मत्ती 24

मन्दरा रे विनासा रे बारे मन्झ भविस्यवाणी

(मरकु. 13:1,2; लूक. 21:5-6)

1जेबे यीसू मन्दरा ले निकली किन्हें जाया करहा था, ता तेसरे चेले तेस जो मन्दरा री रचना दसणे रे कठे तेस वाले आये। 2यीसूए तिन्हा किन्हें बोल्या, “क्या तुस्से ये सभ नी देखदे? हांऊँ तुस्सा किन्हें सच्च बोल्हा, एता मन्झ एक पात्थर भी नी बचणा, क्यूंकि एक-एक पात्थर ढाली दितेया जाणा होर सभ कुछ नास हुई जाणा।”

यीसू रे दबारा वापस आऊणें रा चिन्ह

(मरकु. 13:3-13; लूक. 21:7-19)

3होर जेबे यीसू जैतूना रे प्हाड़ा पर बैठीरा था, ता चेले लग जे तेस वाले आई किन्हें बोल्या, “आस्सा किन्हें बोल कि ये गल्ला कधी हूणीं? होर तुस्सा रे आऊणें रा, होर संसारा रे खत्म हूंणे रा क्या चिन्ह हूंणां?” 4यीसूए तिन्हा जो जवाब दितेया, “चतन्न रैहया! कि कोई तुस्सा जो ना भरमाए। 5क्यूंकि बौह्त लोका एह्ड़ा करणा तिन्हा मेरे हका मन्झ आऊंणा, होर तिन्हा बोलणा कि, ‘हांऊँ मसीह आ,’ होर तिन्हा बौह्त लोक भरमाणे। 6होर तुस्से लड़ाई, होर लड़ाईया री गल्ला सुणघे, डरदे देख्या क्यूंकि इन्हारा हूंणां जरूरी आ, पर तेस टैम अंत नी हूंणां। 7क्यूंकि एक जातिया दूजी जाति रे बरखलाफ, होर एक राज्या दूजे राज्या रे बरखलाफ लड़ाई करणी, होर कई जगहा पर हिलण हूंणे, होर अकाल पौऊणे। 8ये सभ गल्ला पीड़ा री सुर्हूआत हूणीं। 9तेबे जेह्ड़े तुस्सा रे बरखलाप ऐ, दुःख देणे रे कठे तुस्से पकड़वाणे, होर तुस्से मारी देणे होर तुस्से मेरे पर विस्वास रख्हा ऐं इधी कठे सभी जातिया रे लोका तुस्सा किन्हें बैर करणा। 10होर तेबे कईया विस्वास करना छाडी देणा, होर एक दूजे किन्हें बैर रखणा। 11होर कई झूठे नबी आऊंणा, होर कई भरमाणे। 12होर पाप बढ़ने ले कई लोका एक दूजे किन्हें प्यार करणा छाडी देणा। 13पर जो आपणे मरणे रे टैमा तक धीरज रखघा, तेसरा ई उद्धार हूंणां। 14होर राज्या री ये खुसी री खबर सारे संसारा मन्झ प्रचार कितेया जाणा, ताकि सब जातिया रे लोका तेस जो सुणी लैन्घे, तेबे संसारा रा अंत आई जाणा।”

आखरी ध्याड़े मन्झ संकटा री सुर्हूआत

(मरकु. 13:14-23; लूक. 21:20-24)

15“पढ़ने वाले एस चेतावनी पर ध्यान दे, जेह्ड़ा दानियल नबिये एता रे बारे मन्झ बोलिरा था कि जेबे तुस्से लोक तेस्सा उजाड़णे वाली दुस्ट चीजा पवित्रजगहा मन्झ खड़ीरे देखो। 16तेबे जो यहूदिया ईलाके मन्झ हो स्यों प्हाड़ा पर भगी जाए। 17जो लोक घरा री छता पर हो, स्यों आपणे घरा मंझा ले समान लेणे रे कठे टैम बर्बाद नी करहे। 18होर जो डोहर्रिया मन्झ हो, स्यों आपणे कपड़े लेणे रे कठे वापस नी आये।”

19“तिन्हा ध्याड़े मन्झ जो गर्भवती होर दूध प्याणे वाली ज्नानिया हूणीं, तिन्हारे कठे मुंजो बौह्त दुःख हुएआ करहा क्यूंकि तिन्हारे कठे भगणा बौह्त मुस्कल हूंणां। 20होर प्रार्थना करा; कि तुस्सा जो ठंडे ध्याड़े मन्झ या अरामा रे ध्याड़े भगणा नी पई जाए। 21क्यूंकि तेस टैम एह्ड़ा दुःख हूंणा, जिहां सृस्टी री सुरूआता ले जो ना ता आज तक कधी हुआ, होर ना फेरी दबारा कधी हूंणा। 22होर अगर स्यों ध्याड़े नी घटाए जांदे, ता कोई भी प्राणी नी बचदा; पर चुणिरे लोका री वजहा ले स्यों ध्याड़े घटाये जाणे। 23तेस टैम अगर कोई तुस्सा किन्हें बोले कि, मसीह एथी आ! या मसीह तेथी आ! ता विस्वास देख्या करदे।”

24“क्यूंकि झूठे मसीह होर झूठे नबिया आऊंणा, होर तिन्हा बड़े चिन्ह होर चमत्कार दसणे, होर हुई सके ता परमेसरा रे चुणिरे लोक भी भरमाई देणे। 25देखा, मैं तुस्सा जो ये सभ गल्ला हूंणे रे पैहले ई दसी दीतिरी। 26इधी कठे अगर स्यों तुस्सा किन्हें बोले, देखा, से जंगला मन्झ आ, ता बाहर देख्या चली जांदे; देखा, से छता गास आ, ता विस्वास देख्या करदे।”

27“क्यूंकि जिहां बिजली पूर्वा ले निकली किन्हें पस्चिमा तक चमक्हा ई, होर लोक एता जो देख्हा ऐं, तिहां ईं मां माह्णुं रे मह्ठे दबारा आऊंणा, होर सभिया हांऊँ देखणा। 28जेह्ड़ा सभ जाणहां ऐं कि जेथी ईल्लणा कठ्ठा हुई तेथी ल्हासा भी हूणीं।”

माह्णुं रे मह्ठे दबारा आऊंणा

(मरकु. 13:24-27; लूक. 21:25-28)

29“तिन्हा ध्याड़े दुःखा ले बाद एकदम सूरज काला हुई जाणा, होर चानणी रा प्रयासा चली जाणा, होर आसमाना ले तारे पऊंदे लगणे होर आसमाना री सक्तिया हिल्लाई जाणी। 30तेबे माह्णुं रे मह्ठे रा चिन्ह आसमाना मन्झ सूझ्णा, होर तेबे धरती रे सभ कुला रे लोका छाती पिटणी; होर तिन्हा हांऊँ माह्णुं रे मह्ठा बड़ी सामर्थ होर महिमा साउगी आसमाना रे बादला पर आऊंदे देखणा। 31होर तेस धरती पर आपणे स्वर्गदूत बड़ी तुरही री अवाज किन्हें भेजणे, ताकि स्यों धरती रे हर जगहा ले चुणिरे लोक कठे करहे।”

अंजीरा रे डाला रा उदाहरण

(मरकु. 13:28-31; लूक. 21:29-33)

32“अंजीरा रे डाला ले ये उदाहरण सीखा, जेबे तेसरे पांगे नरम हुई जाहें होर पातर निकल्दे लग्हा ऐं, ता तुस्से जाणी लैहां ऐं कि, गर्मी रा मौसम नेडे आ। 33इंहां ईं जेबे तुस्से इन्हा गल्ला जो हुंदे देखो, ता जाणी लया कि, मेरे आऊणें रा टैम नेडे आ, बल्कि बौह्त नेडे आ। 34हांऊँ तुस्सा किन्हें सच्च बोल्हा कि, जेबे तक ये सभ गल्ला पूरी नी हुई ले, तेबे तक एस्सा पीढ़िया नी मरणा। 35आसमान होर धरती टली जाणे, पर जो मैं बोली दितेया, से पूरा हुई किन्हें रैहणा।”

त्यार रैहया

(मरकु. 13:32-37; लूक. 17:26-30,34-36)

36“तेस ध्याड़े होर तेस घड़ी रे बारे मन्झ कोई नी जाणदा, ना स्वर्गा रे स्वर्गदूत, होर ना मह्ठा, पर सिर्फ बापू। 37जिहां नूहा रे ध्याड़े थे, तिहां ईं मां माह्णुं रे मह्ठे रा आऊंणा भी हूंणा। 38क्यूंकि जिहां जल-प्रलया रे टैमा मन्झ पैहले, जेस ध्याड़े तक कि नूह जहाजा पर नी चढ़ेया, तेस ध्याड़े तक लोक खांदे पींदे रहे, होर तिन्हा मन्झ ब्याह हुन्दे रहे। 39होर जेबे तक जल-प्रलय तिन्हा सभिया जो बहाई किन्हें नी लई गया; तेबे तक तिन्हा जो कुछ भी पत्ता नी लग्या, तिहां ईं मां माह्णुं रे मह्ठे भी आऊंणा। 40तेस टैम दो लोक डोहर्रिया मन्झ हूंणे, एक लई लैणा होर दूजा छाडी दितेया जाणा। 41दो ज्नानिया चक्की पिसदी लगिरी हूणीं, एक लई जाणी होर दूजी छाडी दिती जाणी। 42इधी कठे जागदे रैहया, क्यूंकि तुस्से नी जाणदे कि तुस्सा रे प्रभु केस ध्याड़े आऊंणा। 43पर ये जाणी लऊआ कि अगर घरा रा माल्क जाणदा कि, चोरा केस टैम आऊंणा, ता से त्यार रैहन्दा, होर आपणे घरा मन्झ चोरी नी हूणे देणी थी। 44इधी कठे तुस्से मेरे दबारा वापस आऊणें रे कठे त्यार रहा, क्यूंकि जेस टैमा रे बारे मन्झ तुस्से सोच्दे भी नी, तेस ई टैम मां माह्णुं रा मह्ठे आई जाणा।”

भरोसे लायक सेऊआदार होर दुस्ट सेऊआदार

(लूक. 12:41-48)

45“भरोसे रे लायक होर समझदार सेऊआदार से आ, जेस जो माल्के आपणे घर रे नौकर-चाकरा पर मुखिया बणाया, ताकि से तिन्हा जो टैमा पर खाणा दे। 46धन्य आ, से सेऊआदार, जेस जो तेसरा माल्क आई किन्हें एह्ड़ा ई करदे पाये। 47हांऊँ तुस्सा किन्हें सच्च बोल्हा, तेस से आपणी सारी जायदादा पर मुखिया बनाणा। 48पर अगर से दुस्ट सेऊआदार सोच्दा लगे कि, आस्सा रे माल्क रे आऊणें मन्झ हली देर ई। 49होर आपणे साउगी सेऊआदारा जो मारदा पिट्दा लगे, होर दारु पीणे वाल़े लोका साउगी खाए पीए। 50ता तेस सेऊआदारा रे माल्का एह्ड़े ध्याड़े आऊंणा, जेबे से तेस जो न्हयाल्या नी लगिरा हो, होर तेस एह्ड़े टैमा मन्झ वापस आऊ जेस जो से नी जाणदा हो। 51होर तेस जो बड़ी भारी सजा देई किन्हें, से एह्ड़ी जगहा मन्झ रखणा जेथी पाखंडी रैहया ऐ। होर तेथी हमेसा रोणा होर दांत पिसणा हूंणां।”

Currently Selected:

मत्ती 24: MJLNT

Highlight

Copy