Secunnu Matteu 12
12
1Ntra ddu tempu caminava Gesù di sabatu ntra li siminati: li discipuli soi però avennu fami cuminciaru a scippari spichi, ed a manciari.
2Li Farisei vidennuli, cci dissiru: Eccu ca li toi discipuli fannu zoccu nun è licitu di fari lu sabatu.
3Ma iddu cci dissi: Nun liggistivu zoccu fici Davidi, quannu appi fami, e chiddi, ca eranu cu iddu:
4Ca trasiu ntra la casa di Diu, e si manciau li pani di l’ offerta, ca nun era licitu ad iddu di manciari, nè a chiddi, ca eranu cu iddu, ma a li suli sacerdoti?
5E nun aviti lettu ntra la liggi, ca li sacerdoti ntra lu tempiu violanu lu sabatu, e sunnu senza piccatu?
6Vi dicu addunca, ca cc’ è ccà unu maggiuri di lu tempiu.
7E si sapissivu zoccu è: Vogghiu misiricordia, e non sagrifiziu: nun avirrissivu cunnannatu mai l’ innoccenti:
8Pirchì lu Figghiu di l’ omu è patruni anchi di lu sabatu.
9Ed essennusinni jutu, arrivau ntra la sinagoga d’ iddi.
10Ed eccu un omu, chi avia la manu ciunca, e l’ interrogavanu, dicennu: Si fussi licitu di curari lu sabatu? acciocchì l’ accusassiru.
11Iddu però cci dissi: Cu’ è l’ omu ntra vuautri, ca avennu na pecura, si chista cadissi di sabatu ntra na fossa, nun la pigghiassi, e la sullivassi?
12Ora quantu è cchiù megghiu l’ omu di la pecura? Accussì è licitu di beneficari lu sabatu.
13Allura dissi a dd’ omu: Stenni la to manu. E la stisi, e fu riturnata in sanità, comu l’ autra.
14Ma li Farisei niscennu, tinianu cunsigghiu contra d’ iddu, comu l’ avianu a perdiri.
15Gesù però sapennulu, si ritirau di ddà: e multi lu siquitaru, e li guariu tutti:
16E li cumannau, chi nun lu rivelassiru.
17Acciocchì si verificassi zoccu fu dittu da lu profeta Isaia, dicennu:
18Eccu lu me garzuni, ca scigghivi, lu miu dilettu, in cui l’ anima mia si cumpiaciu assai. Mittirrò lu me spiritu supra d’ iddu, ed annunziirrà lu giudiziu a li genti.
19Iddu nun questionirrà, nè gridirrà, e nuddu sintirrà la so vuci ntra li chiazzi:
20Nun rumpirrà la canna ciaccata, e nun astutirrà lu mecciu, chi fuma, finchì avrà fattu triunfari lu giudiziu:
21E li genti avrannu spiranza ntra lu so nomu.
22Allura cci fu presentatu un spirdatu, orvu e mutu, e lu sanau di manera, ca parrava, e videva.
23E tutti li turbi si maravigghiavanu, e dicevanu: Nun è chistu lu figghiu di Davidi?
24Li Farisei però sintennulu, dissiru: Chistu nun scaccia li dimonj, ca pri menzu di Belzebù lu principi di li dimonj.
25E Gesù canuscennu li soi pinseri, cci dissi: Ogni regnu divisu contra se stissu, è desolatu: ed ogni cità, o casa divisa contra se stissa, nun pò stari mpedi.
26E si satanassu scaccia a satanassu, è divisu contra se stissu: comu dunca pò durari lu so regnu?
27E si iu cacciu li dimonj pri opera di Belzebù, li vostri figghi, cu chi lu caccianu? Perciò iddi sarannu li vostri judici.
28Ma si però iu cacciu li dimonj pri lu spiritu di Diu, puru arriva a vui lu regnu di Diu.
29O comu pò qualcunu trasiri ntra la casa d’ un omu forti, e pigghiaricci li soi mobili, si prima nun attacca l’ omu forti? Allura pò spugghiaricci la casa.
30Cui nun è cu mia, è contra di mia: e cui nun raccogghi cu mia, jetta.
31Perciò vi dicu: Ogni piccatu, e bestemia sarrà pirdunata a l’ omini, ma la bestemia contra lu Spiritu nun sarrà pirdunata.
32E a cui parrirrà contra lu Figghiu di l’ omu, sarrà pirdunatu: cui però parrirrà contra lu Spiritu santu, nun sarrà pirdunatu nè ntra stu seculu, nè ntra lu futuru.
33O faciti l’ arvulu bonu, e lu so fruttu è bonu: o faciti l’ arvulu malu, e lu so fruttu è malu: giacchì da lu fruttu si canusci l’ arvulu.
34Razza di vipari, comu putiti parrari beni, mentri siti mali? giacchì pri l’ abbunnanza di lu cori parra la vucca.
35L’ omu bonu da un tesoru bonu pigghia lu bonu: e l’ omu malu da un tesoru malu pigghia lu malu.
36E perciò vi dicu, ca d’ ogni palora mmatula, ca avrannu dittu l’ omini, nni darrannu cuntu lu jornu di lu giudiziu.
37Giacchì secunnu li toi palori sarrai giustificatu, e secunnu li toi palori sarrai cunnannatu.
38Allura cci rispusiru alcuni di li Scribi e di li Farisei, dicennu: Maistru, vulemu vidiri da tia qualchi miraculu.
39Lu quali rispunnennu cci dissi: La generazioni mala, ed adultera cerca un prodigiu: e nun cci sarrà datu autru signu, ca chiddu di Giona profeta.
40Giacchì comu Giona stetti ntra la ventri di la balena pri tri jorna, e tri notti, accussì lu Figghiu di l’ omu starrà ntra li visciri di la terra pri tri jorna, e pri tri notti.
41L’ omini di Ninivi surgirrannu lu jornu di lu giudiziu contra di chista generazioni, e la cunnannirrannu: pirchì iddi ficiru pinitenza a li predichi di Giona. Ed eccu ccà cui è cchiù di Giona.
42La riggina di lu menzu jornu surgirrà lu jornu di lu giudiziu contra sta generazioni, e la cunnannirrà: pirchì vinni da li confini di la terra pri sentiri la sapienza di Salamuni, ed eccu ccà cui è cchiù di Salamuni.
43Ora quannu lu spiritu immundu è nisciutu di l’ omu, curri pri li lochi aridi, circannu riposu, e nun lu trova.
44Allura dici: Riturnirrò ntra la me casa, d’ unni niscivi. E arrivatu la trova vacanti, scupata, e parata.
45Allura va, e si pigghia setti autri spiriti peju d’ iddu, e trasennu abitanu ddà: e l’ ultimu statu di st’ omu diventa peju di lu primu. Accussì succidirrà puru a chista generazioni pessima.
46Mentri stava parrannu a li turbi, eccu so matri, e li soi frati, chi stavanu fora, circannu di parraricci.
47Ed unu cci dissi: Eccu to matri, e li toi frati, chi stannu fora, e ti cercanu.
48Ma iddu rispunnennu a cui cci parrava, dissi: Cu’ è me matri, e cu’ sunnu li mei frati?
49E stennennu la manu versu li soi discipuli, dissi: Eccu me matri, e li mei frati.
50Giacchì cui farrà la volontà di me Patri, ca è ntra li celi: chistu è me frati, me soru, e me matri.
Currently Selected:
Secunnu Matteu 12: SCN
Highlight
Share
Copy
Want to have your highlights saved across all your devices? Sign up or sign in
First published in 1860 and 1861.
