Luqaasi 19

Zakiyoosi Kexooch Yesuusi Gimo

1Ebiyee gubb, Yesuusi Yaarika giyiꞌi aroona beshee beehe. 2Arooch Zakiyoosi getteebeeti gabiyee guudeenaꞌochi ukkiroo beehe; biyoo gaannechone. 3Aroo dofee ashi daggoochee Yesuusin aabi gaata beegga qaawiye; tunebaani bi neexo qaminnitoyich, xiishoon hakkaanoone. 4Ebich Yesuusi hammemmo caaree michi baateexi gommona bi tunetoyich, biin beegoyich ashoyee aaf shiichiꞌi woccii hammii are caaree michi toommooch kechiye.

5Bi kechitoyee gubb Yesuusi are caaree michi gaꞌooch shaggiichii kaama ciinniꞌi, “Zakiyooso, kaateree kindibe. Hanaach ne kexooch taan heechiyemmi mooyo beetone” iye. 6Ebich Zakiyoosi kaatee kindiꞌi emiriibee Yesuusin bi kexooch daammiꞌi iibbiihe.

7Arooba are asheenaꞌo bulli beeggiꞌi, “Axaaxecho kexooch iibbiitaa giyitone” iꞌi guruuxiyeete.

8Tunebaani Zakiyoosi bulli aafooch neexeꞌi Doono Yesuusin “Ta Doonocho, taach beeto bulliichee qaton girechoyich wojjemmo taane; koninolla kootoon taggaꞌa ta deqqeto beegaata, awudde kishoon tuniiree wochemmo taane” iye.

9Yesuusiyoo biich ishichiye: “Hini uro Abrahamichi bushoo bi tunetoyich, hanaach hini kexooch wodoo tunetone. 10Ashi Bushoo bi waato, aalleton qaawoonaa wodiyoonoyichiye” iye.

Aashire Wochee Bushiisheenaꞌochi Shaahiyoo

(Maatiyoosi 25:14-30)

11Ebichi hillooch are dofee asheenaꞌo Yesuusichi yibbaatoon waayeebee, gommon biinna tookkii hammii beeheete; Yesuusi Yerusaalem bi katinnitoyich, wotta “Yeeri bi taatittinoon and kaate neechiree bekkiyemmone” iꞌi boonoshi gabitoyich, ebi shaahiyoon daakkiꞌi boonoshich gettiye. 12Ishichiinoo iye: “Taatee yaroo tuneti ikke uro bi showee toommooch taatittinoon deꞌiree wotteya iꞌi wohi showooch hamma tiyiye. 13Bi wochee bushiisheenaꞌoochee aashireenaꞌon ceeggii balli balle xure birewoon boonoshich immiꞌi, ‘Wottaa ta waammi wottoon ebina giixeree shiijji beebote’ iye.

14“Tunebaani are showee asheenaꞌo biin boonoshi shixxitoyich, ‘Hini uro no toommooch bi taatoon shunnaachone’ iꞌi bi hillooch biin taatiyemmo waan wochoon daachiiheete.

15“Tunetaa taatoo biin taatiitaa, aroochee taatittinoon deqqiꞌi wottee waahe. Ebichi hillooch balli balle xure birewoon bi immiti bi wochee bushiisheenaꞌo giixeꞌi ambichoon boonoshi shiijjito gaata ariiya iꞌi ceekkiihe.

16“Shiichiꞌi shaggito ‘Ta doonocho, ne balle xure birewoo humoon shiyitone’ iye.

17“Doono tiyiꞌi, ‘Gaawiye; hini deꞌe ta wochee bushoocho! Giishechoona ne gibeneetoyich, aashire katemeenaꞌo toommooch neen ukkiriito taane’ iye.

18“Guttinnee wochee bushoo wotta waaꞌi, ‘Ta doonocho, ne balle xure birewoo uuche balloon shiyitone’ iye.

19“Hini wochee bushoonoo ‘Neenoo wotta ebiyoommon uuche katemeenaꞌo toommooch ukkiriito taane’ iye.

20-21“Aree hillooch bare wochee bushoo wotta waaꞌi, ‘Ta doonocho, maacmanje asho neene; ne shoohaanoochee qeccaabeeto, ne bushaanoochee shafiraabeeto ne tunetoyich, shattaꞌa qoreddee buroona kaappaꞌa ta quyeti balle xure birewoo hiniyoche’ iye.

22“Arooba doono tiyiꞌi, ‘Hini gonde wochee bushoocho! Ta shoohaanoochee qeccaabeeti, ta bushaanoochee shafiraabeeti, maacmanje asho ta tunoon ariitine? Ishigaata, ne getteti ne noonoo ne toommooch nallitone. 23Ta gijjoon giixemminaꞌoyich amoyich imaachine? Tawoo waaree ta gijjoon shimona tookkiree deqqesho ta toone?’ iye.

24“Arooba arooch neexee beetinaꞌon ‘Andoo hini balle xure birewoon bi kishoochee tiijjiree humechoyich imbote’ iye.

25“Boonoshiyoo worganeꞌi, ‘Doonocho, biich humo beetoche!’ iyeete.

26“Tunebaani doono boonoshich ishichiꞌi wochiye, ‘Ittoshich gettoye: Beetoyich daakkaa ichemmone. Tunetaa amolla aallo waanee biich beeti giishechewolla tiijjeyemmine. 27Wotta boonoshi toommooch ta taatemmoyich shunaani ta shixechinaꞌon yeshiree taach hach deebote. Ta aafoochaanoo boonoshin guuribote’ iye” iꞌi gettiye.

Yesuusi Oogoona Yerusaalem Gimo

(Maatiyoosi 21:1-11; Maariqoosi 11:1-11; Yowannisi 12:12-19)

28Yesuusi ebin bi gettiti hillooch tiyii, Yerusaalem hammiibee biinna tookkii hammiibeeti asheenaꞌoyee aaf aaf shiichiꞌi hammiye. 29Zayitee Michi guudooch beeti Beetifaaginaa Bitaaniyinooch katinniichii, bi dabbeenaꞌoochee gutteenaꞌon ishichiꞌi wochehe: 30“Ittoshiyee aaf beeti gafooch hambote; hami shagiree, koniyoona yebbeyaani kuree bushoo tippeeꞌi beeton danemmo ittoshine; aroon biishiree deebote. 31Asho koniyoona tiyiꞌi ittoshin ‘Amoyichiye ittoshi biichii beeto?’ iꞌi bi echagaata, ‘Doonoyich bi qaaweetoyichiye’ getote” iye.

32Wocheetinaꞌo hammiꞌi Yesuusi gettitoommon daneheete. 33Boonoshiyoo kuree bushoon biichii boonoshi beetaa, kuree dooninaꞌo “Kuree bushoon amoyichiye ittoshi biichii beeto?” iꞌi echeheete.

34Boonoshiyoo wochiꞌi, “No Doonoyich bi qaaweetoyichiye” iyeete.

35Boonoshiyoo kuree bushoon yaabiꞌi Yesuus waan deebiyeete. Aroochee are kuree bushoo toommooch boonoshi tahoon yaggiꞌi Yesuusin yebbiiheete. 36Yesuusi hammii bi beetaa, asheenaꞌo bi hammiibeeti gommooch boonoshi tahoon yaggiyeete.

37Yesuusinaa dofee asheenaꞌona Yerusaalem katinniꞌi Zayitee Michi guudi dugilloon boonoshi wottemmona, biin dabbii beetinaꞌo bulli emiriꞌi boonoshi beeggiti gaakkechi shuunoo bullich boonoshi qaaroon oogichiꞌi ishichiibee Yeerin galleteheete:

38“Doono Yeerichi shigoona waabeeti taatoo diireebe!#Shod. 118:26

Shimaayooch diggoo,

shimaajji shimaayooch beeti Yeerich oogee yiiroo, tunebe!” ii beeheete.

39Arooba dofee ashi daggooch beeti Fariseenaꞌo daggoochee ikkikkeenaꞌo tiyiꞌi, “Dojjechocho, neen dabbii beetinaꞌon qayote gete” iyeete.

40Yesuusi wochiꞌi “Ittoshich gettoye: Hinoshi cikkii qayigaata, xaqqeenaꞌolla cookemminaꞌone” iye.

Yerusaalemich Yesuusi Eefo

41Yesuusi Yerusaalem shagg beddiꞌi katemoon ciinniichii eeppiibee ishichiye: 42“Diggoo daneebeeti gommon hanaachi ittoshi shalligito gaata, gaawetone; tunebaani bi aricheyaachemmoyich ittoshich aacheetone. 43Gonde moochechi aabo ittoshi toommooch woyemmone; ittoshi etteenaꞌo ittoshin kocha getiree ittoshi katemee guudoon iicheti showee gutoona uxereechi ittoshin kaappemminaꞌone; ittoshi guudoona guudiree bulli gommon hiccemminaꞌone. 44Hini katemeexi asho ittoshinoo, ittoshi bushiishoonoo showoo maanjjemminaꞌone; xaqqo xaqqee toommooch keddeeree bi echemmoyich tuniyachemminaꞌone. Ebiyoo, Yeeri ittoshin wodiiya bi waati aaboon shalligoo ittoshi qajjitoyichiye” iye.

Giixechinaꞌon Yaafee Kexoochee Yesuusi Kichoo

45Aroyee gubb Yesuusi Yeerichi yaafee kexooch giyiye. Giyiꞌi arooch gabiyoo geddiꞌi kemmiibeeti giixechinaꞌo bullin gashee kichiye. 46“Yeeri ‘Ta kexo corootee kexo tunemmone’#Isi. 56:7 iꞌi bi gettito Yaafe Macaafooch kooreetone; tunebaani ittoshi bokkeenaꞌochi gofoon#Erim. 7:11 tuniito ittoshine” iye.

47Ebiyee gubb, qemi qemona asheenaꞌoyich yaafee kexoochaa dojjii beehe; tunebaani qeeshee ukkireenaꞌo, Muusichi Sheeree dojjechinaꞌonaa Ayihudee ukkireenaꞌona Yesuusin wuxiya qaawii beeheete. 48Tunetaa dofee asho bulli ottiꞌi bi gettiibeeti mooyon boonoshi ellee beetoyich, boonoshi hallemmi mooyon mucceheete.

Currently Selected:

Luqaasi 19: KBRC

Highlight

Copy