Luqaasi 15

Aallee Daneti Bagee Shaahiyoo

(Maatiyoosi 18:12-14)

1Gabiyee guudeenaꞌonaa axaaxechinaꞌonochi daggoochee meetinaꞌo “Yesuusi gettimmon waayebone” iibee bi waan waa beeheete. 2Arooba Fariseenaꞌonaa Muusichi Sheeree dojjechinaꞌona “Hini uro axaaxechinaꞌon bi waan katichii beete; boonoshina tookkiinoo maabeete” iꞌi boonoshinaa boonoshina guruuxeeheete.

3Ebich Yesuusi hini shaahiyoon boonoshich ishichiꞌi gettiye: 4“Ittoshi daggoochee balle bagechi uro, aree daggoochee ikke bago aallegaata, echeti yixenaa yiixiyeenaꞌon gaddooch dufiichi are aalleton bi danemmi wottoon qaawooch hamaachemmo konine? 5Bi danegaata, emiribee bi gogooch shaagiree deebemmone; 6kexooch shagi, bi shunechinaꞌonaa bi giyeenaꞌonon ikkooch ceegiree, ‘Aalleti ta bagoon daneto taane; ebich taanna tookki emiribote’ gettemmone. 7Ittoshich gettoye: Ebiyoommon axaaxee gommoochee Yeer waan wotto boonoshich qaawiyaani yixenaa yiixiye cadiqeenaꞌoyee, axaaxee gommoochee Yeer waan wotteebeeti ikke axaaxechochi naboona shimaayoochaa emiroo tunemmone” iye.

Aallee Daneti Shilinkee Shaahiyoo

8Yesuusiyoo daakkiꞌi ishichiye: “Wotta aashire shilinkechi ure ikke bi shilinko aallegaata, ceechoon ceechaꞌa kexon hidaabee bi danemmi wottoon manjiiree qaawaachehane? 9Bi danegaata, bi shunechinaꞌonaa bi giyeenaꞌonon ikkooch ceegiree, ‘Aalleti ta shilinkoon daneti taane; ebich taanna tookki emiribote’ gettemmine. 10Illa ittoshich gettoye: Ebiyoommon axaaxee gommoochee Yeer waan wotteebeeti ikke axaaxechochi naboona Yeerichi maraakeenaꞌo emirii beetinaꞌone” iye.

Aallee Daneti Bushoochi Shaahiyoo

11Wotta Yesuusi ishichiye: “Ikke uroyich gutte bushiisheenaꞌo beeheete. 12Ikke areddoon guuche bushoo tiyiꞌi bi nihoon ‘Ta nihoocho, ne gijjoochee ta qoodoon taach imbe’ iye. Ebich nihoo biich beeti gijjoon boonoshich qoodiꞌi bi qoodoon immiye.

13“Giisheche qemoyee gubb are guuche bushoo bi gijjoo bullin kicii yechiꞌi wohi showooch hammiye; aroochaanoo bi mullo gabito bulliich bi gijjoon kichiibee shacciꞌi aalliihe. 14Bi gijjoo bullinoo ciichii bi iti xaaꞌooch, gonde shaacoo are showoo bulliich giyiye; bi maayemmonoo muccehe. 15Ebich tiyii are showee ashi daggoochee ikkoo waan hammiꞌi gichooch giyiye; are uroo ‘Gudinon quyebe’ iꞌi gaddooch daachiihe. 16Aroochaa gudininaꞌo maabeeti mooyoochee maaya qaatiibee shaacoona xuuxee beehe; tunebaani amoonolla biich immemmo aalloone.

17“Batt ciiroochaa bi mullo yeshaa, ishichiye: ‘Ambiche ta nihoochi gichechinaꞌo maa michiꞌi boonoshi wochiibeeti maayo beetaa, amoyichiye ta hiniich kotaachaa shaacoona qitaa gittaꞌa ta beeto! 18Illa tiyi ta nihoo waan hamiree, “Ta nihoocho, Yeerinaa neennon xuqqeto taane; 19gubbichoo ne bushoo getteya bedaache; ne gichechinaꞌo daggoochee ikkoommon taan tuniiree ciine” gettehoye’ iye.

20“Bekkech tiyiꞌi bi nihoo waan hammiye; batt wohooch bi beetaa, bi nihoo ciinniꞌi oogichii ariqqehe; woccii hammii bi qettoona tiqqeꞌi shummiye.

21“Bushoo ‘Ta nihoocho, Yeerinoo neenoo xuqqeto taane; gubbichoo ne bushoo getteya bedaache’ iye.

22“Tunebaani nihoo bi aafee bushiisheenaꞌon ishichiye: ‘Kaateree bulliyee beshe gaaweti tahoon deebi biich tajjibote; bi kishoochoo axxaamittoon, bi baatoochoo caammoon deebiree gedote. 23Awujjiti gubbenoonoo deebiree bashibote; mamone; nooch emiroo tunebe. 24Qititone iyaꞌa ta gabiti ta bushoo kashoona wottetone. Aalletone iyaꞌa ta gabiti ta bushoo danetone’ iye. Emiroochoo giyiyeete.

25“Ebi emiree daggooch qaabbe bushoo goyoochiye bi beeto; aroochee wottee waa kexooch shagg beddiichii, kexeexi ximboonaa duubbi qaaroonon waayehe. 26Bi nihoochi aafee bushiishoo daggoochee ikkoon ceeggiꞌi, ‘Hini duubo ameechone?’ iꞌi echehe. 27Biyoo wochiꞌi, ‘Wonna hammiti ne manoo wottee bi waatoyichiye. Ne aabbiyoo diggoona bi waataa bi beeggitoyich, emiriꞌi awujjiti gubbenoon bashiitone’ iye.

28“Arooba qaabbe bushoo kaareꞌi ‘Kexooch giyaache’ iꞌi qajjiye. Ebich bi nihoo maaxooch kechiꞌi, ‘Hach kexooch gibe’ iꞌi qollehe. 29Tunebaani qaabbe bushoo wochiꞌi bi nihoon ‘Eke ebi shaahe meeti naton neech guunochoommon hajjeeꞌa shuuneto taane. Ne gettetoochee ikkoonolla shappayaano taane; tunebaani ta shunechinaꞌona tookki ta emiremmoyich ikke emmishee bushoonolla taach imaano neene. 30Tunetaa hini ne bushoo ne gijjoon daammii maachee toommoochaa aalliiꞌi wottee bi waammona, awujjiti gubbenoon biich bashihine’ iye.

31“Nihoo wochiꞌi ‘Ta bushoocho, ne bulli aaboon taanna tookkaaniye ne beeto; taacho tuneto bulli neechone. 32Tunebaani “Qititone, aalletone” iyaꞌa ta gabiti hini ne manoo kashoona wotteꞌi danetone; ebich gifiree maayoon gediree emiraanoon aabichiree qajjehone?’ iꞌi gettiye” iye.

Currently Selected:

Luqaasi 15: KBRC

Highlight

Copy