Luqaasi 16

Accechi Gijje Yesho

1Yesuusi daakkiꞌi bi dabbeenaꞌoyich ishichiye: “Ikke gaannechi uro beehe; biichoo ikke gijje yesho beehe. Ikkikke asheenaꞌo are gaannechi uro waan waaꞌi, ‘Hini ne gijje yeshe uro ne gijjoon shaccii beetone’ iꞌi gettiyeete. 2Hini are gaannechi uroo are gijje yeshoon ceekkiiꞌi, ‘Hini ta waayaabeeti ne mooyo amoone? Giyii kechiibeeti ta gijjoon ne kooriti mazgaboon taach imbe; illa ebiyee bekk ta gijje yesho tunoon hakkaachine’ iye.

3“Gijje yesho mooyon gabiibee ‘Ta doono hini shuunoochee taan kichiyane bi ii beeto. Ebich illa aabichishiye ta gettemmo? Gochii mamoyich giidoo taach aalle; guuddiꞌi qollee mamo wotta taach yeelloone’ iꞌi yiijjiibee heechiꞌi tiyii 4‘Ahaa! Gaawiye; ta shuunoochee yookkaa ta getigaata, asheenaꞌo boonoshi kexooch taan boonoshi giddiyemmi gommon ariito taane’ iye.

5“Ebich bi doonochi hiishechinaꞌon boonoshi qelli qelloona ceeggiꞌi, batti batt shaggiti hiishechon ‘Ne toommooch beeti ta doonochi hiishoo ambichoone?’ iꞌi echehe.

6“Biyoo ‘Balle qondee zayitoone’ iye.

“Hini are gijje yesho ‘Ne hiishee haddoon yechiti woraqatoon ta imaa daami, kaate koteree “Aache qondee zayitoone” geti kooribe’ iye.

7“Bi hillooch waaton wotta ‘Ne toommooch ambichoone beeto?’ iꞌi echehe.

“Biyoo ‘Balle daawillee teepphoone’ iye.

“Gijje yesho ‘Ne hiishee haddoon yechiti woraqatoon ta imaa daami, “Shinne daawillee teepphoone” getiree kooribe’ iye.

8“Aree hillooch hini are doono biich gibeneyaani gijje yeshoon acona bi shuuneti shuunoyich galletehe. Illa hini yemeenooch beeti asheenaꞌo boonoshinaa boonoshina shuuneebeeti shuunoona Yeerichi bekkooch beeti asheenaꞌoyee beshe accechinaꞌone. 9Ta ittoshich gettoye: Hini showeexi gaanno ciyigaata, bulli yemeenoon ittoshi beeyemmi gamini Yeerichi kexooch ittoshi giyiyooba arooch beetinaꞌo emiremmoyich, are ittoshi gaannoona deꞌe shuunoon shuuneree ashoona tookki xibebote.

10“Giisheche mooyona gibeneeto oogeti mooyona wotta gibeneyemmone; giisheche mooyona gibeneyaano oogeti mooyona gibeneyaachemmone. 11Illa hini showeexi gijjoyich ittoshi gibeneyaaneegaata, ittoshin gibeneree ibere aaxxe mooyon ittoshi kishooch beshiiree immemmo konine? 12Bare ashi gijjoona ittoshi gibeneyaanee gaata, ittoshich tunemmi wojjoon konine ittoshich immemmo?

13“Wotta gutte doonoyich hajjeyoon hakkemmi aafee bushoo aalloone. Ikkoon bi shunigaata, baroon shixxemmone; woyee ikkoon bi oogiigaata baroon hoxemmone. Ebich gijjoyich hajjeebeeti asho Yeerich hajjeyoon, wotta Yeerich hajjeebeeti asho gijjoyich hajjeyoon hakkaache” iye.

Yesuusi Dojjiti Ikkikke Mooyinaꞌo

(Maatiyoosi 11:12-13; 5:31-32; Maariqoosi 10:11-12)

14 Fariseenaꞌo gijja shuneenaꞌo boonoshi tunetoyich, ebi Yesuusi gettito bullin waayeꞌi cooqqiriyeete. 15Ebich Yesuusi boonoshich ishichiye: “Asheenaꞌo ittoshin beegiree, ‘Am shaahe cadiqeenaꞌone’ geton shunniibeeto ittoshine; tunebaani Yeeri ittoshi mullee gaboon arii beetone. Ashi gaboochaa oogetone getteebeeti mooyon Yeeri ciigemmone.

16“Muusichi Sheeroonaa keemechinaꞌochi macaafeenaꞌona Aacona Afaallechi Yowannisi yemeenooch beddaahaa gettee beeheete. Aroochee tiijjiꞌi ikka getaa Yeerichi taatittinee mishiraachee qaaro gettee beetone; asho bulliyoo Yeerichi taatittineech giya qiiccee beetone. 17Muusichi Sheeroochee ikke giisheche mooyi aalloyee showoonaa shimaayoona bi kotoochee tiyiꞌi aallo kettoone.

18“Wotta bi mecheen gawukkiꞌi bareen shaaggiibeeto bulli, shunoon maatone; bi keno waanee gawukkeetin shaaggiibeeto shunoon maatone” iye.

Gaannechi Uroonaa Alaazarina

19Yesuusi daakkiꞌi ishichiye: “Damere iddimoonaa muttee tuppoochee cicii yokketaa shippeti tahoonon taheebeeti ikke gaannechi uro beehe. Are uro beemo biich mashaamitoyich, qemi qemona bi gaawe beemona emiriibee beehe. 20Arooba bi ashittinoon mayo bajjii deqqiti ikke Alazaari getteebeeti girechi uroon are gaannechochi kellooch asheenaꞌo deebii qeejjii beeheete. 21Biyoo are gaannechochi madee ooyoochee maaya qaatii beehe. Ebi bulli toommooch kunaaneenaꞌolla waaꞌi bi mayon napphee beeheete.

22“Ebiyee gubb, are girecho qitiye; maraakeenaꞌo deenniꞌi Abrahamichi sheenooch daammii kotiiheete. Gaannecho wotta qitiꞌi duukkehe. 23Siꞌooloochaa oogichiꞌi xuuxeebee, bi aafoon kaachiꞌi wohooch beeti Abrahamin ciinniye; bi sheenoochoo Alazaari beemon beeggiye. 24Biyoo cookiibee, ‘Abrahami ta nihoocho, hini qaaqqooch xuuxaabeeti taach ariqqeree Alazaarin ne deejjaa, bi kishee yapheroon aacooch haciree ta heciyoon aqqiibe’ iye.

25“Tunebaani Abrahami wochiꞌi, ‘Ta bushoochoo, showee toommooch ne beehooba, deꞌe mooyo bullin ne danoon shalligibe. Ebiyoommon wotta Alazaari showee toommooch bi beehooba, magge iritee toommooch bi beemonoo shalligibe. Tunebaani Alazaari and hiniichaa bi ayinoon shoottitone; newoo xuuxaabeeto neene. 26Wotta ebi bulli toommooch hiniichee ittoshi waan kimon qaawemmo beegaata bi kimaachemmoyich, wotta ittoshi beetoocheenoo hach no waan koniyoona bi kimaachemmoyich, noonnaa ittoshina gutte daggooch Yeeri neechiti ooge qaaꞌo beetone’ iye.

27“Biyoo ‘Ishigaata, ta nihoocho, Alazaarin ta nihoo kexooch ne daachiyemmoyich neen qollehoye; 28uuche ta maneenaꞌo beetinaꞌone. Boonoshi wotta hini xuuxee xaaꞌooch boonoshi waataachemmoyich, Alazaari hamiree boonoshich gete’ iye.

29“Tunebaani Abrahami ‘Muusinaa keemechinaꞌona kooriti macaafeenaꞌo boonoshich beetinaꞌone; are macaafeenaꞌooch kooreeton waayebeete’ iye.

30“Biyoo ‘Abrahami ta nihoocho, ebi toonoone; qititinaꞌo daggoochee ikkoo tiyii hammiꞌi boonoshich bi getigaata, axaaxee gommoochee Yeer waan wottemminaꞌone’ iye.

31“Abrahamiyoo ‘Muusinaa keemechinaꞌona kooriti macaafeenaꞌoochee waayo boonoshi qayigaata, ikkoo qitoochee tiyii hammiꞌi bi gettitaanolla, iberiyaachemminaꞌone’ iꞌi wochiye” iye.

Currently Selected:

Luqaasi 16: KBRC

Highlight

Copy