Luqaasi 17
17
Axaaxeechon Yesuusi Dojjoo
(Maatiyoosi 18:6-7,21-22; Maariqoosi 9:42)
1Yesuusi bi dabbeenaꞌoyich ishichiye: “Ashich xugo tuneree yexi dichemmi mooyo womo echeyaachemmone; tunebaani are xugoon tunemmi ashich woowo! 2Are uro hini gishiisheenaꞌo daggoochee ikkoyichona xugo bi tunoyee, ooge yiikke xaqqoon bi qettooch tifaa baharee gejjooch bi duppeto gaata, biich gaawiye. 3Ebich ittoshi qelloon quyebote.
“Ne manoo neen bi xuꞌigaata, bi waan hamiree ittibatebe. ‘Gondo taachone’ bi getigaata, maaribe. 4Heeyooch shabaatte wottoon ne toommooch axaaxoon shuuneechii, heeyooch shabaatte wottoon ne waan waaꞌi, ‘Gondo taachone; taan maaribe’ bi getigaata, maaribe” iye.
Yesuusi Toommooch Mulloon Tooꞌiyoo
5 Mishiraachechinaꞌo Doono Yesuusin “Ne toommooch mullee tooꞌiyoon nooch daakkibe” iyeete.
6Biyoo wochiꞌi boonoshich ishichiye: “Shanaafee aafeyoommi giisheche mullee tooꞌiyoo ittoshich bi beemmo gaata, hini neexeꞌi beeti caaree mixon ‘Cammona waaxeree baharooch hamiree becheebe’ ittoshi getaa, biyoo ittoshich deꞌa getteshone” iye.
Qelloon Yittiiꞌi Maddoo
7Yesuusiyoo daakkiꞌi ishichiye: “Ittoshi daggoochee goyoon biich gochiibeeti woyee bagoon quyeebeeti guuno biich beeto, are guuno shuunoochee bi wottemmona, ‘Kaate hach gidderee madooch kotebe’ gettemmo konine? 8Tunebaani ‘Xumi maayoon taach qanniibe; maa uchaa ta immi wottoon cuyeree ta aafooch wocheebe; madoo wottemmona newoo maa uchemmo neene’ getaachehe? 9Bi gettiton ceechii bi itoyich, bi doono are guunon galletehe? 10Ebiyoommon ittoshi wotta Yeeri gettito bullin ittoshi shuunetoyee gubb, ‘Yeer waanee galletoon danoyich bedaani guuno noone; no shuun bede shuunoon baachiye no shuuneto’ getote” iye.
Qeddee Shaddee Biiyoochee Aashire Asheenaꞌo Wodoo
11Yesuusi Yerusaalem hammiibee Shamaaree showoonaa Galiilee showee gutte daggoona beshehe. 12Ikke gafooch bi giyimmona, qeddee shaddee biiyechi aashire asheenaꞌo bi waan waaꞌi wohooch neexeechii, 13boonoshi qaaroon oogichiꞌi, “Yesuusi no Doonocho, nooch ariqqebe!” iꞌi cookiyeete.
14Biyoo ciinnii beeggiꞌi, “Hamiree ittoshi ashittinoon qeesheenaꞌoyich bekkiibote”#Lew. 14:1-2,10,21-22 iye. Boonoshiyoo hammiibee, gommoochaa wodiyeete.
15Arooba boonoshi daggoochee ikkoo bi wodoon bekkech ariiꞌi bi qaaroon oogichiꞌi, Yeerin galleteebee Yesuus waan wottehe. 16Yesuusin galleteebee bi baatooch baroona guufehe. Hini are uroo Shamaaree ashoone.
17Yesuusiyoo wochiꞌi “Aashireenaꞌo bulli wodaacheete? Yiixiyeenaꞌochi amooch giyiyeete? 18Hini ashi showee ashoyee damba Yeerin galleteya wotteto aallehe?” iye. 19Wotta woditi uroon “Tiyiree hambe; ta toommooch ne mulloon ne tooꞌiyoo neen wodiitone” iye.
Yeerichi Taatittinee Womo
(Maatiyoosi 24:23-28,37-41)
20 Fariseenaꞌo daggoochee ikkikkeenaꞌo Yesuusin “Yeerichi taatittine bulli toommooch bi beddemmo aatane?” iꞌi boonoshi echemmona, Yesuusi wochiꞌi, “Yeerichi taatittine bulli toommooch bi beddemmo malletee quyoona toonoone. 21Wotta ‘Hach hinin beege’ woyee ‘Beqach ebin beege’ getteyaachemmone. Yeerichi taatittine and ittoshi daggooch beetine” iye.
22Ebichi hillooch bi dabbeenaꞌoyich ishichiye: “Ashi Bushoo bekkemmi aaboochee ikkoon ‘Ikke wottoonoo baach beegishoo getota!’ getiree ittoshi qaatemmi aabo woyemmone; tunebaani beegaachemmo ittoshine. 23Arooba asheenaꞌo ittoshich ‘Hiniichiye’ woyee ‘Beqach ebiichiye’ gettemminaꞌone; tunebaani arooch boonoshina tookkiree hammaahote; boonoshinoo dabbiyaahote. 24Xeeyo shimaayoochaa phaqqiꞌi ikke showee tuggoochee bare showee tuggooch bekkech bi bedoommon, Ashi Bushoo bekkemmi aabooba ebiyoommon tunemmone. 25Tunebaani ebiyee shiichi wodde xuuxoon beegonaa hini yemeenooch beeti asheenaꞌona shixxeyoona biich qaawiihe.
26“Wonna Noohichi yemeenooba tunetoommon, Ashi Bushoo yemeenooch wotta ebiyoommon tunemmone.#Hal. 6:5-8 27Noohi markabooch bi giyemmi aabee wottoon, asheenaꞌo maa uchiibee, shaaggii shaakkiibee beeheete. Diqqoona aalliyee aaco waaꞌi boonoshi bullin aalliitone.
28“Ebiyoommon wotta Looxichi yemeenooba, maa uchiibee, kemmii kemeebee, maayoon bechiibee, kexonoo haggiibee beeheete. 29Tunebaani Looxi Sodoomee bi kechiti aabooba shimaayoochee qaaqqoonaa waageroona dihiꞌi hini are katemooch beetinaꞌo bullin aalliitone.#Hal. 19:25
30“Arooba tunetoommon Ashi Bushoo bekkemmi aabooba wotta ebiyoommon tunemmone. 31Are aabooba kechi toommooch beeto kindiree kexooch beeti bi qiicoon deeba giyaaye; wotta goyee toommooch beeto, bi qiicoon deeboyich gubb wottaaye. 32Gubb wotteti Looxi mechee toommooch shaggiton shalligibote.#Hal. 19:26 33Bi kasheen wodiiya qaawiibeeto bulli muccemmone; tunebaani bi kasheen mucceebeeto bulli danemmone. 34Ittoshich gettoye: Ebiyoobee xum gutte asheenaꞌo ikke qeenooch tokkete boonoshi beetaa, ikkoo tiijjaa hammemmone; ikkoo echemmone. 35Gutte maacheenaꞌo ikkooch xaqqoon yiikke beeyemminaꞌone; ikkee tiijjaa hammemmine; ikkeyoo echemmine. 36[Wotta gutte asheenaꞌo ikke goyooch beeyemminaꞌone; ikkoo tiijjaa hammemmone; ikkoo echemmone]” iye.
37Arooba Yesuusichi dabbeenaꞌo tiyiꞌi, “Doonocho, ebi bulli tunemmi xaaꞌoo aabiichiye?” iꞌi echeheete.
Biyoo wochiꞌi, “Meeshoo beetooch aakkeenaꞌo kiceyemminaꞌone” iye.
Currently Selected:
Luqaasi 17: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
