Luqaasi 20

Yesuusi Echeyoo

(Maatiyoosi 21:23-27; Maariqoosi 11:27-33)

1Ikke areddoon Yesuusi yaafee kexooch giyiꞌi dofee asheenaꞌoyich dojjiibee Yeerichi mishiraachee qaaroon gettii bi beetaa, qeeshee ukkireenaꞌonaa Muusichi Sheeree dojjechinaꞌona showee geeneenaꞌona tookkii bi waan giddeꞌi, 2“Hini mooyinaꞌon ne tuniibeeto, amoochee ukkirittinoon danaꞌaaniye? Woyee konine neen wocheto? Eke nooch gete” iꞌi echeheete.

3Yesuusi wochiꞌi “Ta wotta ikke mooyon ittoshin echabona; ittoshiyoo taach getote. 4Yowannisin ‘Aacona afaallibe’ iꞌi wocheto konine? Yeerinee, ashoone?” iye.

5Arooba boonoshinaa boonoshina “ ‘Yeerine’ no getigaata, ‘Ishigaata, bi gettiton amoyich iberiyaachote?’ getiree noon echemmone. 6Wotta ashoone no getigaata, asheenaꞌo bulli Yowannisin keemechone iꞌi boonoshi iberii beetoyich, xaqqoona noon yexiree wuxemminaꞌone” iyeete.

7Ebich wochiꞌi Yesuusich, “Koni wocheto gaata no ariyaano noone” iyeete.

8Yesuusiyoo wochiꞌi, “Illa tawoo wotta amoochee ukkirittinoon danaꞌa hini mooyinaꞌon ta tuniyaabeeto gaata ittoshich getaache” iye.

Woyinee Quyechinaꞌochi Shaahiyoo

(Maatiyoosi 21:33-46; Maariqoosi 12:1-12)

9Yesuusi hini shaahiyoon dofee asheenaꞌoyich ishichiꞌi getooch giyiye: “Ikke uro woyinoon bi budooch bechiye; aree hillooch goyi shiimeree quyemminaꞌoyich quyiichii bare showooch hammiꞌi yagiye. 10Ebiyee gubb, woyinee aafee gooroo shagaa, hini are uro ‘Woyinee aafoon maci qoodeeree ta qoodoon deebe’ iꞌi ikke bi guunon hini are quyechinaꞌo waan wochehe. Quyechinaꞌoo are bi wocheti guunon yechii xoobbiꞌi shokke kishoon wochii daachiiheete. 11Bare guunon daakkiꞌi bi wochetaa, boonoshiyoo wotta aroon xoobbii cooneꞌi shokke kishoon wochii daachiiheete. 12Daakkiꞌi keejjinnoon bi wochetaa, aroon wotta yexxii mayiiꞌi goyee maach kichii duppiyeete.

13“Ciiroochaa woyinee goyee doono ‘Aabichibote? Eke ta shunnaabeeti ta bushoon daachiyehe; diqqich biin beegiree yeellemminaꞌone’ iye.

14“Tunetaa hini are quyechinaꞌo bushoon bi waataa beeggiꞌi boonoshinaa boonoshina ‘Bi woraasho hinine; hini bi iristo noocho bi tunemmoyich ittoshi waataa, wuxibone’ iꞌi echeeheete. 15Ebina bushoon yechii woyinee goyee maach kichiꞌi wuxiyeete.

“Illa woyinee goyee doono boonoshin aabichishiye bi gettemmo? 16Bi hajjee baatoona quyechinaꞌo waan hamiree boonoshin aalliyemmone; woyinee goyoonoo bare goyi shiimemmi quyechinaꞌoyich immemmone” iye. Asheenaꞌo ebin bi getaa waayeꞌi, “Ebin Yeeri noyee wokkiibe!” iyeete.

17Tunebaani Yesuusi boonoshi waan ciinniꞌi, “Ishigaata, Yaafe Macaafooch

‘Gimbenyeenaꞌo hoxee duppiti xaqqo,

aroo kexon deggii neechiibeeti giimbee guummon tunetone’#Shod. 118:22

getaa kooreeto ama getone? 18Are xaqqee toommooch dihimmo bulli buricemmone; tunetaa are xaqqo bi toommooch dihimmo bulli yiikkeyemmone” iye.

19Qeeshee ukkireenaꞌonaa Muusichi Sheeree dojjechinaꞌona “Ebi shaahiyoona noonalli bi gettiibeeto” iꞌi, areegaata Yesuusin yecha qaawiyeete; tunetaa dofee asheenaꞌon shattiꞌi qajjiyeete.

Qesaarich Qaraxee Qoco

(Maatiyoosi 22:15-22; Maariqoosi 12:13-17)

20Hini are qeeshee ukkireenaꞌonaa Muusichi Sheeree dojjechinaꞌona Yesuusi toommooch nallemmi Yihudee iraashoo kishooch beshiiꞌi imoyicha iꞌi holloon quyeebee, iberoon shaahiibee, bi noonoochee hollimmi gonde mooyon macemminaꞌon bi waan daachiiheete. 21Boonoshiyoo hammiꞌi, “Dojjechocho, tatoon ne yibbaatoonaa iberoon ne dojjoonon ariihone; iberoon Yeerichi gommon dojjihinalli, konichona beshii shappiiꞌa dabiyaachine. 22Illa Qesaarich qaraxee qocon Muusichi Sheeroo daaggiibeetee, daaggaache?” iꞌi echeheete.

23Tunebaani marechinaꞌo boonoshi tunoon Yesuusi ariiꞌi, 24“Eke taach ikke diinaaroon bekkiibote” iye. Boonoshi bekkiitaa, “Hini gijjee toommooch beeti malletoonaa kooreeti shigoona konichone?” iꞌi echehe.

Boonoshiyoo “Qesaarichone” iyeete.

25Yesuusiyoo “Ishigaata, Qesaarichon Qesaarich, Yeerichon Yeerich imbote” iye.

26Ebich dofee ashi aafooch bi noonoochee kechiti gonde mooyo aalletoyich, boonoshi danemmi mooyon mucceꞌi bi wochiti wochoyich worganeebee cikkii qajjiyeete.

Qitoyee Gubb Shaago Woyee Shaakkeyoo Aallo Bi Tuno

(Maatiyoosi 22:23-33; Maariqoosi 12:18-27)

27Ebichi hillooch “Qititinaꞌo tiyaachemminaꞌone” ii beeti Saduuqeenaꞌo daggoochee ikkikkeenaꞌo Yesuus waan waaꞌi ishichii echeheete: 28“Dojjechocho, Muusi ‘Ikke uro mecheen shaaggiꞌi bushoon shiyaanoon bi qitigaata, bi manoo are ureen shaagiree qititi bi manoyich bushoon keribe’ iꞌi Sheeree Macaafooch nooch kooriye.#Yibba. 25:5-6 29Illa shabaatte maneenaꞌo beeheete; boonoshi daggoochee qaabboo mecheen shaaggiꞌi bushoon shiyaanoon qitiye. 30Ebina bi hilloo are ureen woraashiye; 31keejjinnoo woraashiye; shabaattinnee ciireexooch beddaahaa bulli are ureen woraashiꞌi bushoon shiyaanoon qitii ciireheete. 32Ciiroochaa ure wotta qitiyane. 33Illa hini shabaatteenaꞌo bulli are ureen shaaggitinaꞌone. Ebich qititinaꞌo tiyiyooba mechee bi tunemmo aabichiye?” iꞌi echeheete.

34Yesuusi wochiꞌi ishichiye: “Hini yemeenooch beeti asheenaꞌo shaaggiyeete; shaakkeeheete. 35Tunebaani are yemeenoonaa qitoochee timonon danoyich bedditinaꞌo shaagaacheete; shaakkeyaacheete. 36Ebiyoo maraakoomminaꞌo boonoshi tunetoyichiye; illa qitoochee tiyiꞌi Yeerichi bushiisheenaꞌo boonoshi tunetoyich, gubbich qitoonolla qitaacheete. 37Wotta qititinaꞌochi timon Muusiyolla ittoshich arichiitone; ebinoo bi arichiito, tushee qaaqqee gaꞌooch neexee bi beetaa tuneti mooyon bi kooriyooba, Doonon ‘Abrahamichi Nuggishoo, Yisaaqichi Nuggishoo, Yaaqobichi Nuggishoo’#Key. 3:6 iꞌi bi getonane. 38Illa asho bulli kashoona beeto tuneba qititoo tuneba Yeerich beeti kashechinaꞌone; ebich kashechinaꞌochi Nuggishoani qititinaꞌochi Nuggishoo toonoone” iye.

39Arooba Muusichi Sheeree dojjechinaꞌo daggoochee ikkikkeenaꞌo wochiꞌi, “Dojjechocho, gaawichii gettetine” iyeete. 40Ebiyee gubb, Yesuusin echoyich aafoon kuppheto koniyoona aalloone.

Kiristoosichon Yesuusi Echo

(Maatiyoosi 22:41-46; Maariqoosi 12:35-37)

41Ebichi hillooch Yesuusi boonoshich ishichiye: “ ‘Kiristoosi Daawitichi bushoone’ iꞌi aabichii gettiyeete? 42-43Daawiti bi qelloona Shoddee Macaafoochaa:

‘Doono Yeeriyoo ta Doonon,

“Ne etteenaꞌon ne baatee dechiich ta tuniimmi wottoon

ta qannooch kotebe” itone’#Shod. 110:1

iye. 44Illa Daawiti biin ‘Doono’ itone; ishigaata, aabichiree Daawitichi bushoo tunehe?” iꞌi echehe.

Muusichi Sheeree Dojjechinaꞌochon Yesuusi Geto

(Maatiyoosi 23:1-36; Maariqoosi 12:38-40)

45Arooba asheenaꞌo bulli waayee boonoshi beetaa, Yesuusi bi dabbeenaꞌon 46“Genje tahoon taheꞌi guudon qaawiibeeti Muusichi Sheeree dojjechinaꞌoyee ittoshi qelloon quyebote! Gabiyee godoochaa ‘Showooch qebona’ ii beeti diggiyoon, Ayihudeenaꞌo kiceebeeti kexoochaa genje gabberoon, gifiree kexoochaanoo oogee xaaꞌoon qaawii beetinaꞌone. 47Boonoshiyoo wotta xuume maacheenaꞌo kexon tiichiibee, cadiqo shaahi bekkeya iꞌi corootoon geechii genjii beetinaꞌone. Eboshi toommooch Yeeri beshe shattii giiriiti nalloon kindiyemmone” iye.

Currently Selected:

Luqaasi 20: KBRC

Highlight

Copy