मत्ती 25

दस कुआरिया रा उदाहरण

1“फेरी यीसूए आपणे चेले किन्हें बोल्या, स्वर्गा रा राज एस उदाहरणा साहीं आं। दस कुआरिया#25:1 ये कुआरिया नौंईं लाड़िया री सेल्हिया जो तेस्सा किन्हें नंऊँऐं लाड़े रे घरा जो जाहीं थी जो आपणी-आपणी म्साल लई किन्हें नंऊँऐं लाड़े किन्हें मिलणे होर तेसरे ब्याह जो जाणे रे कठे निकली। 2तिन्हा मन्झा ले पांज नर्क्कलिया होर पांज समझदार थी। 3स्यों जे नर्क्कलिया थी आपणी-आपणी म्साल ता लई ली, पर आपणे साउगी ज्यादा तेल नी नितेया। 4पर समझदारे कुआरिये आपणी-आपणी म्साल ता लई ली पर एता साउगी तिन्हें आपणी कुप्पिया मन्झ ज्यादा तेल भी रखी लितेया। 5जेबे नंऊँऐं लाड़े रे आऊणें मन्झ देर हुई गई, ता स्यों सभ निंद्रा रे मारे सुस्त हुई गई, होर सई गई।”

6“आधी राती हाल्ला पया कि, देखा, लाड़ा आया करहा, तेस किन्हें मिलणे रे कठे चला। 7तेबे स्यों सभ कुआरिया उठी किन्हें आपणी-आपणी म्साल ठीक करदी लगी। 8होर नर्क्कली कुआरिये समझदारा किन्हें बोल्या आपणे तेला मन्झा ले कुछ आस्सा जो भी दे, क्यूंकि आस्सा री म्साल बुझी जाया करहा ई। 9पर समझदारे जवाब दितेया कि हुई सक्हा कि आस्सा रे होर तुस्सा रे कठे ये तेल पूरा नी हो; खरा ता ये आ कि, तुस्से बेचणे वाल़े वाले जाई किन्हें आपणे कठे तेल मूल्ले लई आऊआ। 10जेबे स्यों तेल मुल्ले लैणे रे कठे जाया करहा ई थी, ता लाड़ा पूजी गया, होर जो त्यार थी, स्यों तेस साउगी ब्याह रे घरा मन्झ चली गई होर दुराजा बन्द करी दितेया गया। 11एता ले बाद स्यों दूजी कुआरिया भी वापस आई किन्हें बोल्दी लगी, हे माल्का, हे माल्का, आस्सा रे कठे दुराजा खोल्ही देआ। 12पर तिन्हें जवाब दितेया कि, हांऊँ तुस्सा किन्हें सच्च बोल्हा, हांऊँ तुस्सा जो नी जाणदा। 13इधी कठे जागदे रहा, क्यूंकि तुस्से मेरे वापस आऊणें रे ध्याड़े जो नी जाणदे होर ना ही तेस टैमा जो जाणहां ऐं।”

तोड़े रा उदाहरण

(लूक. 19:11-27)

14“फेरी मां दबारा वापस आऊंणा, तेबे स्वर्गा रा राज एस उदाहरणा साहीं हूंणा। एक माल्क परदेसा जो जाणे रे टैमा आपणे नौकर सादे, होर आपणी सारी जमीन जायदाद तिन्हो दिती, ताकि स्यों लेण देण करी किन्हें तेता जो बढ़ाई सके। 15होर तिन्हें एक नौकरा जो पांज तोड़े (एक तोड़ा बी साला री मजदूरी रे बराबर) दिते, होर दूजे नौकरा जो दो तोड़े दिते, होर त्रीजे जो एक तोड़ा दितेया। हर एकी जो तेसरी योग्यता रे मताबक दितेया, होर तेबे से परदेसा जो चली गया। 16तेबे जेस जो पांज तोड़े मिलिरे थे, तिन्हें झटपट जाई किन्हें तिन्हा किन्हें लेण देण कितेया, होर पांज तोड़े होर कमाए। 17इंहां ईं जेस जो दो मिलिरे थे, तिन्हें भी दो होर कमाए। 18पर जेस जो एक मिलिरा था, तिन्हें जाई किन्हें जमीना पर खोला खणेया, होर आपणे माल्का रा धन तेथी ल्कोई दिते।”

19“बौह्त ध्याड़े ले बाद तिन्हा नौकरा रा माल्क ये पता लगाणे रे कठे स्यों सभ सादे कि तिन्हें पैसेया साउगी क्या कितेया। 20जेस जो पांज तोड़े मिलीरे थे, तिन्हें पांज तोड़े होर ल्याई किन्हें बोल्या हे माल्क, तुस्से मुन्जो पांज तोड़े दितरे थे, देख मैं एता ले पांज तोड़े होर कमाए। 21तेसरे माल्के तेस किन्हें बोल्या, ‘बौह्त बढ़िया, हे खरे होर भरोसे रे लायक नौकर, तू थोह्ड़े लेण देण संभाल्ने मन्झ भरोसे रे लायक रैहया, मां तुजो बौह्त सारी चीजा री जिम्मेदारिया देणी, आऊ मेरी खुसी मन्झ साझी बण।’

22होर जेस जो दो तोड़े मिलिरे थे, तिन्हें भी आई किन्हें बोल्या, ‘हे माल्क तुस्से मुंजो दो तोड़े दितरे थे, देखा, मैं भी दो तोड़े होर कमाए।’ 23तेसरे माल्के तेस किन्हें बोल्या, ‘हे खरे होर भरोसे रे लायक नौकर, तू थोह्ड़े लेण देण संभाल्ने मन्झ भरोसे रे लायक रैहया, मां तुजो बौह्त सारी चीजा री जिम्मेदारिया देणी, आऊ मेरी खुसी मन्झ साझी बण।’

24तेबे जेस जो एक तोड़ा मिलिरा था, तिन्हें आई किन्हें बोल्या, ‘हे माल्क, हांऊँ तुजो जाणहां था कि, तू कठोर आ। होर तू तेस माह्णुं साहीं आं जेह्ड़ा बेजा नी बान्ह्दा पर फसल काटणे री इच्छा रखा।’ 25इधी कठे हांऊँ डरी गया होर जाई किन्हें तुस्सा रा दितरा तोड़ा जमीना मन्झ ल्कोई दितेया होर ‘जो तुस्सा रा आ, से ये आ।’ 26तेसरे माल्के तेस जो जवाब दितेया कि, हे दुस्ट होर आलसी सेऊआदार, जेबे तू ये जाणहां था कि, हांऊँ जेथी बान्ह्दा नी, तेथी ले कठा करहा। होर जेथी हांऊँ बेजा नी बान्ह्दा पर फेरी भी तेथी फसल काटणे री इच्छा रखा। 27ता तुजो मेरा पैसा सौहकारा वाले जम्हा कुराणा चहिए था, ताकि हांऊँ आई किन्हें आपणा पैसा ब्याजा समेत लई लैंदा। 28तेबे तिन्हें माल्के दूजे नौकरा किन्हें बोल्या कि, से एक तोड़ा तेस ले लई लऊआ, होर जेस वाले दस तोड़े ऐं, तेस जो देई देआ। 29क्यूंकि जेस केसी वाले जे हाया, तेस जो होर दितेया जाणा; होर तेस वाले बौह्त हुई जाणां। पर जेस वाले जे नी आ, तेस ले से भी लई लैणा जो कुछ तेस वाले हाया। 30एस नकम्मे सेऊआदारा जो बाहर नह्यारे मन्झ सट्टी देआ, जेथी रोणा होर दांत किर्ड़णा हूंणां।”

यीसूआ संसारा रा न्याय करणा

31“जेबे मां माह्णुं रे मह्ठे आपणी महिमा मन्झ आऊंणा, होर सारे स्वर्गदूता मेरे साउगी आऊंणा। तेबे मां आपणी महिमा री राजगद्दी पर बैठ किन्हें लोका रा न्याय करणा। 32होर सारी जातिया रे लोका मेरे साम्हणें कठी किती जाणी; होर जिहां पुहाल भेडा जो बकरिया ले लग करहा, तिहां ईं मां स्यों एक दूजे ले लग करणे। 33होर मां भेडा जेह्ड़े धर्मी लोक ऐ, आपणी ओरली वखा होर बकरिया जेह्ड़े अधर्मी लोक ऐ, परली वखा जो खड़ी करणी। 34तेबे मां राजे आपणी ओरली वखा वाली किन्हें बोलणा, हे मेरे बापू रे धन्य लोको, आऊआ, तेस राज्या रे अधिकारी हुई जाऊआ, जो संसारा री सुर्हूआता ले तुस्सा रे कठे त्यार कितिरा। 35क्यूंकि हांऊँ भूखा था, होर तुस्से मुंजो खाणे जो दितेया; हांऊँ सोख्हा था, होर तुस्से मुंजो पाणी प्याया, हांऊँ परदेसी था, होर तुस्से हांऊँ आपणे घरा मन्झ रख्या; 36हांऊँ नांगा था, तुस्से मुंजो कपड़े पन्ह्याए; हांऊँ ब्मार था, तुस्से मेरी खैर खबर लई, हांऊँ जेल्हा मन्झ था, तुस्से मेरे किन्हें मिल्दे आये।”

37“तेबे धर्मिया तेस जो जवाब देणा कि हे प्रभु, आस्से केभे तुस्से भूखे देखे होर तुस्सा जो खाणा खुआया? या सोख्हा देख्या, होर पाणी प्याया? 38आस्से केभे तुस्से परदेसी देखे होर आपणे घरा मन्झ ठैहराये या नांगे देखे, होर कपड़े पन्ह्याए? 39आस्से केभे तुस्से ब्मार या जेल्हा मन्झ देखे होर तेरे किन्हें मिल्दे आये? 40तेबे तेस मां राजे तिन्हा जो जवाब देणा, हांऊँ तुस्सा किन्हें सच्च बोल्हा कि, तुस्से जो मेरे इन्हा छोटे ले छोटे विस्वासी भाईया मन्झा ले केसी एकी साउगी कितेया, से मेरे साउगी कितेया।” 41“तेबे तेस परली वखा वाली किन्हें बोलणा, हे स्रापित लोको, मेरे साम्हणें ले तेस अनंत आगा मन्झ चली जाऊआ, जो परमेसरे सैतान होर तेसरे दूता रे कठे त्यार किती गईरी। 42क्यूंकि हांऊँ भूखा था, होर तुस्से मुंजो खाणे जो नी दितेया, हांऊँ सोख्हा था, होर तुस्से मुंजो पाणी नी प्याया; 43हांऊँ परदेसी था, होर तुस्से हांऊँ आपणे घरा मन्झ नी रख्या; हांऊँ नांगा था, होर तुस्से मुंजो कपड़े नी पन्ह्याए; हांऊँ ब्मार होर जेल्हा मन्झ था, होर तुस्से मेरी खैर खबर नी लई।”

44“तेबे तिन्हा जवाब देणा कि, हे प्रभु, आस्से तुस्से केभे भूखे, या सोख्हे, या परदेसी, या नांगे, या ब्मार, या जेल्हा मन्झ देखे, होर तुस्सा री सेऊआ नी किती? 45तेबे मां तुस्सा जो जवाब देणा, हांऊँ तुस्सा किन्हें सच्च बोल्हा कि, तुस्से जो इन्हा छोटे ले छोटे मन्झा ले केसी एकी किन्हें नी कितेया, से मेरे किन्हें भी नी कितेया। 46होर जेह्ड़े परली वखा जो ऐ इन्हा अनंत दण्ड भोगणा पर धर्मी लोका अनंत जिन्दगी मन्झ दाखल हूंणां।”

Currently Selected:

मत्ती 25: MJLNT

Highlight

Copy