Luqaasi 18

Ikke Xuume Ureenaa Ikke Nallechonochi Shaahiyoo

1Ebiyee gubb, taahaanoon bulli aaboon corooteechon Yesuusi ishichiꞌi bi dabbeenaꞌoyich hini shaahiyoona gettiye: 2“Ikke katemooch Yeerin shataani, asho konichona yeelleyaani ikke nallechi uro beehe. 3Wotta are katemooch ikke xuume ure beehan; are nallechi uro waan bulli aaboon hammaꞌa, ‘Taannaa ta taggechonochi daggeexi mooyon beegiree taach nallibe’ ii beehan.

4“Tunetaa hini are nallechi uro meeti aaboon deꞌa gettemmon qajjiye. Tunebaani ciiroochaa bi mulloona ‘Yeerin shatonaa ashich yeelloonon ta qajjetaanona, 5hini xuumee taan bi iritii beetoyich, biich nallehe; nallaa ta kuxo qayigaata, bulli aaboon wochi wochi waabee taan shuuꞌiiree maraatiyemmine’ iye” iꞌi gettiye.

6Daakkiꞌi Doono Yesuusi ishichiye: “Are nallecho tuneti xumme uro gettiton waayebote. 7Illa Yeeri areddoonaa xumoonon biin qolleebee cookiibeeti bi kaacciti bi aagetoyich nallaachehe? Boonoshin gaacheyaanoon yagehe? 8Ittoshich gettoye: Boonoshich kaateree nallemmone. Tunebaani Ashi Bushoo waahooba, showee toommoochee boonoshi mulloon bi toommooch tooꞌiiꞌi biin quyee beetinaꞌon danehe?” iye.

Ikke Farisoonaa Ikke Gabiyee Guudoonochi Shaahiyoo

9Wotta daakkiꞌi Yesuusi “Cadiqo noone” iꞌi boonoshi qelloon gibeneechii bareenaꞌon hoxee beetinaꞌoyich ishichiꞌi hini shaahiyoon gettiye: 10“Gutte asheenaꞌo corootiya yaafee kexooch hammiyeete; boonoshiyoo ikkoo Farisoo, ikkoo gabiyee guudoone. 11Hini are Farisoo yaafee kexooch neexeechii ishichiꞌi bi mulloona corootiye: ‘Yeero, bare asho bullichoommon, boggecho, xumme moochechonaa shunimaayoona woyee hini gabiyee guudoommonolla tuno ta qajjetoyich, neen galletehoye. 12Shabaattee daggooch gutte wottoon coomaabeeto taane; ta danaabeeto bulliichee asraatoon neech kichaabeeto taane’ iꞌi corootiye.

13“Wotta hini are gabiyee guudo yaafee kexooch neexee beetinaꞌoyee wohooch neexeechii bi aafoon kaama tiijjiꞌi shimaajj ciinonolla shunaanoone; tunebaani bi getoon qicciibee, ‘Yeero, axaaxechi taan maaribe’ iibee Yeerin qollehe.

14“Ittoshich gettoye: Farisoyee hini gabiyee guudo Yeeri aafoochaa cadiqo tuneꞌi bi kexooch wottehe. Bi qelloon oogiibeeto bulli giishemmone; bi qelloon giishiibeeto bulli oogemmone” iye.

Gishiishi Bushiisheenaꞌon Yesuusi Diiroo

(Maatiyoosi 19:13-15; Maariqoosi 10:13-16)

15Arooba ikkikke asheenaꞌo “Yesuusi bi kishoon boonoshi toommooch kotiibe” iꞌi gaggere bushiisheenaꞌon bi waan deebiyeete. Bi dabbeenaꞌo ebin beeggiꞌi bushiisheenaꞌon deebiti asheenaꞌon noggeheete. 16Tunebaani Yesuusi bushiisheenaꞌon bi waan ceeggiꞌi, bi dabbeenaꞌon “Qayote! Yeerichi taatittine eboshiyoomminaꞌochine; ebich gishiishi bushiisheenaꞌo ta waan wobeete; bajjaahote. 17Iberoon ittoshich gettoye: Yeerichi taatittinoon giisheche bushoochoommon deꞌaano arooch cir giyaachemmone” iye.

Gaannechon Iritiibeeti Mooyo

(Maatiyoosi 19:16-30; Maariqoosi 10:17-31)

18Ebiyee gubb, Ayihudee ukkireenaꞌo daggoochee ikkoo tiyiꞌi Yesuusin “Deꞌe Dojjechocho, bulli yemeenee kashoon ta danemmoyich amoon hallibote?” iꞌi echehe.

19Yesuusi wochiꞌi, “Amoyich taan deꞌo ii beetine? Ikke Yeeriyee damba deꞌo koniyoona aalloone. 20Muusichi Sheeroon ariibeeto neene; aroo ‘Shunoon maayaahine; ashoon wuxiyaahine; gaajjaahine; asho koni toommoochona kootoon miixeyaahine; ne nihoonaa ne indeenon oogiibe’ ii beetone”#Key. 20:12-16; Yibba. 5:16-20 iye.

21Uroo wochiꞌi, “Ta bushittinoochee tiijjaꞌa ebiich ta beddemmi wottoon ebi bullin ceechito taane” iye.

22Yesuusi ebin waayeꞌi, “Batt ikke mooyo neech shappitone: Hamiree neech beeto bullin kemiree iriteetinaꞌoyich imbe. Neech shimaajji kexooch kiceeree beeyemmone. Aroyee gubb waaree taan dabbibe” iye.

23Tunebaani hini are uro oogeti gaannecho bi tunetoyich, ebin waayeꞌi oogichii ayiniye. 24Yesuusiyoo oogichii bi ayinoon beeggiꞌi, “Gaannechinaꞌoyich Yeerichi taatittineech gimo am shaahe maggoone! 25Gaaleyich nappee aahoona besho maggoone; tunebaani gaannechi uroyich Yeerichi taatittineech gimo ebiyee beshoon maggoone” iye.

26Ishin waayetinaꞌoo “Ishigaata, wodoon hakkemmo konine?” iyeete.

27Yesuusi wochiꞌi, “Ashich mawiton Yeeri tuniyoyich hakkechone” iye.

28Arooba Pheexiroosi tiyiꞌi, “Ebiyoche, bullin qajjaꞌa neen dabbito noone” iye.

29Yesuusiyoo boonoshich wochiꞌi ishichiye, “Iberoon ittoshich gettoye: Yeerichi taatittineyicha iꞌi bi kexon woyee bi mecheen woyee bi maneenaꞌon woyee bi nihoonaa bi indeenon woyee bi bushiishoon qajjito koniyoona, beshoon danemmone; 30hini yemeenooch beshaa beshoon daakkaa danemmone; wotta woyemmi yemeenoochoo bulli yemeenee kashoon danemmone” iye.

Bi Qitemmon Keejjinnoon Yesuusi Geto

(Maatiyoosi 20:17-19; Maariqoosi 10:32-34)

31Yesuusi aaraa gutte bi dabbeenaꞌon bi waan kiciꞌi ishichiye: “Ebiyoche, and Yerusaalem hammaabeeto noone; aroochaa keemechinaꞌo kooriti Ashi Bushoo mooyo bulli ceennemmone. 32Aageteenaꞌoyich beshiiree immemminaꞌone; boonoshiyoo coonemminaꞌone; naaggemminaꞌone; bi toommooch cuddemminaꞌone; 33arengoona xoobbemminaꞌone; aroyee gubb wuxemminaꞌone; tunebaani keejje qemooba qitoochee tiyemmone” iye.

34Arooba ebi bi gettiti mooyoochee amolla boonoshi mullooch giyaanoone; bi gettiti moochi aafo boonoshich bi aacheetoyich, ebi ama geto gaata ariyaaneenaꞌone.

Qolleebeeti Aaf Doogoon Yesuusi Wodiyoo

(Maatiyoosi 20:29-34; Maariqoosi 10:46-52)

35Yesuusi Yaariki katemooch katinniye; areegaata ikke aaf doogo gijjoon qolleebee gommi gashooch kotee beehe. 36Are uroo dofee asheenaꞌochi beshoon waayeꞌi, “Ishi amoone?” iꞌi echehe. 37Asheenaꞌoo “Naazireetechi Yesuusine beshee hammiibeeto” iꞌi biich gettiyeete.

38Aaf doogoo “Daawiti Bushoo Yesuuso, taach ariqqebe!” iꞌi cookiye.

39Arooba aaf shiichiꞌi hammii beetinaꞌo are aaf doogoon cikkibe iꞌi noggeheete. Tunebaani aaf doogo “Daawiti Bushoochoo, taach ariqqebe!” iibee beshoon cookiye.

40Areegaata Yesuusi neexeechii asheenaꞌon “Ebi uroon taach deebote” iꞌi gettiye. Yesuus waan bi waammona, 41Yesuusi are uroon “Amoon neech ta tuniyemmoyichiye ne qaawaabeeto?” iꞌi echehe.

Aaf doogoo wochiꞌi, “Ta Doonocho, ta aafoon ne ciichiyemmoyichiye” iye.

42Yesuusiyoo “Ne aafo ciine! Ta toommooch mulloon ne tooꞌiyoo neen wodiitone” iye. 43Hini are aaf doogo bekkech ciinniye; aroochee Yeerin galleteebee Yesuusin dabbiye. Asheenaꞌo bulliyoo ebin beeggiꞌi Yeerin galleteheete.

Currently Selected:

Luqaasi 18: KBRC

Highlight

Copy