मरकुस 16

यीसू रा मरिरे मन्झ ले जिउंदा हूंणा

(मत्ती 28:1-8; लूक. 24:1-12; यहू. 20:1-10)

1तेस ई सान्झा जेबे अरामा रा ध्याड़ा बीती गया, तिन्हा मन्झ मगदल गांऊँआं री मरियम होर छोटे याकूब होर योसेसा री माऊ मरियम होर सलोमिए खुस्बूदार चीजा खरीदी लई, ताकि स्यों यीसू री ल्हासा पर मली सके। 2होर हफ्ते रे पैहले ध्याड़े भ्यागा ई, जेबे सूरज निकल्या करहा था, स्यों डुआरा पर आई। 3होर आपु मन्झ बोल्दी लगी कि, “आस्सा रे कठे डुआरा रा पात्थर केस हटाणा?”

4पर जेबे स्यों पूजी, तिन्हें देख्या कि से बडा पात्थर ता पैहले ले ई हटी गईरा! 5होर डुआरा रे अंदर जाई किन्हें, तिन्हें एक जुआना जो चीटे कपड़े पैहनीरे सीधी वखा जो बैठिरे देख्या, होर स्यों बौह्त हरान हुई गई।

6तिन्हें जुआने तिन्हा किन्हें बोल्या, हरान मत हुआ, तुस्से नासरता रा यीसू जो, जेस जो क्रूसा प्रयाल्हे चढ़ाईरा था, तेस जो तोप्हा ई; से जिउंदा हुई गईरा; से एथी नी आ; एस जगहा जो देखा, जेथी तिन्हें तेसरी ल्हास रखिरा थी। 7पर तुस्से जाऊआ, होर तेसरे चेले होर पतरसा किन्हें बोला कि, तेस तुस्सा ले पैहले गलील जिल्ले जो जाणा; जेह्ड़ा तिन्हें तुस्सा किन्हें बोलिरा था, यीसू तुस्सा जो तेथी मिलणा।

8होर स्यों ज्नानिया निकली किन्हें डुआरा वाले ले भगी गयी; डरा रे मारे स्यों काम्या करहा ई थी, होर इधी कठे तिन्हें केसी किन्हें कुछ नी बोल्या।

मगदल गांऊँआं री मरियम रे साम्हणें यीसू रा सुझ्णा

(मत्ती 28:9,10; यहू. 20:11-18)

9हफ्ते रे पैहले ध्याड़े भ्यागा ई यीसू जिउंदा हुई किन्हें सभी ले पैहले मगदल गांऊँआं री मरियम जो सुझ्या, जेस्सा मन्झा ले जे तिन्हें सात दुस्टात्मा काढी थी। 10तेस्से जाई किन्हें तेसरे साथिया जो, जो दुःखा मन्झ डूबीरे थे होर रोया करहा ऐं थे, तिन्हा जो खबर दिती। 11जेबे मरियमे आई किन्हें तिन्हा साउगी बोल्या कि यीसू जिउंदा आ, होर तेस्से से देखी लईरा, साथिए तेस्सा री एस गल्ला पर विस्वास नी कितेया।

दो चेले रे साम्हणें यीसू रा सुझ्णा

(लूक. 24:13-35)

12एता ले बाद दो चेले गांऊँआं री तरफ जाया करहा ऐं तेबे यीसू तिन्हा जो दूजे रूपा मन्झ सुझ्या। 13स्यों यरुस्लेम सैहरा मन्झ वापस आये होर लोका जो खबर दिती, पर तिन्हें तिन्हारा भी विस्वास नी कितेया।

ग्यारा चुणिरे चेले रे साम्हणें यीसू रा सुझ्णा

(मत्ती 28:16-20; लूक. 24:36-49; यहू. 20:19-23; चुणिरे चेले 1:6-8)

14जेबे ग्यारा चेले खाणा खांदे बैठीरे थे, तेबे यीसू तिन्हा जो भी सुझ्या। यीसूए स्यों प्रुआचे क्यूंकि स्यों जिद्दी थे होर इधी कठे तिन्हें तिन्हा लोका पर विस्वास नी कितेया जिन्हें लोके यीसू जो जिउंदे हूंणे ले बाद देख्या था।

15होर यीसूए चेले किन्हें बोल्या, “तुस्से सारे संसारा मन्झ जाई किन्हें सारी सृस्टी रे लोका जो खुसी री खबर प्रचार करा। 16जो कोई मेरे पर विस्वास करघा होर बपतिस्मा लैन्घा तेसरा, उद्धार हूंणां, पर जो कोई विस्वास नी करघा, तेस दोसी बणी जाणा। 17होर मेरे पर विस्वास करणे वाल़ेया मन्झ ये चिन्ह हूंणे कि तिन्हा मेरे हक ले दुस्टात्मा काढणी होर नौंईं-नौंईं भासा बोलणी। 18तिन्हा कीड़े आपणे हाथा किन्हें चकी लैणे, होर अगर स्यों (गलती किन्हें या मजबूरन) जैहर्ली चीजा भी पी जाए तेबे भी तिन्हारा कुछ नुक्सान नी हूंणां, तिन्हा ब्मार छुणे, होर ब्मारा ठीक हुई जाणा।”

यीसू रा स्वर्गा जो चकी लितेया जाणा

(लूक. 24:50-53; चुणिरे चेले 1:9-11)

19होर प्रभु यीसू तिन्हा किन्हें गल्ला करणे ले बाद स्वर्गा जो चकी लितेया गया, होर परमेसरा रे सीधी वखा जो बैठी गया। 20चेले यरूस्लेम जो छाडी किन्हें निकली किन्हें हर जगहा प्रचार कितेया, होर प्रभु तिन्हा साउगी काम करदा रैहया, होर एता साउगी-साउगी चिन्हा रे ज्रीये बचना जो पक्का करदा रैहया। आमीन।#16:20 जेसरा मतलब आ एह्ड़ा ही हो

Currently Selected:

मरकुस 16: MJLNT

Highlight

Copy