Yilipai 2
2
SOPENA 2.
1Va na uma tomotoho me Kristo, va na sena meje moraveja, va totuatua me na talume, va monanaia e, lolomalumu meja,
2Otoveau aejieji tahajia suria otololotea, otoninima tea,
3Otosa-vei te sanu suri na asoaso e suria otovutivuti amiu, maa me na lolo tahonai otoninima ra tuamiu jivi amiu.
4Moso na tajua moninima ra sipilana sanu hasa maa motahonai moninima ra sanu pilara tuana.
5Motahonai ra ninima hi Kristo tepilamiu mono,
6Isei mopala Atua me na majiha maa mosaninima motahonai mohijetohoae,
7Maa motapuna vea pala tajuatipa, molavi na epena tahavarao, mopala ra valura tajua.
8Momalua meja pala na tajua, tomosinono, mosahosore tuhe na mate, io, na mate me na hau palatusi.
9Suria Atua movutirahae, morahu ta mea na hisena mosale jivi ra valura hise.
10Sura hale na hisei Iesu ra tajua vunuvunu tetiepau, me na tailahi, me na ulu, me na vavana ulu.
11Sura ra memera tajua vunuvunu tevetiveti Iesu Kristo inie na Moli, sura hale Atua Tata.
12Suria, ra tuau tahonai, otorohoe mine tuitui, naanoi otovarao me na ine me na epepeiri sura semiu jolo.
13Otoninima Atua, me na sena tahonai, tomovarao me na loloja sura veja tomeje na varao.
14Me ra sanu vunuvunu otovera, otovotoa na puruhutu me na aso hina jumu.
15Sura pise amiu otololovoe, ototaharahu, ra matui Atua, saite sanu oso me amiu, me na vuati hira tahaoso, tahapahilu, me na vuati hira ototila pala ra pula me na ulu.
16Otorahu na Leo hina mauri: sura me na rani hi Kristo apinisi asavarao tipa, asamauri tipa.
17Maa, me na rani otorahu me Atua na semiu rohoroho pala na vivijahi, va telihere na jaeu mea, palahi aejieji, aejieji valui amiu mono.
18Palahi otoejieji, otolavi na ejieji valuiau.
19Ameje, va na Moli Iesu momejeia, na sula Timote me amiu varivarihi, sura na lolou mojovi suria aroho suri amiu.
20Saite tajua maa sura sulae, saitea maa ipalaiau isei momata susuhi amiu.
21Suria hire vunuvunu tetiro ra sipilara sanu, tesatiro ra sanu hi Iesu Kristo.
22Otopinisi Timote mopise taharahu, pala matuna movarao suri tamana, movarao hauhaua valuiau sura tuiturituana Leo Tahonai.
23Suria ameje na varihisulae: tau apinisi ra sanu temalua meau.
24Va na Moli momejeia ameje na malua mena tahuna.
25Aninima motahonai asula Epavrotitus me amiu naanoi, suria motuahau, na tuau tahavarao, na tuau tahajumu, na pilamiu varisula meau, sura tuiturituau.
26Momeje tohova na reni amiu, momamahanu suria otoroho morojo.
27Avarai amiu morojo mate: maa na loloi Atua momalumu mea; mosamalumu mea hasa maa meau mono suria alavi mine ra mamahanu ra tari.
28Ameje; na sulae sura me na rani otorenia movei ra lolomiu tejovi, movei na seu mamahanu tejiha taiti.
29Otolavia me na ejieji suri na Moli: ra tajua palea otovutira.
30Suria morojomate suri na varao hi Kristo, mosaninima na sena mauri sura lavi ta meau ra sanu otosasulara.
Currently Selected:
Yilipai 2: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
