Luqaasi 21

Ikke Girechi Xuumee Immeti Gijjoo

(Maariqoosi 12:41-44)

1Yesuusi yaafee kexooch gijjoo kiceebeeti qiicee daggooch gijjoon duppiibeeti gaannechinaꞌon xiishiꞌi ciinnii beehe. 2Wotta ikke girechi xuume ure waaꞌa gutte duuden bi dufon beeggiꞌi, 3-4“Iberoon ittoshich gettoye: Eboshi bulli boonoshich beddii echeti gijjoocheeniye deebii boonoshi duppito; tunebaani hini girechi bi tunetaanoona maaree bi qeyemmon echiyaanoon biich beeti bullinoo deebaa duppetine. Ebich asheenaꞌo bulliyee beshoon duppeti hini girechi xuumeene” iye.

Yaafee Kechi Happeyoon Yesuusi Geto

(Maatiyoosi 24:1-2; Maariqoosi 13:1-2)

5Ikkikke asheenaꞌo yaafee kechi mooyon tiijjiꞌi, “Yeerich giddeti wojjoonaa aaxxe xaqqeenaꞌona hakketi hini yaafee kechi malleto am shaahoon gaawehe” iꞌi yibbaatee boonoshi beetaa, 6Yesuusi “Hini ittoshi beeggiibeeti mooyo bulli happeyaanoon xaqqo xaqqee toommooch keddeeree ebina bi beetaachemmi yemeeno woyemmone” iye.

Yemeenee Ciiree Malletoo

(Maatiyoosi 24:3-14; Maariqoosi 13:3-13)

7Arooba Yesuusin bi dabbeenaꞌo “Dojjechocho, illa hini mooyo bi tunemmo aatane? Hini mooyo ceenn bedon bekkiyemmi malletoo amoone?” iꞌi echeheete.

8Yesuusi wochiꞌi boonoshich ishichiye: “Koniyoona ittoshin bi muriciyaachemmoyich ittoshi qelloon quyebote. Meetinaꞌo ‘Ta aroo taane’ wotta ‘Kiristoosi woyemmi yemeeno shaggitone’ getibee ta shigoona woyemminaꞌone; ebiyooba ishichimminaꞌon dabbiyaahote. 9Ginee woroonaa hukkee woroonon ittoshi waayehooba keqqiyaahote. Ebi bulli shiichii tuno echeyaachemmone; tunebaani yemeenee ciiro bekkech tuneyaachemmone” iye.

10Wotta Yesuusi daakkiꞌi ishichiye: “Ikke aagetoo bare aagetoona, ikke showee taatoo bare showee taatoona koyemmone. 11Baribare xaaꞌoochoo oogeti showee qewo tunemmone; kaatee wuxiibeeti biiyoonaa shaacoona giyemmone; keqqichemmi mooyinaꞌonaa shimaayoochaa ogooge malleteenaꞌona bekkemminaꞌone.

12“Tunebaani ebi bulliyee shiichiree, ta naboyich ittoshin yechemminaꞌone; duuꞌiyemminaꞌone; Ayihudeenaꞌo kiceebeeti kechi nallechinaꞌoyich ittoshin beshiiree immemminaꞌone; boonoshiyoo ittoshin cuchiyemminaꞌone; taateenaꞌonaa iraasheenaꞌonochi aafoochoo ittoshin neechemminaꞌone. 13Ebiyoo ta mishiraachee qaaroon ittoshi miixemmoyich gommon qechemmone. 14-15Arooba ittoshi taggechinaꞌo bulli ittoshin bayonaa ittoshi yibbaatoon nookkoonon boonoshi hakkaachemmi ariyoonaa noonoonon ittoshich immemmo taane. Ebich ‘No taggemmi taggoon shiichi gabaayone’ getiree kuxote. 16Ittoshi nihoonaa indeena, maneenaꞌo, xibeenaꞌo ittoshi shunechinaꞌolla ittoshi toommooch nallemminaꞌoyich beshiiree ittoshin immemminaꞌone; boonoshiyoo ittoshi daggoochee ikkikkeenaꞌon wuxiyemminaꞌone. 17Asheenaꞌo bulli ta naboyich ittoshin shixxemminaꞌone. 18Tunebaani ittoshi qelli eexoochee ikkeyona aalleyaachemmine. 19Kuppheꞌi ittoshi neexegaata, bulli yemeenee kashoon danemmo ittoshine” iye.

Yerusaalemi Happeyeechon Yesuusi Geto

(Maatiyoosi 24:15-21; Maariqoosi 13:14-19)

20Yesuusi daakkiꞌi ishichiye: “Yerusaalemin ginee naayinaꞌo guuddii boonoshi giishaa ittoshi beegiyooba, arooba biich aallee shagon ariibote. 21-22Yaafe Macaafooch kooreeto bi ceennemmoyich eboshi Yeeri Israꞌeeleenaꞌo toommooch nichoon bi kichemmi aabeenaꞌone. Ebich arooba Yihudee showooch beetinaꞌo geppoo beetooch maxxebeete. Are Yerusaalem beetinaꞌo tiyi bara keyeete. Bi guudeexi goyechi gafooch beetinaꞌo are Yerusaalem giyaayeete. 23Arooba yeqqefechinaꞌonaa bushoon xaachii beetinaꞌonoyich woowo! Hini showee toommooch ooge xuuxo, hini aagetee toommoochoo ooge naxo kindemmone. 24Goraadoona qitemminaꞌone; kecceree aagetoo bulliichoo shacemminaꞌone; ebi are boonoshin kecciti Aageteenaꞌochi yemeeno ciiremmi wottoonoo Yerusaalemin yiikkeree neexi hajjemminaꞌone” iye.

Guttinnoon Yesuusichi Womo

(Maatiyoosi 24:29-31; Maariqoosi 13:24-27)

25Wotta Yesuusi daakkiꞌi ishichiye: “Are yemeeno ciirehooba aabeenaa ageneenochi toommooch, xojjeno toommoochoo malletoo bekkemmone.#Isi. 13:10; Hiz. 32:7; Yoꞌeel. 2:31 Showoo bulli toommoochoo baharoonaa aachi aayonochi cookoochee tiyitona aageteenaꞌo gaabbibee xuuxemminaꞌone. 26Shimaajji giideenaꞌo shuuritoyich, showoo bulli toommooch kindemmi mooyon quyebee ashi kashoo keqqoona muujjemmone. 27Arooba Ashi Bushoo wodde giidoonaa oogee yiiroona qubee daggoona bi waataa beeggemminaꞌone.#Daan. 7:13 28Ebi mooyinaꞌo tiyiyooba, Yeeri ittoshin biisheree bi wodiyemmi aabo bi katinnitoyich, kaama neexeechi damba wochiree ciinote” iye.

Balaasee Mixo Bekkiibeeti Mooyo

(Maatiyoosi 24:32-35; Maariqoosi 13:28-31)

29Ebichi hillooch Yesuusi bi dabbeenaꞌoyich ishichiꞌi shaahiyoona gettiye: “Balaasee mixonaa bare mixinaꞌo bullinon ciinote. 30Quummiꞌi boonoshi atee waajjegaata, arooba ebin beeggiꞌi qaawoo womon ittoshi qelloona ariibeeto ittoshine. 31Ebiyoommon wotta hini mooyo bulli tunoon ittoshi beegiyooba, Yeerichi taatittine katinneti bi tunoon ariibote.

32“Iberoon ittoshich gettoye: Hini mooyo bulli tuneyaanoon hini shiijjeroo besheyaachemmone. 33Showoonaa shimaayoona beshemmone; tunebaani ta qaaro besheyaachemmone” iye.

Qanniree Boonoshi Quyemmoyich Yesuusi Gettiti Naboo

34“Tunebaani ittoshi mullo miyona, mashoonaa mashaamiti beemi qaatoona dingiraate bi beetaa, Ashi Bushoochi aabo diqqoona shaachoochoommon ittoshin bi yeshaachemmoyich, ittoshi qelloon quyebote. 35Are aabo showooch beetinaꞌo bulli toommooch diqqoona shaggemmone. 36Illa hini shagg bedditi mooyoochee ittoshi muriccemmonaa Ashi Bushoo aafooch ittoshin neechemmi hakkoon ittoshi danemmonoyich corootibee, bulli aaboon qanniree quyebote” iye.

37Areddi areddoon Yesuusi yaafee kexoochaa asheenaꞌoyich dojjiibee, showoo xumemmona Yerusaalemee maach kechiꞌi, Zayitee Michi guudo getteebeeti xaaꞌooch hammii qeyii beehe. 38Asheenaꞌo bulliyoo bi dojjoon waayeya maaddi maaddoona yaafee kexooch bi waan waa beeheete.

Currently Selected:

Luqaasi 21: KBRC

Highlight

Copy