो क्या बांड मिलणी।

25होर ये भ्यागा रे नो बजे जेबे जे तिन्हें से यीसू क्रूसा प्रयाल्हे चढ़ाया। 26होर तेसरा दोस पत्र लिखी किन्हें क्रूसा प्रयाल्हे टांगी दितेया जेस पर लिखिरा था, “ये यहूदी लोका रा राजा आ।”

27,28होर तिन्हें यीसू साउगी दो डाकू, एकी जो ओरली वखो होर दूजे जो परली वखा क्रूसा प्रयाल्हे चढ़ाए, होर इंहां करी किन्हें पवित्र सास्त्रा मन्झ लिखिरा से वचन पूरा हुआ कि से, “डाकूआ साउगी गिणेया गया।”

29होर पैंडे मन्झ आऊणें जाणे वाले मूंड हिल्लाई-हिल्लाई किन्हें ये बोली किन्हें तेसरी निंदा करहा ऐं थे कि, वाह! मन्दरा जो ढाणे वाले होर तीन ध्याड़े मन्झ बनाणे वाले!#15:29 भज. 22:7, भज. 109:25 30क्रूसा प्रयाल्हे ले उतरी किन्हें आपणे आपा जो बचाई ले। 31इंहां ईं मुख्य याजक व्यवस्था स्खाणे वाल़े साउगी, आपु मन्झ मजाक करेया करहा ऐं थे कि, “इन्हें होर बचाए, होर से आपणे आपा जो नी बचाई सक्दा? 32इस्राएल देसा रा राजा मसीह ऐबे क्रूसा प्रयाल्हे ले उतरी किन्हें आई जा कि, आस्से देखी किन्हें विस्वास करिए।” होर जो कैदी तेस साउगी क्रूसा प्रयाल्हे चढ़ाई रे थे, स्यों भी यीसू रा मजाक डूआया करहा ऐं थे।

यीसू रा मरणा

(मत्ती 27:45-56; लूक. 23:44-49; यहू. 19:28-30)

33होर पुरे देसा मन्झ बारा बजे ले तीन बजे तक सब जगहा न्हयारा हुई गया। 34तीन बजे यीसूए चिंगी किन्हें जोरा किन्हें बोल्या, “इलोई, इलोई, लमा सबक्तनी?” जेसरा मतलब आ, “हे मेरे परमेसर, हे मेरे परमेसर तैं हांऊँ किधियो छाडी दितेया?”

35होर जो तेसरे नेडे खड़ीरे थे, तिन्हा मन्झा ले कई लोका जो गलतफैह्मी हुई; की से एलिय्याह नबी जो सादेया करहा। 36होर एकिये दौड़ी किन्हें स्पंज जो सिरके मन्झ डूबोया, होर सरकंडे पर रखी किन्हें तेस जो चुसणे जो दितेया, होर बोल्या, “रुकी जाऊआ; देख्हा ऐं कि, एलिय्याह नबी तेस जो थाले तुआरने रे कठे आहूँआं कि, नी।”#15:36 भज. 69:21

37तेबे यीसूए बड़े जोरा किन्हें चिंगी किन्हें आपणे प्राण छाडी दिते।

38होर मन्दरा रा पर्दा ऊपरा ले लई किन्हें हेठा तक फटी किन्हें दो टुकड़े हुई गया। 39जो सूबेदार तेसरे साम्हणें खड़ीरा था, जेबे तिन्हें यीसू जो चिंगी किन्हें प्राण छाडदे हुए देख्या, ता तेस किन्हें बोल्या, सच्चे ये माह्णुं, ता परमेसरा रा मह्ठा था।

40कई ज्नाने भी दूरा ले देख्या करहा ई थी; तिन्हा मन्झ मगदल गांऊँआं री मरियम होर छोटे याकूब होर योसेसा री माऊ मरियम होर सलोमी थी। 41जेबे यीसू गलील जिल्ले मन्झ था, ये ज्नानिया जो तेसरी चेल्णिया थी स्यों तेसरी सेऊआ करहा ई थी। होर इन्हा साउगी होर भी बौह्त सारी ज्नाने थी, जो तेस साउगी यरुस्लेम सैहरा मन्झ आईरी थी। स्यों भी यीसू जो दूरा ले देखी करहा ई थी।

यीसू रा दफनाया जाणा

(मत्ती 27:57-61; लूक. 23:50-56; यहू. 19:38-42)

42ये अरामा रे ध्याड़े ले एक ध्याड़े पैहले री त्यारी रा ध्याड़ा था। होर ऐबे सांझ हुई गईरी थी। 43तेथी अरिमतियाह सैहरा रा रैहणे वाल़ा युसुफ आया, जो एक महासभा रा इज्जतदार माह्णुं था होर आपु भी परमेसरा रे राजा रा इंतजार करेया करहा था; से हिम्मत करी किन्हें पिलातुस हाकमे वाले गया होर यीसू री ल्हास मांगी। 44पिलातुस हाकमे जो हरानी हुई कि, से इतने छोड़े ई मरी गया; होर तिन्हें सूबेदारा जो सादी किन्हें पूछेया कि, “क्या तेस जो मरिरे काफी देर हुई गई?” 45जेबे सुबेदारा ले तिन्हें सारा हाल जाणी लया, ता ल्हास युसुफा जो देई दिती। 46तेबे यूसुफे एक पतली चादर मुले खरीदी, होर ल्हास तुआरी किन्हें चादरा मन्झ लपेटी, होर तिन्हें तेसरी ल्हास चटाना रे बीचा मन्झ खणीरी एक डुआरा मन्झ रखी दिती, होर डुआरा रे खोले पर एक पात्थर धकेली दितेया। 47होर मगदल गांऊँआं री मरियम होर योसेसा री माऊ मरियमे ये देखी लया कि तिन्हें यीसू केथी जे रख्या।

Currently Selected:

मरकुस 15: MJLNT

Highlight

Copy