Secunnu Matteu 13
13
1Ntra ddu jornu niscennu GesĂą di la casa, era assittatu a ripa di mari.
2E s’ affuddau attornu ad iddu multi turbi, di manerachì acchianatu ntra na varca s’ assittau, e tutta la turba stava ntra la spiaggia.
3E cci parrau di tanti cosi in parabula, dicennu: Eccu ca un siminaturi nisciu pri siminari.
4E siminannu, parti di la simenza cadiu ntra la strata, e vinniru l’ oceddi di l’ aria, e si la manciaru.
5Parti poi cadiu mmenzu li petri, unni nun cc’ era multa terra: e subitu spuntau, pirchì nun era ’n funnu di lu tirrenu.
6Ma comu spuntau lu suli la quadiau: e siccomu nun aveva radica, siccau.
7Parti poi cadiu ntra li spini: e crisceru li spini, e la suffucaru.
8E parti cadiu ntra la terra bona: e detti fruttu, unni centu pri unu, unni sissanta, ed unni trenta pri unu.
9Cu’ avi oricchi pri sentiri, senta.
10E ncugnati li soi discipuli, cci dissiru: Pirchì parri ad iddi in parabuli?
11Lu quali rispunnennu, cci dissi: Pirchì a vuautri è cuncessu di cumprenniri li misteri di lu regnu di li celi: ad iddi però nun è permissu.
12Giacchì a cui avi, cci sarrà datu, ed avrà abbunnanza: ma a cui nun avi, cci sarrà livatu anchi chiddu, chi avi.
13Perciò cci parru in parabuli: pirchì guardannu nun vidinu, ascutannu nun sentinu, nè cumprenninu.
14E si verifichirrà in iddi la profezia d’ Isaia, chi dici: Sintirriti cu li vostri oricchi, e nun capirriti: e guardirriti cu li vostri occhi, e nun vidirriti.
15Giacchì stu populu avi lu cori cupertu di grassu, ed è duru d’ oricchi, ed avi l’ occhi chiusi: acciocchì nun vidissi cu l’ occhi, nun sintissi cu l’ oricchi, nè cumprinnissi cu lu cori, e si cunvirtissi, ed iu lu sanassi.
16Ma beati sunnu li vostri occhi, ca vidinu, e li vostri oricchi, ca sentinu.
17Giacchì in virità vi dicu, ca multi profeti, e multi giusti desideraru di vidiri chiddu, chi viditi, e nun lu vittiru: e di ascutari chiddu, chi sintiti, e nun lu ntisiru.
18Vuautri però sintiti la parabula di lu siminaturi.
19Qualunqui, chi senti la palora di lu regnu, e nun la ntenni, veni lu malu, e rapisci chiddu, chi era statu siminatu ntra lu so cori: chistu è chiddu, chi riciviu la simenza ntra la strata.
20Cui poi riciviu la simenza mmenzu li petri, è chiddu, chi senti la palora, e subitu la ricivi cu gaudiu:
21Ma comu nun avi radica, ed è di poca durata, vinennu la tribulazioni e la persecuzioni pri la palora, subitu è scannaliatu.
22Cui però ricivi la simenza ntra li spini, è chiddu, chi senti la palora: ma li sullicitutini di lu seculu presenti, e l’ ingannu di li ricchizzi suffucanu la palora, e si renni infruttuusa.
23Cui però ricivi la simenza ntra la bona terra, è chiddu, chi ascuta la palora, e la cumprenni, e fa fruttu, e renni ora centu, ora sissanta, ora trenta pri unu.
24Nautra parabula cci proposi, dicennu: Lu regnu di li celi è simili ad un omu, chi siminau simenza bona ntra lu so campu.
25Ma comu s’ addurmisceru l’ omini, vinni lu so nnimicu, e cci siminau di supra la zizzania mmenzu di lu frumentu, e si nni jiu.
26Crisciutu di poi lu lavuri, e fattu lu fruttu, cumpariu puru la zizzania.
27E li servi di lu patri di famigghia avvicinatusi, cci dissiru: Signuri, nun siminasti bona simenza ntra lu to tirrenu? D’ unn’ è, ca cc’ è la zizzania?
28Ed iddu cci rispusi: Qualchi omu nnimicu lu fici. Li servi però cci dissiru: Voi, ca jamu a ricogghirla?
29Ed iddu rispusi: No: acciocchì arricugghiennu la zizzania, nun scippassivu cu idda puru lu furmentu.
30Lassatili crisciri nsemmula nsinu a la messi, e ntra lu tempu di la messi cci dirrò a li mitituri: Arricugghiti primu la zizzania, ed attaccatila a mannuzzi pri abbruciarla: lu furmentu però arricugghitilu ntra lu me granaru.
31Nautra parabula cci proposi dicennu: Lu regnu di li celi è comu un cocciu di sinapa, ca un omu pigghiau, e siminau ntra lu so tirrenu:
32La quali, benchì sia la cchiù nica di tutti li simenzi, criscennu però è cchiù granni di tutti li ligumi, ed addiventa un arvulu, di manerachì l’ oceddi di l’ aria vennu, e posanu ntra li soi rami.
33Nautra parabula cci dissi. Lu regnu di li celi è comu lu levitu, ca na fimmina pigghia e mmisca cu tri munneddi di farina, nsinacchì crisci tutta.
34Tutti sti cosi GesĂą cci dissi a li turbi in parabuli: e nun cci parrava mai senza parabuli:
35Acciocchì si verificassi zoccu era dittu da lu profeta dicennu: Aprirrò la me vucca in parabuli, manifestirrò cosi occulti da la criazioni di lu munnu.
36Allura, licenziati li turbi, si nni jiu a la casa: e si cci accustaru li soi discipuli, dicennu: Spieganni a nui la parabula di la zizzania ntra lu tirrenu.
37Lu quali rispunnennu cci dissi: Cui semina la bona simenza, è lu Figghiu di l’ omu.
38Lu tirrenu però, è lu munnu. La bona simenza, sunnu li figghi di lu regnu. La zizzania però, sunnu li figghi di lu malu.
39Lu nnimicu poi, ca la siminau, è lu dimoniu. La messi però, è la fini di lu munnu: li mitituri poi, sunnu l’ ancili.
40Comu addunca s’ arricogghi la zizzania, e s’ abbrucia ntra lu focu: accussì succidirrà a la cunsumazioni di li seculi.
41Lu Figghiu di l’ omu mannirrà li soi ancili, e livirrannu di lu so regnu tutti li scannali, e tutti chiddi, chi fannu l’ iniquità :
42E li jittirrannu ntra la furnaci di focu. DdĂ cci sarrĂ chiantu, e zurrichiu di denti.
43Allura li giusti lucirrannu comu lu suli ntra lu regnu di lu so Patri. Cu’ avi oricchi di sentiri, senta.
44Lu regnu di li celi è comu un tesoru ammucciatu ntra un tirrenu: ca comu un omu lu trova, l’ ammuccia, e tuttu allegru si nni va, e vinni tuttu chiddu, chi avi, e s’ accatta ddu tirrenu.
45E ancora lu regnu di li celi è comu un omu, chi fa nigozj, e chi cerca boni perni.
46Lu quali truvata na perna prizziusa si nni va, e si vinni tuttu chiddu, chi avi, e si l’ accatta.
47E ancora lu regnu di li celi è comu na riti jittata ntra lu mari, ca pigghia ogni sorti di pisci.
48La quali, essennu china, la tiraru, e sidennu ntra la spiaggia, scigghieru li boni ntra li bigghioli, e jittaru li tinti.
49Accussì sarrà ntra la cunsumazioni di li seculi: vinirrannu l’ ancili, e spartirrannu li mali di menzu a li boni,
50E li jittirrannu ntra la furnaci di focu: ddĂ cci sarrĂ chiantu, e zurrichiu di denti.
51Aviti ntisu tutti sti cosi? Cci rispusiru: Sì, Signuri.
52E cci dissi: Perciò ogni scriba dottu ntra lu regnu di li celi, è comu un patri di famigghia, lu quali nesci di lu so sgrignu cosi novi e cosi usati.
53E successi, ca comu finiu GesĂą sti parabuli, si nni jiu di ddĂ .
54E arrivannu ntra lu so paisi, li nsignava ntra li soi sinagoghi, di manerachì ristavanu ammirati, e dicevanu: D’ unni cci veni a chistu sta sapienza, e sta virtù?
55Nun è chistu figghiu di mastru? Nun si chiama so matri Maria, e li soi frati, Japicu, e Giuseppi, e Simuni, e Giuda:
56E li soi soru, nun sù tutti cu nui? D’ unni cci vinniru dunca a chistu tutti sti cosi?
57E ristavanu scannaliati d’ iddu. Gesù però cci dissi: Nun cc’ è profeta senza onuri, si no ntra lu so paisi, e ntra la so casa.
58E nun fici ddà multi prodigj pri causa di la incredulità d’ iddi.
Currently Selected:
Secunnu Matteu 13: SCN
Highlight
Share
Copy
Want to have your highlights saved across all your devices? Sign up or sign in
First published in 1860 and 1861.
